રજૂઆત / થરાદના વાડીયા ગામના ગ્રામ્યજનોએ કર્યો ગુજરાતી ફિલ્મ ''શક્તિ''નો વિરોધ, કહ્યું ''બાળકોના ભવિષ્ય...''

બનાસકાંઠા જિલ્લાના થરાદ તાલુકાના વાડીયા ગામમાં આવનાર ગુજરાતી ફિલ્મ ‘શક્તિ’ને લઈને ગ્રામજનોમાં ભારે રોષ ફાટી નીકળ્યો છે. ગામલોકોએ આરોપ લગાવ્યો છે કે ફિલ્મમાં તેમના ગામ વિશે ખોટી અને અપમાનજનક રજૂઆત કરવામાં આવી છે, જેના કારણે ગામની પ્રતિષ્ઠાને નુકસાન પહોંચી શકે છે.

ગ્રામજનોના જણાવ્યા મુજબ 10 ફેબ્રુઆરીએ ફિલ્મનો ટ્રેલર રિલીઝ થયા બાદથી જ ગ્રામજનોમાં અસંતોષ વ્યાપ્યો હતો. ટ્રેલરમાં દર્શાવવામાં આવેલા કેટલાક દૃશ્યોને લઈને ગામના રહીશો વાંધો ઉઠાવી રહ્યા છે. તેમનું કહેવું છે કે ફિલ્મમાં ગામની જૂની કે ખોટી છબી રજૂ કરવામાં આવી છે, જે હાલની વાસ્તવિક પરિસ્થિતિથી વિપરીત છે.

દેવાભાઈ વાડિયા (સ્થાનિક અગ્રણી )

આગામી 27 ફેબ્રુઆરીએ ફિલ્મ રિલીઝ થવાની છે. તે પહેલા જ ગ્રામજનો કલેક્ટરને આવેદનપત્ર આપી ફિલ્મની રિલીઝ રોકવા માંગ કરી છે. આવેદનમાં જણાવાયું છે કે હાલ ગામના લોકો ખેતી, પશુપાલન અને મજૂરી દ્વારા સન્માનપૂર્ણ જીવન જીવી રહ્યા છે અને ગામના બાળકો ઉચ્ચ શિક્ષણ મેળવી રહ્યા છે. આવી સ્થિતિમાં ફિલ્મમાં ખોટી રજૂઆતથી યુવાનોના ભવિષ્ય પર માઠી અસર પડી શકે છે.

આ પણ વાંચોઃ હવે કોંગ્રેસે પણ વિધાનસભા ઉપાધ્યક્ષ માટેના ઉમેદવાર ઉતાર્યા, જુઓ કોને ઉમેદવારી નોંધાવી?

ગ્રામજનોનું કહેવું છે કે જો ફિલ્મમાં દર્શાવાયેલા દૃશ્યો દૂર નહીં કરવામાં આવે તો તેઓ ઉગ્ર આંદોલનનો માર્ગ અપનાવશે. સાથે જ ફિલ્મ સાથે સંકળાયેલા જવાબદારો સામે કાનૂની કાર્યવાહી કરવાની પણ માંગ ઉઠાવવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ