CWG 2026 / માં બન્યા બાદ કર્યો ધમાકેદાર કમબેક! સીમા કાલીરામનાએ CWGમાં જીત્યો બ્રોન્ઝ મેડલ

ગ્લાસગો કોમનવેલ્થ ગેમ્સ 2026માં ભારતની ડિસ્કસ થ્રો ખેલાડી સીમા કાલીરામનાએ શાનદાર પ્રદર્શન કરીને બ્રોન્ઝ મેડલ જીત્યો છે. પુત્ર રુદ્રના જન્મના માત્ર 11 મહિના બાદ તેમણે ફરી મેદાનમાં વાપસી કરી હતી. માતૃત્વ, પરિવાર, અભ્યાસ અને રમત વચ્ચે સંતુલન જાળવી તેમણે આ ઐતિહાસિક સિદ્ધિ મેળવી છે. તેમની આ સફર માત્ર એક મેડલની નહીં પરંતુ હિંમત, સંઘર્ષ અને આત્મવિશ્વાસની કહાની બની છે.

શરૂઆત મુશ્કેલ રહી છતાં હાર ન માની

મહિલા ડિસ્કસ થ્રોની ફાઇનલમાં સીમાની શરૂઆત સારી રહી નહોતી. પ્રથમ પ્રયાસ ફાઉલ ગયો હતો, જેના કારણે દબાણ વધી ગયું હતું. બીજા પ્રયાસમાં તેમણે 57.32 મીટરનો થ્રો કર્યો અને પોતાનો આત્મવિશ્વાસ પાછો મેળવ્યો. ત્યારબાદ ત્રીજા પ્રયાસમાં 58.65 મીટરનો શાનદાર થ્રો કરીને તેમણે મેડલની રેસમાં મજબૂત સ્થાન બનાવી લીધું. આ જ પ્રયાસ આખરે તેમની સફળતાનો આધાર બન્યો.

અંતિમ ક્ષણ સુધી રહ્યો રોમાંચ

ત્રીજા પ્રયાસ પછી સીમાના ચોથા, પાંચમા અને છઠ્ઠા ત્રણેય પ્રયાસ ફાઉલ રહ્યા હતા. તેથી મેડલ મળશે કે નહીં તેની ઉત્સુકતા અંત સુધી જળવાઈ રહી. કેમરૂનની મોની નોરા આતિમ અંતિમ ખેલાડી હતી, જે સીમાને પાછળ છોડી શકતી હતી. પરંતુ તે 58.65 મીટરથી આગળ થ્રો કરવામાં નિષ્ફળ રહી અને અંતિમ પ્રયાસ પૂરો થતાં જ સીમાનો બ્રોન્ઝ મેડલ નિશ્ચિત થયો. જીતની જાહેરાત થતાં જ તેમના ચહેરા પર ખુશી છલકાઈ ઉઠી.

માતૃત્વ બાદ કર્યુ યાદગાર કમબેક

સીમા કાલીરામનાની આ સફળતાનું સૌથી મોટું કારણ તેમનો અદમ્ય સંકલ્પ છે. પુત્રના જન્મ બાદ ફરી આંતરરાષ્ટ્રીય સ્તરની ફિટનેસ મેળવવા માટે તેમણે ઘણા મહિના સુધી સતત મહેનત કરી હતી. શરીરને ફરી સ્પર્ધા માટે તૈયાર કરવું સરળ નહોતું, છતાં તેમણે હિંમત હારી નહીં. 2025ની નેશનલ ગેમ્સમાં ગોલ્ડ મેડલ જીતી તેમણે વાપસીના સંકેત આપ્યા હતા અને હવે કોમનવેલ્થ ગેમ્સમાં બ્રોન્ઝ જીતી પોતાની ક્ષમતા સાબિત કરી છે.

આ પણ વાંચોઃ અજિંક્ય રહાણેએ ક્રિકેટને કહ્યું અલવિદા, સંન્યાસ પછી પણ BCCI આપશે ₹8,40,000 નું પેન્શન

અભ્યાસ અને પરિવાર સાથે રમતમાં પણ શ્રેષ્ઠ

સીમા માત્ર ખેલાડી જ નથી પરંતુ ભિવાની સ્થિત ચૌધરી બંસીલાલ યુનિવર્સિટીમાં ફિઝિકલ એજ્યુકેશનમાં પીએચડી પણ કરી રહી છે. રમત અને અભ્યાસની સાથે તેમણે પરિવારની જવાબદારીઓ પણ સફળતાપૂર્વક નિભાવી છે. તેમના પતિ રવિન્દ્ર ઉર્ફે મોનુ કાલીરામના પૂર્વ નેશનલ ડિસ્કસ થ્રોઅર છે અને આ સમગ્ર સફરમાં તેઓ કોચ તેમજ માર્ગદર્શક તરીકે સતત તેમની સાથે રહ્યા હતા. પરિવારના સહયોગે સીમાને ફરી વિશ્વસ્તરીય સ્પર્ધા સુધી પહોંચવામાં મહત્વની ભૂમિકા ભજવી.

નિધિ રાણી મેડલથી રહી વંચિત

ભારતની બીજી ડિસ્કસ થ્રો ખેલાડી નિધિ રાણીએ પણ સારો દેખાવ કર્યો હતો. તેમણે 57.10 મીટરનો શ્રેષ્ઠ થ્રો નોંધાવ્યો, પરંતુ તેઓ ચોથા સ્થાને રહી ગઈ અને થોડા અંતરે મેડલ ચૂકી ગઈ. જમૈકાની સામંથા હોલે 61.66 મીટરના થ્રો સાથે ગોલ્ડ મેડલ જીત્યો જ્યારે કેનેડાની જુલિયા ટંક્સે 60.67 મીટરના થ્રો સાથે સિલ્વર મેડલ પોતાના નામે કર્યો. જોકે સીમા કાલીરામનાનો બ્રોન્ઝ ભારત માટે ગૌરવની ક્ષણ બની રહ્યો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ