સ્પોર્ટ્સ / ઈંગ્લેન્ડમાં ટીમ ઈન્ડિયાને મોટો ઝટકો, જાણીતો સ્ટાર બેટ્સમેન ટીમમાંથી OUT

ક્રિકેટનું મક્કા ગણાતા લંડનના ઐતિહાસિક લોર્ડ્સ મેદાને છેલ્લા 142 વર્ષોમાં પુરુષ ક્રિકેટની ઘણી યાદગાર અને ઐતિહાસિક પળોને પોતાનામાં સમેટી છે. પરંતુ આ જુલાઈ મહિનો મહિલા ક્રિકેટના ઇતિહાસમાં સુવર્ણ અક્ષરોથી નોંધાવવા જઈ રહ્યો છે. લોર્ડ્સના આ ભવ્ય મેદાન પર ઇતિહાસમાં પહેલીવાર કોઈ મહિલા ટેસ્ટ મેચ રમાવા જઈ રહ્યો છે, જ્યાં ભારત અને ઇંગ્લેન્ડની મહિલા ટીમો સામસામે ટકરાશે. બંને ટીમો વચ્ચે આ ઐતિહાસિક મુકાબલો 10 થી 13 જૂલાઈ સુધી રમાશે. જોકે, આ પ્રતિષ્ઠિત મેચ શરૂ થાય તે પહેલા જ ભારતીય છાવણીમાંથી એક માઠા સમાચાર સામે આવ્યા છે.

પ્રતિકા રાવલ ટેસ્ટ મેચમાંથી બહાર

આ મહા મુકાબલા પહેલા યોજાયેલી સત્તાવાર પ્રેસ કોન્ફરન્સ દરમિયાન ભારતીય મહિલા ટીમના મુખ્ય કોચ અમોલ મજુમદારે એક મોટું અપડેટ શેર કર્યું છે. ટીમની સ્ટાર ખેલાડી પ્રતિકા રાવલ આ ઐતિહાસિક ટેસ્ટ મેચમાંથી સંપૂર્ણપણે બહાર થઈ ગઈ છે. લોર્ડ્સના ઐતિહાસિક મેદાન પર રમવાનું સપનું તૂટવું એ પ્રતિકા અને ભારતીય ટીમ બંને માટે એક મોટો આંચકો છે. આ પરિસ્થિતિને જોતા પસંદગીકારોએ તાત્કાલિક પગલાં ભરીને અનુભવી બેટ્સમેન પ્રિયા પૂનિયાને તેના રિપ્લેસમેન્ટ તરીકે ટીમમાં સામેલ કરી છે. પ્રિયા પૂનિયા તાજેતરમાં જ ઇંગ્લેન્ડ પ્રવાસ પર ઇન્ડિયા એ ટીમનો હિસ્સો હતી.

ટેસ્ટ ક્રિકેટમાં ભારતનો દબદબો

ભારત અને ઇંગ્લેન્ડની મહિલા ટીમો વચ્ચે ટેસ્ટ ક્રિકેટનો ઇતિહાસ ઘણો રસપ્રદ રહ્યો છે. બંને દેશો વચ્ચે અત્યાર સુધીમાં કુલ 14 ટેસ્ટ મેચ રમાયા છે, જેમાં ભારતીય ટીમનો રેકોર્ડ અદભુત રહ્યો છે. આ દરમિયાન ભારતે 3 મેચોમાં જીત મેળવી છે અને માત્ર 1 મુકાબલામાં હારનો સામનો કરવો પડ્યો છે, જ્યારે 10 મેચ ડ્રોમાં પરિણમ્યા છે. બંને ટીમો વચ્ચે છેલ્લો ટેસ્ટ મેચ વર્ષ 2023 માં રમાયો હતો, જેમાં ભારતીય મહિલા ટીમે ઇંગ્લેન્ડને 347 રનના વિશાળ અંતરથી કરારી હાર આપી હતી. જોકે, જો ઇંગ્લેન્ડની ધરતીની વાત કરીએ તો ભારતે ત્યાં પોતાની છેલ્લી ટેસ્ટ જીત વર્ષ 2014 માં નોંધાવી હતી.

આ પણ વાંચોઃ ત્રીજી T20માં શું બદલાશે ભારતની પ્લેઇંગ-11? બિશ્નોઈ બહાર, પ્રિન્સ યાદવને મળી શકે ડેબ્યૂ ચાન્સ

ભારતીય ટીમ

હરમનપ્રીત કૌર (કેપ્ટન), સ્મૃતિ મંધાના (વાઇસ કેપ્ટન), શેફાલી વર્મા, જેમિમા રોડ્રિગ્સ, પ્રિયા પૂનિયા, દીપ્તિ શર્મા, રિચા ઘોષ (વિકેટકીપર), શ્રી ચરણી, યાસ્તિકા ભાટિયા (વિકેટકીપર), નંદિની શર્મા, હરલીન દેઓલ, રેણુકા ઠાકુર, ક્રાંતિ ગૌડ, સાયલી સાતઘરે અને સ્નેહ રાણા.

ઇંગ્લેન્ડની ટીમ

નેટ સિવર-બ્રન્ટ (કેપ્ટન), ટેમી બ્યુમોન્ટ, લોરેન બેલ, માયા બાઉચર, એલિસ કેપ્સી, ટિલી કોર્ટીન-કોલમેન, સોફી એક્લેસ્ટોન, લોરેન ફાઇલર, એમી જોન્સ, હીથર નાઇટ, એમ્મા લેમ્બ, ગ્રેસ પોટ્સ, એલી થ્રેલકેલ્ડ, મેડી વિલિયર્સ અને ઇસ્સી વોંગ.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ