બિઝનેસ / ડુંગળી, તેલ, ખાંડ અને દાળ... અચાનક કેમ વધી મોંઘવારી? રસોડાનું બજેટ ખોરવાયું

Sugar price hike: છેલ્લા મહિનાથી મોંઘવારી વધી રહી છે. ખાંડ, ખાદ્ય તેલ, ડુંગળી અને અન્ય ચીજવસ્તુઓના ભાવમાં વધારો જોવા મળ્યો છે. ખાસ કરીને ખાંડના ભાવમાં એક અઠવાડિયામાં રૂપિયા 7નો વધારો થયો છે. તેમજ ડુંગળીના ભાવમાં ₹4 થી ₹5 પ્રતિ કિલોનો વધારો થયો છે.

છેલ્લા અઠવાડિયામાં દેશભરમાં ખાદ્યપદાર્થોના ભાવમાં વધારો થયો હોવાથી રસોડાના બજેટમાં વધારો થવાનો છે. ખાંડની સાથે ડુંગળી, ટામેટાં અને તેલના ભાવમાં પણ વધારો થયો છે. કઠોળના ભાવમાં પણ વધારો થયો છે અને વધુ વધારો થવાનું અનુમાન લગાવવામાં આવે છે.

સરકારે આ રસોડાની વસ્તુઓના ભાવને નિયંત્રિત કરવા માટે પગલાં લીધા છે, પરંતુ ફુગાવા અંગે ચિંતાઓ યથાવત છે. છેલ્લા અઠવાડિયામાં ખાંડના ભાવમાં ₹7નો વધારો થયો છે, અને એક મહિનામાં ₹17 પ્રતિ કિલોનો વધારો થયો છે, જેના પરિણામે ખાંડ હવે ₹70 પ્રતિ કિલો વેચાઈ રહી છે.

ખાંડના ભાવ ઘટાડવા માટે સરકાર શું કરી રહી છે?

ખાંડના ભાવને નિયંત્રિત કરવા માટે સરકાર ત્રણ સ્તરો પર કામ કરી રહી છે. બજારમાં પુરવઠો વધારવા માટે તેણે 31 ઓક્ટોબર સુધી ડ્યુટી ફ્રી 10 લાખ ટનની આયાતને મંજૂરી આપી છે. વધુમાં સંગ્રહખોરી અટકાવવા માટે સ્ટોક મર્યાદા નક્કી કરવામાં આવી છે. ત્રીજું, સ્થાનિક ઉત્પાદન વધારવા માટે સુગર મિલોને 15 ઓક્ટોબરથી વહેલા પીલાણ શરૂ કરવાનું કહેવામાં આવ્યું છે, જેથી નવા પાકના આગમન પછી તહેવારો માટે પૂરતી ખાંડ ઉપલબ્ધ રહે.

ખાંડના ભાવ કેમ વધી રહ્યા છે?

ટીકાકારો કહે છે કે ખાંડના ભાવમાં વધારો ઇથેનોલને કારણે છે, પરંતુ સરકારે સ્પષ્ટપણે આ વાતનો ઇનકાર કર્યો છે. સરકાર કહે છે કે ખાંડના ભાવમાં વધારો સંગ્રહખોરીને કારણે લાગે છે. કેટલીક મિલો અને વેપારીઓએ ખાંડના સંગ્રહખોરી અંગે આશંકા વ્યક્ત કરી છે. આને રોકવા માટે સરકારે 30 નવેમ્બર સુધી વેપારીઓ માટે 400 ટનની સ્ટોક મર્યાદા લાદી છે.

ડુંગળીના ભાવ કેમ વધ્યા?

સરકારી આંકડા અનુસાર 21 ઓગસ્ટના સરેરાશ છૂટક ભાવ ₹40.79/કિલો હતો. એક અઠવાડિયા પહેલા તે ₹36.56 હતો અને એક મહિના પહેલા તે ₹34.87 હતો. આનો અર્થ એ થયો કે ડુંગળીના ભાવમાં પ્રતિ કિલો ₹4 થી 5નો વધારો થયો છે. કેટલીક જગ્યાએ ભાવમાં 25 ટકા સુધીનો વધારો થયો છે. ભાવમાં આ વધારાનું મુખ્ય કારણ નવા ખરીફ ડુંગળી પાકના આગમનમાં વિલંબ છે.

દક્ષિણ ભારતમાંથી ખરીફ ડુંગળીનું આગમન મોડું થયું છે, અને મહારાષ્ટ્રના નાસિક ક્ષેત્રમાં ચોમાસામાં વિલંબને કારણે ખરીફ ડુંગળીના વાવેતર પર પણ અસર પડી છે. જોકે ભાવને નિયંત્રિત કરવા માટે સરકાર તેના બફર સ્ટોકમાંથી ડુંગળી વેચી રહી છે.

દાળના ભાવ કેમ વધી રહ્યા છે?

છેલ્લા મહિનામાં તુવેર, મગ, અડદ અને ચણા જેવી દાળના ભાવ ₹1 થી ₹2 નો વધારો થયો છે. આ ભાવ વધારા પાછળ ચોમાસું કારણભૂત હોવાનું માનવામાં આવે છે. આંકડા અનુસાર આ વર્ષે કઠોળના વાવેતર હેઠળનો વિસ્તાર ગયા વર્ષ કરતા 35,000 હેક્ટર ઓછો છે. તુવેરના વાવેતર હેઠળનો વિસ્તાર 1.69 લાખ હેક્ટર ઓછો છે. આવી સ્થિતિમાં નબળા ચોમાસાની શક્યતા દાળના ભાવમાં વધુ વધારો કરી શકે છે.

તેલના ભાવ પર અસર

આંતરરાષ્ટ્રીય બજારમાં પામ તેલના ભાવમાં તીવ્ર વધારો જોવા મળ્યો છે, જે 20 મહિનાની ટોચે પહોંચ્યો છે. ઇન્ડોનેશિયા પામ તેલનો સૌથી મોટો ઉત્પાદક દેશ છે, અને ત્યાં દુષ્કાળની સ્થિતિને કારણે પામ તેલના ભાવમાં વધારો થયો છે. પામ તેલ સૌથી વધુ ઉપયોગમાં લેવાતું ખાદ્ય તેલ છે. ભારત આ તેલની આયાત કરે છે, અને હાલમાં આયાતમાં ઘટાડો થવાને કારણે તેના ભાવ વધી રહ્યા છે.

આ પણ વાંચોઃ IPO / આગામી અઠવાડિયે IPOનો થશે વરસાદ, નવી 9 કંપનીઓ લિસ્ટ થવા માટે તૈયાર

આ ઉપરાંત સૂર્યમુખી તેલની આયાત પણ ઘટી રહી છે, કારણ કે રશિયા અને યુક્રેન વચ્ચેના યુદ્ધથી ભારતના રિફાઇન્ડ તેલની આયાત પર અસર પડી છે. આ સિવાય વૈશ્વિક બજારમાં ખાદ્ય તેલના ભાવમાં વધારો થયો છે. છેલ્લા મહિનામાં ખાદ્ય તેલના ભાવમાં 2 થી 3 ટકાનો વધારો થયો છે. સરસવના તેલ અને અન્ય ખાદ્ય તેલના ભાવમાં પણ ઉછાળો જોવા મળ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ