બિઝનેસ / US-ઈરાન જંગ વચ્ચે હચમચ્યું શેર બજાર, મિનિટમાં રોકાણકારોના કરોડો સ્વાહા

મંગળવારે ભારતીય શેરબજારમાં ભારે ઘટાડો જોવા મળ્યો હતો, જેમાં સેન્સેક્સ અને નિફ્ટી બંને સૂચકાંકોમાં દબાણ નોંધાયું. અમેરિકા-ઈરાન વચ્ચે વધતા તણાવ, કાચા તેલના ભાવમાં ઉછાળો અને વિદેશી રોકાણકારોની સતત વેચવાલીએ બજારની ગતિને અસર કરી છે. શરૂઆતના મિનિટોમાં જ રોકાણકારોના લાખો કરોડ રૂપિયા ડૂબી ગયા હતા. સમગ્ર બજાર માહોલમાં ભારે અનિશ્ચિતતા જોવા મળી હતી.

સેન્સેક્સ-નિફ્ટીમાં મોટો ઘટાડો

સવારે બજાર ખુલતા જ સેન્સેક્સ 452થી વધુ અંક ઘટીને 73,815ની આસપાસ પહોંચ્યો હતો. બીજી તરફ નિફ્ટી 153 અંક તૂટીને 23,229ની સપાટીએ આવી ગયો હતો. આ ઘટાડાની સીધી અસર રોકાણકારોની સંપત્તિ પર પડી હતી. બજાર ખુલ્યાના માત્ર એક મિનિટમાં જ રોકાણકારોના અંદાજે 3.75 લાખ કરોડ રૂપિયા ડૂબી ગયા હતા.

કયા શેરોમાં સૌથી વધુ ઘટાડો?

નિફ્ટી 50માં સૌથી વધુ નુકસાન બજાજ ફાઇનાન્સના શેરને થયું, જેમાં લગભગ 3 ટકાનો ઘટાડો નોંધાયો હતો. ઉપરાંત

• ભારત ઇલેક્ટ્રોનિક્સ (BEL)
• બજાજ ફિનસર્વ
• ટ્રેન્ટ
• NTPC
• પાવર ગ્રિડ
• અલ્ટ્રાટેક સિમેન્ટ
• L&T

જેવા શેરોમાં 1થી 2 ટકાનો ઘટાડો જોવા મળ્યો હતો.

IT શેરોએ બતાવી મજબૂતી

બજારમાં એકંદરે નબળાઈ હોવા છતાં IT સેક્ટરે સારું પ્રદર્શન કર્યું હતું.

• ઇન્ફોસિસ
• TCS
• ટેક મહિન્દ્રા
• HCL ટેક

ના શેરોમાં 1થી 3 ટકાનો ઉછાળો જોવા મળ્યો હતો. નિફ્ટી IT ઈન્ડેક્સમાં લગભગ 2 ટકાની વૃદ્ધિ નોંધાઈ હતી.

સ્મોલકેપ અને મિડકેપ શેરો પણ તૂટ્યા

બ્રોડર માર્કેટમાં પણ દબાણ જોવા મળ્યું હતું.

નિફ્ટી સ્મોલકેપ 100માં લગભગ 1% ઘટાડો

નિફ્ટી મિડકેપ 100માં પણ લગભગ 1% ઘટાડો

જ્યારે ઓટો, રિયલ્ટી અને કન્ઝ્યુમર ડ્યુરેબલ્સ જેવા સેક્ટરમાં 1 ટકાથી વધુનો ઘટાડો જોવા મળ્યો હતો. NSE પર 887 શેરોમાં તેજી રહી હતી જ્યારે 1,650 શેરોમાં ઘટાડો નોંધાયો હતો.

આ પણ વાંચોઃ 25 નહીં, હવે માત્ર 15 % ટેરિફ, ટ્રમ્પે ઓચિંતો ટેરિફ ઘટાડતા આ સેક્ટર્સની બલ્લે-બલ્લે

ભારત હવે વિશ્વનું 7મું સૌથી મોટું બજાર

તાજેતરમાં દક્ષિણ કોરિયાના KOSPI માર્કેટે માર્કેટ કેપિટલાઇઝેશનના મામલે ભારતને પાછળ છોડી દીધું છે. જેના કારણે ભારત હવે વિશ્વનું 7મું સૌથી મોટું શેરબજાર બની ગયું છે. થોડા સમય પહેલાં ભારત 5મા ક્રમે હતું, પરંતુ પહેલા તાઈવાન અને હવે દક્ષિણ કોરિયાએ ભારતને પાછળ છોડી દીધું છે.

ઈરાન-અમેરિકા તણાવથી બજાર પર અસર

મધ્ય પૂર્વમાં ફરી એકવાર તણાવ વધી રહ્યો છે. અમેરિકા અને ઈરાન વચ્ચે હુમલાઓની ઘટનાઓ તેમજ ઇઝરાયલ અને હિઝબુલ્લાહ વચ્ચેના સંઘર્ષે વૈશ્વિક બજારોમાં અનિશ્ચિતતા વધારી છે. અમેરિકાના રાષ્ટ્રપતિ ડોનાલ્ડ ટ્રમ્પે જણાવ્યું હતું કે તેમણે ઇઝરાયલના વડાપ્રધાન બેન્જામિન નેતન્યાહુને લેબનોનની રાજધાની બેરુત પર મોટો હુમલો ન કરવા સમજાવ્યા હતા. જોકે, વિસ્તારમાં તણાવ હજુ યથાવત હોવાથી રોકાણકારો સાવચેત બન્યા છે.

કાચા તેલના ભાવમાં તેજી

મધ્ય પૂર્વમાં વધતા તણાવના કારણે કાચા તેલના ભાવમાં પણ મોટો ઉછાળો આવ્યો છે.

• બ્રેન્ટ ક્રૂડ લગભગ 95 ડોલર પ્રતિ બેરલ સુધી પહોંચ્યું
• WTI ક્રૂડ લગભગ 92 ડોલર પ્રતિ બેરલની નજીક પહોંચ્યું
• વિશેષજ્ઞોનું માનવું છે કે જો હોર્મુઝ જળમાર્ગમાં અવરોધ ઊભો થશે તો વૈશ્વિક તેલ પુરવઠા પર મોટી અસર પડી શકે છે. વિશ્વના લગભગ 20% તેલ અને ગેસનું પરિવહન આ માર્ગથી થાય છે.

વિદેશી રોકાણકારો ભારતીય બજારમાં સતત વેચવાલી કરી રહ્યા છે.

સોમવારે FIIએ આશરે 3,912 કરોડ રૂપિયાના શેર વેચ્યા

29 મેના રોજ એક જ દિવસે 22,102 કરોડ રૂપિયાની વેચવાલી થઈ હતી.વર્ષ 2026 દરમિયાન અત્યાર સુધીમાં વિદેશી રોકાણકારોએ ભારતીય શેરબજારમાંથી અંદાજે 2.47 લાખ કરોડ રૂપિયા ઉપાડી લીધા છે.

નિષ્ણાતો શું કહે છે?

અમેરિકાના, દક્ષિણ કોરિયા અને તાઈવાનના બજારો નવા રેકોર્ડ બનાવી રહ્યા છે, જ્યારે ભારતમાં વિદેશી રોકાણકારોની વેચવાલી ચાલુ છે. તેમણે વધુમાં કહ્યું કે ઊર્જા સંકટને કારણે ભારતના GDP વૃદ્ધિના અંદાજમાં ઘટાડો કરવામાં આવ્યો છે અને મોંઘવારી વધવાની શક્યતા છે. ઉપરાંત હવામાન વિભાગ (IMD) દ્વારા સામાન્ય સરેરાશ કરતાં માત્ર 90% વરસાદની આગાહી કરવામાં આવી છે, જેનાથી કૃષિ, અર્થતંત્ર અને મોંઘવારી પર નકારાત્મક અસર પડી શકે છે.

બજારમાં ઘટાડાના મુખ્ય કારણો

• ઈરાન-અમેરિકા વચ્ચે વધતો તણાવ
• મધ્ય પૂર્વમાં યુદ્ધ જેવી સ્થિતિ
• કાચા તેલના ભાવમાં ઉછાળો
• વિદેશી રોકાણકારોની સતત વેચવાલી
• GDP વૃદ્ધિ અંગે ચિંતા
• નબળા ચોમાસાની આગાહી

આ તમામ પરિબળોને કારણે ભારતીય શેરબજારમાં ભારે દબાણ જોવા મળી રહ્યું છે અને રોકાણકારો હાલ સાવચેતીપૂર્વક રોકાણ કરી રહ્યા છે.

DISCLAIMER બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, vtvgujarati.com કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ