IND U19 vs BAN / ભારતીય ખેલાડીઓએ બાંગ્લાદેશના ખેલાડીઓ સાથે હાથ ન મિલાવ્યો

અંડર-૧૯ વર્લ્ડ કપ દરમિયાન ભારતીય કેપ્ટન આયુષ મ્હાત્રે અને બાંગ્લાદેશના ઉપ-કેપ્ટન જવાદ અબરાર ટોસ પછી હાથ મિલાવ્યા ન હતા. બંને દેશો વચ્ચેના સંબંધો હાલમાં તણાવપૂર્ણ છે, જેની અસર ક્રિકેટ પર પણ પડી છે. બીસીબી ૨૦૨૬ના ટી૨૦ વર્લ્ડ કપ માટે પોતાની ટીમ ભારત મોકલવામાં પણ ખચકાટ અનુભવી રહ્યું છે, અને આઈસીસીના અધિકારીઓ આ બાબતે બીસીબી સાથે વાતચીત કરી રહ્યા છે.

આજે ભારતીય ટીમ 2026 અંડર-19 વર્લ્ડ કપમાં પોતાનો બીજો ગ્રુપ સ્ટેજ મેચ રમી રહી છે, જ્યારે બાંગ્લાદેશ પોતાનો પહેલો મુકાબલો રમી રહ્યું છે. ક્વીન્સ સ્પોર્ટ્સ ક્લબ ખાતે રમાઈ રહેલી આ મેચમાં બાંગ્લાદેશે ટોસ જીતીને પહેલા બોલિંગ કરવાનો નિર્ણય લીધો હતો. પરંપરાગત રીતે બંને દેશોના કેપ્ટન ટોસ પછી હાથ મિલાવે છે, પરંતુ અહીં એવું બન્યું નહીં. અગાઉ સૂર્યકુમાર યાદવે એશિયા કપ દરમિયાન વિરોધ દર્શાવતા પાકિસ્તાની કેપ્ટન સાથે હાથ મિલાવાનો ઇનકાર કર્યો હતો.

ભારત અને બાંગ્લાદેશ વચ્ચેની મેચમાં હાથ મિલાવવાની મનાઈ

ટીમ ઈન્ડિયાના કેપ્ટન આયુષ મ્હાત્રે અને બાંગ્લાદેશના ઉપ-કેપ્ટન જવાદ અબરાર ટોસ કરવા આવ્યા હતા, કારણ કે બાંગ્લાદેશના કેપ્ટન મોહમ્મદ અઝીઝુલ હકીમ બીમારીને કારણે મેચમાંથી બહાર છે. ટોસ પછી બંનેએ હાથ મિલાવ્યા ન હતા. જોકે કોઈ પણ ટીમે આ અંગે કોઈ ટિપ્પણી કરી ન હતી.

ભારત અને બાંગ્લાદેશ વચ્ચે વિવાદ કેમ છે?

ભારતીય કેપ્ટન સૂર્યકુમાર યાદવે પહેલગામ આતંકવાદી હુમલાનો વિરોધ કરવા માટે એશિયા કપ દરમિયાન પાકિસ્તાની કેપ્ટન સાથે હાથ મિલાવવાનો ઇનકાર કર્યો હતો . બાંગ્લાદેશમાં લઘુમતીઓ પર અત્યાચારના અહેવાલો છેલ્લા કેટલાક સમયથી સામે આવી રહ્યા હતા. બે હિન્દુ યુવાનોની હત્યા બાદ, ભારતમાં વિરોધ પ્રદર્શનો ફાટી નીકળ્યા, જેના કારણે કેકેઆરને મુશ્કેલીનો સામનો કરવો પડ્યો. હકીકતમાં, કેકેઆરએ આઈપીએલ 2026 માટે બાંગ્લાદેશી બોલર મુસ્તફિઝુર રહેમાનને ₹9.20 કરોડમાં ખરીદ્યો હતો.

આ પણ વાંચોઃ વૈભવ સૂર્યવંશીએ તોડ્યો વિરાટ કોહલીનો રેકોર્ડ, અંડર-19 ક્રિકેટમાં મેળવી વધુ એક સિદ્ધિ

વિરોધ બાદ, BCCI એ KKR ને મુસ્તફિઝુરને મુક્ત કરવાનો નિર્દેશ આપ્યો. જ્યારે ફ્રેન્ચાઇઝીએ આમ કર્યું, ત્યારે બાંગ્લાદેશે દેશમાં IPL પ્રસારણ પર પ્રતિબંધ મૂક્યો. બાંગ્લાદેશે ICC ને કહ્યું કે તે T20 વર્લ્ડ કપ માટે ભારતનો પ્રવાસ કરશે નહીં. તેમણે શ્રીલંકામાં તેમની મેચ રમવાની ઇચ્છા વ્યક્ત કરી, જે ભારત સાથે ટુર્નામેન્ટનું સહ-યજમાન છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ