બિઝનેસ / શું પેટ્રોલ-ડીઝલ સસ્તું થઇ જશે? સાઉદી અરબથી આવ્યા ગુડ ન્યૂઝ

Crude Oil Price : વિશ્વની સૌથી મોટી તેલ નિકાસકાર કંપની સાઉદી અરામકોએ ઓગસ્ટ મહિનાથી એશિયાના ગ્રાહકો માટે કાચા તેલના સત્તાવાર વેચાણ ભાવ (OSP)માં ઐતિહાસિક ઘટાડો કર્યો છે. આ નિર્ણયનો સીધો લાભ ભારત, ચીન સહિતના મોટા આયાતકાર દેશોને મળી શકે તેવી શક્યતા વ્યક્ત કરવામાં આવી રહી છે. અરામકોએ પોતાના સૌથી વધુ વેચાતા અરબ લાઇટ ક્રૂડનો ભાવ ઓમાન-દુબઈ બેન્ચમાર્કની સરખામણીએ પ્રતિ બેરલ 1.50 ડોલર ઓછો રાખ્યો છે. જુલાઈની સરખામણીએ આ લગભગ 11 ડોલર પ્રતિ બેરલનો મોટો ઘટાડો છે, જે છેલ્લા બે દાયકામાં સૌથી મોટો ભાવ ઘટાડો માનવામાં આવે છે.

ભારત માટે કેમ મહત્વપૂર્ણ છે?

ભારત પોતાની જરૂરિયાતનો મોટો હિસ્સો વિદેશથી કાચા તેલના આયાત દ્વારા પૂર્ણ કરે છે. તેથી આંતરરાષ્ટ્રીય બજારમાં કાચા તેલના ભાવ ઘટે ત્યારે દેશની આયાત ખર્ચમાં રાહત મળે છે. જો વૈશ્વિક બજારમાં કાચા તેલના ભાવ લાંબા સમય સુધી નીચા રહે, તો પેટ્રોલ, ડીઝલ અને એલપીજીના ભાવ પર પણ સકારાત્મક અસર જોવા મળી શકે છે. નિષ્ણાતોના જણાવ્યા મુજબ, કાચા તેલના ભાવમાં વધારો ઓઈલ માર્કેટિંગ કંપનીઓના ખર્ચમાં વધારો કરે છે, જ્યારે ભાવ ઘટે ત્યારે તેમને રાહત મળે છે. તેથી ભવિષ્યમાં ગ્રાહકોને પણ તેનો લાભ મળી શકે છે.

અરામકોએ આ નિર્ણય કેમ લીધો?

બજાર વિશ્લેષકોના મતે અમેરિકા અને ઈરાન વચ્ચે યુદ્ધવિરામ પછી વૈશ્વિક બજારમાં કાચા તેલનો પુરવઠો વધવાની શક્યતા ઉભી થઈ છે. આવી સ્થિતિમાં સાઉદી અરામકો એશિયાઈ બજારમાં પોતાની સ્પર્ધાત્મક સ્થિતિ મજબૂત બનાવવા અને ખાસ કરીને ભારત તથા ચીનમાં ગુમાવેલો બજાર હિસ્સો ફરી મેળવવા માંગે છે. તેથી કંપનીએ મોટા પ્રમાણમાં ભાવ ઘટાડવાનો નિર્ણય લીધો છે.

ચીનને ફરી આકર્ષવાનો પ્રયાસ

ચીન વિશ્વનો સૌથી મોટો કાચા તેલનો આયાતકાર દેશ છે અને અરામકો માટે સૌથી મોટું બજાર પણ છે. છેલ્લા કેટલાક મહિનામાં ચીનમાં સાઉદી અરેબિયાનો બજાર હિસ્સો ઘટ્યો હતો. હવે ભાવમાં ઘટાડા બાદ ચીનની રિફાઇનરીઓ ફરીથી સાઉદી અરેબિયાથી વધુ પ્રમાણમાં કાચું તેલ ખરીદે તેવી આશા વ્યક્ત કરવામાં આવી રહી છે.

સ્પર્ધા હજુ પણ કઠિન

જોકે અરામકોએ ભાવમાં મોટો ઘટાડો કર્યો છે, છતાં એશિયાઈ બજારમાં સ્પર્ધા સરળ નથી. યુએઈ, ઈરાક અને કુવૈત જેવા દેશો પણ પોતાના કાચા તેલ પર આકર્ષક ડિસ્કાઉન્ટ આપી રહ્યા છે. પરિણામે ખરીદદારો પાસે અનેક વિકલ્પો ઉપલબ્ધ છે અને સ્પર્ધા વધુ તીવ્ર બની શકે છે.

આ પણ વાંચો : PF ઓછો કપાવવો કે વધારે? નવા નિયમે વધાર્યું ટેન્શન, સમજો ગણિત

નિષ્ણાતોના મત મુજબ હાલમાં સમગ્ર બજાર હોર્મુઝ સ્ટ્રેટમાં સ્થિતિ સામાન્ય રહે છે કે નહીં તેના પર નિર્ભર છે. જો આ મહત્વપૂર્ણ દરિયાઈ માર્ગમાં કોઈ અવરોધ ઊભો થાય તો કાચા તેલના ભાવ ફરી વધી શકે છે. પરંતુ જો પુરવઠો સતત સામાન્ય રહે તો વૈશ્વિક બજારમાં ભાવ ઘટાડાની સ્પર્ધા વધુ તેજ બનવાની શક્યતા છે. ભારત માટે હાલની સ્થિતિ આશાજનક માનવામાં આવી રહી છે. જો આંતરરાષ્ટ્રીય બજારમાં કાચા તેલના ભાવ સ્થિર અને નીચા રહે, તો આવનારા સમયમાં પેટ્રોલ, ડીઝલ અને એલપીજીના ભાવમાં પણ રાહત મળવાની સંભાવના નકારી શકાય નહીં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ