સ્પોર્ટ્સ / એશિયન ગેમ્સમાં ભારતે જીત્યો પ્રથમ ગોલ્ડ, વુમન્સ ક્રિકેટ ટીમે રચ્યો ઈતિહાસ

એશિયન ગેમ્સ 2026માં ભારતીય મહિલા ક્રિકેટ ટીમે શ્રીલંકાને 147 રનથી હરાવીને ગોલ્ડ મેડલ જીત્યો છે. આ સાથે ભારતે એશિયન ગેમ્સમાં પ્રથમ ગોલ્ડ મેડલનું ખાતું ખોલ્યું અને સતત બીજી વખત સુવર્ણ પદક જીતીને ઈતિહાસ રચ્યો.ભારતીય મહિલા ક્રિકેટ ટીમે એશિયન ગેમ્સ 2026માં શાનદાર પ્રદર્શન કરીને ગોલ્ડ મેડલ પોતાના નામે કર્યો છે. ફાઇનલમાં શ્રીલંકાને હરાવી ભારતે સતત બીજી વખત એશિયન ગેમ્સમાં મહિલા ક્રિકેટનું સુવર્ણ પદક જીત્યું છે.

ભારતે શ્રીલંકાને 147 રનથી હરાવ્યું

મંગળવારે (22 સપ્ટેમ્બર) જાપાનના નિશિન સ્થિત કોરોગી સ્પોર્ટ્સ પાર્કમાં રમાયેલી ગોલ્ડ મેડલ મેચમાં ભારતે પ્રથમ બેટિંગ કરતાં 20 ઓવરમાં 3 વિકેટે 216 રન બનાવ્યા હતા. જવાબમાં શ્રીલંકાની ટીમ 15.4 ઓવરમાં માત્ર 69 રનમાં ઓલઆઉટ થઈ ગઈ હતી. આ સાથે ભારતે 147 રનથી ભવ્ય જીત મેળવીને ગોલ્ડ મેડલ પર કબજો કર્યો હતો. એશિયન ગેમ્સ 2026માં ભારતનો આ પ્રથમ ગોલ્ડ મેડલ પણ બન્યો.

સ્મૃતિ મંધાનાની તોફાની ફિફ્ટી, શેફાલી અને રિચા પણ ચમક્યાં

ભારત તરફથી સ્મૃતિ મંધાનાએ શાનદાર બેટિંગ કરતાં 45 બોલમાં 79 રન ફટકાર્યા હતા. તેની ઇનિંગમાં 7 છગ્ગા અને 5 ચોગ્ગા સામેલ હતા. શેફાલી વર્માએ 29 બોલમાં 48 રન બનાવીને ટીમને મજબૂત શરૂઆત અપાવી હતી. બંને ઓપનર વચ્ચે પ્રથમ વિકેટ માટે 99 રનની ભાગીદારી થઈ હતી.ત્યારબાદ રિચા ઘોષે આક્રમક બેટિંગ કરીને માત્ર 22 બોલમાં અણનમ 49 રન બનાવ્યા હતા. તેની ઇનિંગમાં 6 ચોગ્ગા અને 3 છગ્ગા સામેલ હતા. આ ત્રણેય બેટર્સના શાનદાર પ્રદર્શનના કારણે ભારતે શ્રીલંકા સામે 217 રનનો પડકારજનક ટાર્ગેટ મૂક્યો હતો.

શ્રીલંકાની બેટિંગ પડી ભાંગી, દીપ્તિ શર્માની 3 વિકેટ

217 રનના લક્ષ્યાંકનો પીછો કરવા ઉતરેલી શ્રીલંકાની ટીમ શરૂઆતથી જ દબાણમાં આવી ગઈ હતી. ભારતીય બોલર્સે એક પછી એક વિકેટ લઈને શ્રીલંકાને મેચમાં વાપસી કરવાની તક આપી નહોતી. શ્રીલંકાની કેપ્ટન ચમારી અટાપટ્ટુએ સૌથી વધુ 21 બોલમાં 29 રન બનાવ્યા હતા. તેના સિવાય કોઈ બેટર મોટી ઇનિંગ રમી શકી નહોતી.ભારત તરફથી દીપ્તિ શર્માએ સૌથી વધુ 3 વિકેટ ઝડપી હતી. જ્યારે શેફાલી વર્મા, શ્રેયંકા પાટિલ અને શ્રી ચરણીએ 2-2 વિકેટ મેળવી હતી. શ્રીલંકાની આખી ટીમ 69 રનમાં સમેટાઈ જતાં ભારતે 147 રનથી જીત મેળવી હતી. મહિલા T20 આંતરરાષ્ટ્રીય ક્રિકેટમાં રનના અંતરથી ભારતની આ સૌથી મોટી જીત બની હતી.

આ પણ વાંચોઃ 23 સપ્ટેમ્બરથી વિશ્વભરમાં બંધ થઇ જશે આ દેશની એરલાઈન, કરાયું એલાન

સતત બીજી વખત એશિયન ગેમ્સમાં ગોલ્ડ જીત્યો

ભારતીય મહિલા ક્રિકેટ ટીમે આ પહેલાં હાંગઝોઉ એશિયન ગેમ્સ 2022માં પણ ગોલ્ડ મેડલ જીત્યો હતો. તે વખતે પણ ફાઇનલમાં ભારતે શ્રીલંકાને હરાવીને સુવર્ણ પદક પોતાના નામે કર્યું હતું. 2026માં ફરી શ્રીલંકાને હરાવીને ભારતે સતત બીજી વખત એશિયન ગેમ્સમાં મહિલા ક્રિકેટનું ગોલ્ડ મેડલ જીતવાની સિદ્ધિ મેળવી છે.આ વખતે ભારતે ક્વાર્ટર ફાઇનલમાં જાપાનને 8 વિકેટે હરાવ્યું હતું. ત્યારબાદ સેમિફાઇનલમાં બાંગ્લાદેશને 114 રનથી હરાવીને ફાઇનલમાં જગ્યા બનાવી હતી. બીજી તરફ શ્રીલંકાએ ક્વાર્ટર ફાઇનલમાં મલેશિયાને 86 રનથી અને સેમિફાઇનલમાં પાકિસ્તાનને 8 વિકેટે હરાવ્યું હતું. મહિલા ક્રિકેટમાં બ્રોન્ઝ મેડલની મેચમાં પાકિસ્તાને બાંગ્લાદેશને 31 રનથી હરાવીને ત્રીજું સ્થાન મેળવ્યું હતું.

ભારત-શ્રીલંકા વચ્ચે અત્યાર સુધીના T20I રેકોર્ડ

ભારતીય મહિલા ટીમનો શ્રીલંકા સામે T20 આંતરરાષ્ટ્રીય ક્રિકેટમાં પણ દબદબો રહ્યો છે. બંને ટીમો વચ્ચે અત્યાર સુધી કુલ 33 મેચ રમાઈ છે. જેમાં ભારતે 27 મેચ જીતી છે, જ્યારે શ્રીલંકાને માત્ર 5 મેચમાં જીત મળી છે. એક મેચનું પરિણામ આવ્યું નહોતું. એશિયન ગેમ્સ 2026ની ફાઇનલમાં મળેલી જીતથી ભારતે આ રેકોર્ડમાં વધુ એક યાદગાર વિજય ઉમેર્યો છે.

ફાઇનલમાં બંને ટીમોની પ્લેઇંગ ઇલેવન

ભારતીય ટીમની પ્લેઇંગ ઇલેવનમાં સ્મૃતિ મંધાના, શેફાલી વર્મા, ગુંનાલન કમલિની, હરમનપ્રીત કૌર (કેપ્ટન), રિચા ઘોષ (વિકેટકીપર), ભારતી ફુલમાલી, દીપ્તિ શર્મા, શ્રેયંકા પાટિલ, શ્રી ચરણી, નંદની શર્મા અને ક્રાંતિ ગૌડ સામેલ હતાં.

શ્રીલંકાની પ્લેઇંગ ઇલેવનમાં ઇમેશા દુલાની, ચમારી અટાપટ્ટુ (કેપ્ટન), હસિની પરેરા, હર્ષિતા સમરવિક્રમા, કવિશા દિલહારી, હંસિમા કરુણારત્ને, કૌશાની નુથ્યાંગના (વિકેટકીપર), મિતાલી અયોધ્યા, કાવ્યા કવિંદી, ચામુદી પ્રબોધા અને સુગંધિકા કુમારી સામેલ હતાં.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ