ગુજરાત / ગુજરાતમાં ફરી સક્રિય થઈ ત્રણ હવામાન સિસ્ટમ, અમદાવાદમાં શનિ-રવિ મેઘમહેરની આશા

ગુજરાતમાંથી વરસાદી માહોલ એકાએક નબળો પડતાં અમદાવાદ સહિત રાજ્યમાં ફરી બફારો અને ઉકળાટ અનુભવાઈ રહ્યો છે.

જોકે આગામી દિવસોમાં વરસાદી માહોલ ફરી સક્રિય થવાની શક્યતા છે. હવામાન વિભાગના જણાવ્યા મુજબ લો પ્રેશર, મોન્સૂન ટ્રફ અને સાઈક્લોનિક સર્ક્યુલેશન સહિતની સિસ્ટમની અસરથી 27 ઓગસ્ટ સુધી ગુજરાતમાં છુટાછવાયાં સ્થળોએ હળવાથી મધ્યમ વરસાદનાં ઝાપટાં પડી શકે છે. જોકે હાલ ભારે વરસાદની કોઈ ચેતવણી આપવામાં આવી નથી.

છુટાછવાયા વિસ્તારોમાં હળવાં વરસાદી ઝાપટાં પડવાની શક્યતા

અમદાવાદમાં આજે વાદળછાયું વાતાવરણ રહેવાની સાથે છુટાછવાયા વિસ્તારોમાં હળવાં વરસાદી ઝાપટાં પડવાની શક્યતા છે. આગામી દિવસોમાં પણ શહેરમાં વાદળછાયા વાતાવરણ વચ્ચે હળવાથી મધ્યમ વરસાદનાં ઝાપટાંનો માહોલ યથાવત્ રહી શકે છે. ૨૨થી ૨૬ ઓગસ્ટ દરમિયાન અમદાવાદ સહિત મધ્ય ગુજરાતમાં છુટાછવાયાં સ્થળોએ હળવાથી મધ્યમ વરસાદની શક્યતા છે. આ સમયગાળા દરમિયાન રાજ્ય માટે ભારે વરસાદની કોઈ ચેતવણી નથી.

આ પણ વાંચો : નિદાન વિના સામાન્ય વાયરલ તાવમાં બિનજરૂરી એન્ટીબાયોટિક્સ આપવાનું ટાળો, ડૉ. હર્ષ તોષનીવાલની સલાહ

29 થી 30 ઓગસ્ટ દરમિયાન ફરી વરસાદની તીવ્રતા વધશે

નેશનલ સેન્ટર ફોર મીડિયમ રેન્જ વેધર ફોરકાસ્ટિંગના વિવિધ મોડલ્સ મુજબ ૨૭થી ૩૦ ઓગસ્ટ દરમિયાન અમદાવાદ, વડોદરા અને આણંદ સહિત મધ્ય ગુજરાત ઉપરાંત ઉત્તર ગુજરાત, દક્ષિણ ગુજરાત, સૌરાષ્ટ્ર અને કચ્છમાં છુટાછવાયાં સ્થળોએ હળવોથી મધ્યમ વરસાદ થઈ શકે છે. કેટલાક વિસ્તારોમાં પવન સાથે ભારે વરસાદનાં ઝાપટાં પણ પડી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ