વર્લ્ડ / હોઠ મોટા કરવાની ઘેલછામાં મોડલે ઘરે જ લગાવ્યું ફિલર! ડૉક્ટરની સલાહ વિના આવું જોખમ લેતાં પહેલાં ચેતજો

સુંદર દેખાવા માટે લોકો અનેક પ્રકારની કોસ્મેટિક ટ્રીટમેન્ટ કરાવે છે પરંતુ ક્યારેક સુંદરતાની ઘેલછા જીવને જોખમમાં મૂકી શકે છે. બ્રિટનની મોડલ સોફિયા લિપ્સે ડૉક્ટરોએ વધુ ફિલર ભરવાની ના પાડતાં ઘરે જ પોતાના હોઠમાં ઇન્જેક્શન લગાવી દીધું. આ ઘટના બાદ ફરી એકવાર કોસ્મેટિક ટ્રીટમેન્ટ અને તેના જોખમો અંગે ચર્ચા શરૂ થઈ છે.

કોણ છે સોફિયા લિપ્સ, શા માટે છે ચર્ચામાં?

બ્રિટનની મોડલ સોફિયા લિપ્સ પોતાના અસામાન્ય રીતે મોટા હોઠને કારણે ચર્ચામાં રહે છે. તેમને પ્લાસ્ટિક સર્જરી કરાવવાનો અને ઢીંગલી જેવો દેખાવ મેળવવાનો શોખ છે. પોતાના દેખાવમાં ફેરફાર કરવા માટે તેઓ અગાઉ પણ અનેક પ્રકારની કોસ્મેટિક ટ્રીટમેન્ટ કરાવી ચૂકી છે.થોડા સમય પહેલાં સોફિયાએ પોતાના હોઠમાંથી અગાઉ ભરાવેલું ફિલર કઢાવી નાખ્યું હતું. તેઓ પોતાના કુદરતી દેખાવને ફરી જોવા માગતાં હતાં. જોકે આ લુક તેમને લાંબા સમય સુધી પસંદ ન આવ્યો અને તેમણે ફરીથી હોઠ મોટા કરાવવાનું નક્કી કર્યું. ત્યારબાદ તેઓ વધુ ફિલર ભરાવવા માટે ક્લિનિક પહોંચ્યાં હતાં પરંતુ ત્યાં ડૉક્ટરોએ તેમને ટ્રીટમેન્ટ આપવાની ના પાડી દીધી હતી.

ડૉક્ટરોએ વધુ ફિલર ભરવાની ના કેમ પાડી?

સોફિયા જ્યારે ફરીથી હોઠમાં ફિલર ભરાવવા માટે ક્લિનિક ગયાં ત્યારે ડૉક્ટરોએ તેમની સ્થિતિને ધ્યાનમાં રાખીને ટ્રીટમેન્ટ કરવાની ના પાડી હતી. અહેવાલો અનુસાર તેમના હોઠ પહેલેથી જ વધારે ખેંચાયેલા હોવાથી તેમાં વધુ ફિલર ભરવું જોખમી બની શકે તેમ હતું. ડૉક્ટરોને આશંકા હતી કે વધુ ફિલરથી તેમના સ્વાસ્થ્યને નુકસાન પહોંચી શકે છે.ડૉક્ટરોની આ સલાહ બાદ સોફિયાએ ટ્રીટમેન્ટ કરાવવાનો વિચાર પડતો મૂકવાને બદલે જાતે જ ફિલર લગાવવાનું નક્કી કર્યું. અહીં નોંધવું જરૂરી છે કે હોઠમાં ફિલર ભરાવવું એક તબીબી પ્રક્રિયા છે. ખોટી રીતે ઇન્જેક્શન આપવાથી ગંભીર ગૂંચવણો ઊભી થઈ શકે છે. તેથી નિષ્ણાતની સલાહ વિના આવી ટ્રીટમેન્ટ કરવી જોખમી બની શકે છે.

ઓનલાઇન કોર્સ કરીને ઘરે જ લગાવ્યું ફિલર

ડૉક્ટરોએ ના પાડ્યા બાદ પણ સોફિયા અટક્યાં નહીં. અહેવાલો અનુસાર, તેમણે આશરે 500 પાઉન્ડ ખર્ચીને છ અઠવાડિયાનો ઓનલાઇન કોર્સ કર્યો હતો. આ કોર્સમાં હોઠ, ગાલ અને દાઢી જેવા ચહેરાના ભાગોમાં ફિલર તથા બોટોક્સ લગાવવાની પદ્ધતિ શીખવવામાં આવતી હતી.કોર્સ કર્યા બાદ તેમણે ઓનલાઇન દક્ષિણ કોરિયાની એક કંપની પાસેથી ફિલરની 20 સિરીંજ મંગાવી હતી. ત્યારબાદ ઘરે જ પોતાના હોઠમાં ઇન્જેક્શન લગાવી દીધું હતું. સોફિયાનો દાવો છે કે તેમણે આ પ્રક્રિયા સારી રીતે કરી હતી. જોકે માત્ર ઓનલાઇન કોર્સ કરવાથી કોઈ વ્યક્તિ આવી તબીબી પ્રક્રિયા સુરક્ષિત રીતે કરી શકે તેની ખાતરી મળતી નથી. આ પ્રકારનાં ઇન્જેક્શન માટે યોગ્ય તબીબી તાલીમ અને નિષ્ણાતની દેખરેખ જરૂરી છે.

અગાઉ પણ સર્જરીને કારણે જીવ જોખમમાં મુકાયો હતો

સોફિયા માટે આ પહેલી ઘટના નથી જેમાં સુંદર દેખાવાની ઇચ્છાને કારણે તેમનું સ્વાસ્થ્ય જોખમમાં મુકાયું હોય. અહેવાલો અનુસાર, અગાઉ કરાવેલી એક જોખમી સર્જરી બાદ તેમના શરીરમાં ચેપ ફેલાયો હતો. તે સમયે તેમની સ્થિતિ ગંભીર બની ગઈ હતી અને તેમનો જીવ પણ જોખમમાં મુકાયો હતો.

આ અનુભવ પછી પણ તેમણે પોતાના દેખાવમાં ફેરફાર કરવાની ઇચ્છા છોડી નથી. તેઓ પોતાના હોઠને વધુ મોટા બનાવવા માગે છે અને આ માટે જોખમ લેવા પણ તૈયાર હોવાનું જણાવે છે. જોકે, અગાઉ ચેપ લાગ્યો હોવાની વાતને ધ્યાનમાં રાખીને આવી પ્રક્રિયાઓમાં સાવચેતી રાખવી વધુ જરૂરી બને છે.

લોકો શું કહેશે તેની ચિંતા નથી, ઢીંગલી જેવો દેખાવ મેળવવાની ઇચ્છા

સોફિયાના જણાવ્યા અનુસાર લોકો તેમના દેખાવ વિશે શું વિચારે છે તેની તેમને પરવા નથી. તેઓ જ્યારે બહાર નીકળે છે ત્યારે લોકો તેમને જોઈને આશ્ચર્ય વ્યક્ત કરે છે અને તસવીરો પણ ખેંચે છે. આમ છતાં સોફિયા પોતાના દેખાવથી સંપૂર્ણ સંતુષ્ટ નથી અને ઢીંગલી જેવો દેખાવ મેળવવા માગે છે.તેમનું કહેવું છે કે જ્યાં સુધી તેમને ઇચ્છિત દેખાવ નહીં મળે ત્યાં સુધી તેઓ અટકવાનાં નથી. જોકે સુંદર દેખાવાની ઇચ્છામાં પોતાના સ્વાસ્થ્યને જોખમમાં મૂકવું ગંભીર પરિણામો લાવી શકે છે. ખાસ કરીને ચહેરા પર ફિલર કે બોટોક્સ જેવી ટ્રીટમેન્ટ ઘરે જાતે કરવી જોખમી બની શકે છે.

આ પણ વાંચોઃ જો અમેરિકાએ આ કામ કરી નાખ્યું, તો ભારત આવી શકે છે મોટું સંકટ!

હોઠમાં જાતે ફિલર લગાવવું કેટલું જોખમી છે?

હોઠમાં ફિલર ભરાવવાની પ્રક્રિયામાં ખાસ પ્રકારનું ઇન્જેક્શન આપવામાં આવે છે. જો આ પ્રક્રિયા ખોટી રીતે કરવામાં આવે અથવા ફિલર રક્તવાહિનીમાં પહોંચી જાય તો ગંભીર નુકસાન થઈ શકે છે. તેના કારણે તીવ્ર દુખાવો, સોજો, ચેપ અને ત્વચાના પેશીઓને નુકસાન થવા જેવી સમસ્યાઓ થઈ શકે છે. કેટલાક કિસ્સામાં રક્તપ્રવાહ અવરોધાય તો કાયમી નુકસાન પણ થઈ શકે છે.આંખની આસપાસની રક્તવાહિનીઓમાં ગૂંચવણ ઊભી થાય તો દૃષ્ટિને પણ ગંભીર નુકસાન પહોંચી શકે છે. તેથી ઘરે જાતે ફિલર લગાવવાનો પ્રયાસ ન કરવો જોઈએ. આવી ટ્રીટમેન્ટ કરાવતાં પહેલાં લાયકાત ધરાવતા તબીબી નિષ્ણાતની સલાહ લેવી અને સારવારની સુરક્ષા અંગે ખાતરી કરવી જરૂરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ