બિઝનેસ / મુંબઈ રિયલ એસ્ટેટમાં બમ્પર તેજી: જુલાઈમાં પ્રોપર્ટી રજિસ્ટ્રેશને તોડ્યો 14 વર્ષનો રેકોર્ડ

Published By: Pravin Joshi

Last Updated: 07:18 PM, 31 July 2026

FOLLOW ON

શેર કરો

મુંબઈના રિયલ એસ્ટેટ માર્કેટે જુલાઈ 2026 માં નવો ઈતિહાસ રચ્યો છે. જુલાઈ મહિનામાં મુંબઈમાં કુલ 13,617 પ્રોપર્ટીનું રજિસ્ટ્રેશન થયું છે, જે છેલ્લા 14 વર્ષમાં જુલાઈ મહિના માટેનો સૌથી ઉચ્ચ સ્તરનો આંકડો છે.

મુંબઈના રિયલ એસ્ટેટ માર્કેટે જુલાઈ 2026 માં એક નવો આંકડાકીય રેકોર્ડ બનાવ્યો છે. મહારાષ્ટ્ર નોંધણી અને સ્ટેમ્પ વિભાગના આંકડાઓનું પૃથ્થકરણ કરીને નાઈટ ફ્રેન્ક ઈન્ડિયા દ્વારા જારી કરવામાં આવેલા અહેવાલ મુજબ, જુલાઈ માસ દરમિયાન મુંબઈમાં 13,617 પ્રોપર્ટી રજિસ્ટ્રેશન નોંધાયા છે. આ આંકડો વાર્ષિક ધોરણે 8.3% નો વધારો દર્શાવે છે અને છેલ્લા 14 વર્ષમાં કોઈ પણ વર્ષના જુલાઈ મહિના માટે નોંધાયેલું સૌથી વધુ વેચાણ છે. આ પ્રોપર્ટી રજિસ્ટ્રેશન દ્વારા રાજ્ય સરકારને સ્ટેમ્પ ડ્યુટી પેટે ₹1,223 કરોડની આવક થઈ છે, જે જુલાઈ 2025 માં થયેલી ₹1,123 કરોડની આવકની સરખામણીએ 8.9% વધુ છે.

માસિક (MoM) ધોરણે વેચાણ અને મહેસૂલમાં વૃદ્ધિ

જૂન 2026 ની સરખામણીએ જુલાઈ 2026 માં પ્રોપર્ટી વેચાણ અને સરકારી મહેસૂલ બંનેમાં વધારો જોવા મળ્યો છે.

રજિસ્ટ્રેશન આંકડો: જૂન 2026 માં 13,413 યુનિટ્સનું રજિસ્ટ્રેશન થયું હતું, જે જુલાઈ 2026 માં વધીને 13,617 યુનિટ્સ થયું છે (માસિક 2% નો વધારો).

સરકારી આવક: જૂન 2026 માં સ્ટેમ્પ ડ્યુટીમાંથી ₹1,086 કરોડની આવક થઈ હતી, જે જુલાઈ 2026 માં 13% વધીને ₹1,223 કરોડ પહોંચી છે.

નાઈટ ફ્રેન્ક ઈન્ડિયાના ચેરમેન અને મેનેજિંગ ડિરેક્ટર શિશિર બૈજલે જણાવ્યું હતું કે, મુંબઈનું રેસિડેન્શિયલ માર્કેટ અત્યંત મજબૂત સ્થિતિ દર્શાવી રહ્યું છે. ટ્રાન્ઝેક્શન વોલ્યુમ સ્થિર રહેવાની સાથે મહેસૂલમાં નોંધપાત્ર વધારો એ બાબત તરફ ઈશારો કરે છે કે પ્રીમિયમ અને વધુ મૂલ્ય ધરાવતા ઘરોની માંગ સતત વધી રહી છે.