કાર્યવાહી / અમદાવાદમાં TRB જવાન સાથે મારઝૂડ કરનાર રિક્ષાચાલકની ધરપકડ, વિક્ટોરિયા ગાર્ડન પાસે બબાલ

વિક્ટોરિયા ગાર્ડન પાસે સિગ્નલ બંધ હોવા છતાં પુરઝડપે રિક્ષા દોડાવી રહેલા ચાલકને રોકવાનો પ્રયાસ કરતાં બબાલ સર્જાઈ હતી. રિક્ષા ટીઆરબી જવાન સાથે અથડાતાં કાચ તૂટી ગયો હતો. ત્યાર બાદ રિક્ષાચાલકે ટીઆરબી જવાન સાથે મારઝૂડ કરી પોલીસકર્મીને ધક્કો મારી નીચે પાડી દીધો હતો. આ મામલે ઈ- ટ્રાફિક પોલીસે ગુનો નોંધી રિક્ષાચાલકની ધરપકડ કરી છે.

ટીઆરબી જવાન વિક્ટોરિયા બીટમાં ફરજ પર

ઈ- ટ્રાફિક પોલીસ સ્ટેશનમાં રાહુલ પટણી ટીઆરબી જવાન તરીકે ફરજ બજાવે છે અને હાલમાં વિક્ટોરિયા બીટમાં ફરજ પર છે. સોમવારે બપોરે તેઓ સિટી સિવિલ એન્ડ સેશન્સ કોર્ટના પાછળના ગેટ પાસે અન્ય જવાન સાથે ફરજ પર હતા તે દરમિયાન રાયખડ ચાર રસ્તા તરફથી એક રિક્ષા સિગ્નલ બંધ હોવા છતાં પુરઝડપે જુમ્મા મસ્જિદ તરફ જઈ રહી હતી.

રિક્ષા જવાનના હાથ સાથે અથડાઈ

રાહુલ પટણીએ રિક્ષાને રોકવાનો પ્રયાસ કરતાં ચાલકે રિક્ષા ઊભી રાખી નહોતી અને રિક્ષા જવાનના હાથ સાથે અથડાઈ હતી. અથડામણમાં રિક્ષાનો કાચ તૂટી ગયો હતો. ત્યાર બાદ ચાલકે મને હાથ કેમ કર્યો? કહી રાહુલ સાથે બોલાચાલી શરૂ કરી અને માર મારવા લાગ્યો હતો. આ દરમિયાન અન્ય પોલીસકર્મી વચ્ચે પડતાં ચાલકે મનોજભાઈ નામના પોલીસકર્મીને ધક્કો મારી નીચે પાડી દીધા હતા.

આ પણ વાંચોઃ લાઠીના દૂધાળામાં ‘ગુજરાત ગૌરવ સરોવર’નું 27 ઓગસ્ટે લોકાર્પણ! અમિત શાહ કરશે ઉદ્ઘાટન, ડ્રોન નજારો મનમોહક

રિક્ષાચાલકને પકડી પોલીસ સ્ટેશન લઈ ગયા

જેથી અન્ય જવાનોએ તાત્કાલિક દરમિયાનગીરી કરી રિક્ષાચાલકને પકડી પોલીસ સ્ટેશન લઈ ગયા હતા. પૂછપરછમાં તેનું નામ જિગર સોલંકી અને તે બહેરામપુરામાં રહેતો હોવાનું સામે આવ્યું હતું. ઈ-ટ્રાફિક પોલીસે સરકારી ફરજમાં અડચણ સહિતની કલમો હેઠળ ગુનો નોંધી જિગરની ધરપકડ કરી વધુ તપાસ શરૂ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ