બિઝનેસ / Hero Motorsના IPO પર લગાવશો પૈસા? 1,000 કરોડના ઈશ્યૂ પહેલાં જાણો GMPથી લઈને લિસ્ટિંગ સુધીની વાત

ઓટો પાર્ટ્સ અને પાવરટ્રેન સોલ્યુશન્સ ક્ષેત્રે અગ્રણી હીરો ગ્રૂપની કંપની 'હીરો મોટર્સ લિમિટેડ' (Hero Motors Ltd) પોતાનો ₹1,000 કરોડનો પબ્લિક ઈશ્યૂ (IPO) લઈને આવી રહી છે. આ આઈપીઓ 16 થી 18 સપ્ટેમ્બર સુધી રોકાણ માટે ખુલ્લો રહેશે. કંપનીએ આ ઈશ્યૂ માટે પ્રતિ શેર ₹79 થી ₹84 નો પ્રાઇસ બેન્ડ નક્કી કર્યો છે. અપર પ્રાઇસ બેન્ડના આધારે કંપનીનું મૂલ્યાંકન (Valuation) આશરે ₹3,815 કરોડ જેટલું આંકવામાં આવ્યું છે.

આઈપીઓની રચના અને ગ્રે માર્કેટ પ્રીમિયમ (GMP)

આ ₹1,000 કરોડના ઈશ્યૂમાં ₹600 કરોડના નવા શેર્સ (Fresh Issue) બહાર પાડવામાં આવશે, જ્યારે ₹400 કરોડનો હિસ્સો 'ઓફર ફોર સેલ' (OFS) હેઠળ મુકવામાં આવ્યો છે. ઓફર ફોર સેલમાં પ્રમોટર કંપની O P Munjal Holdings પોતાના ₹395 કરોડ અને Hero Cycles પોતાના ₹5 કરોડના શેર્સ વેચશે.

ગ્રે માર્કેટમાં આ આઈપીઓને ખૂબ જ ઉત્સાહજનક પ્રતિસાદ મળી રહ્યો છે. માર્કેટ રિપોર્ટ્સ અનુસાર, આ શેરનો જીએમપી (GMP) હાલમાં ₹24 બોલાઈ રહ્યો છે, જે અપર પ્રાઇસ બેન્ડ પર આશરે 28.57 ટકાના મજબૂત લિસ્ટિંગ ગેનનો સંકેત આપે છે.

ભેગા થયેલા ફંડનો ઉપયોગ અને કંપનીની નાણાકીય સ્થિતિ

નવા શેર દ્વારા એકત્ર કરાયેલા ફંડમાંથી કંપની આશરે ₹190 કરોડનું દેવું ચૂકવશે, જ્યારે ₹200 કરોડ ઉત્તર પ્રદેશના ગૌતમ બુદ્ધ નગર સ્થિત પ્લાન્ટમાં નવા મશીનો અને સાધનો ખરીદવા માટે ખર્ચશે. નાણાકીય વર્ષ 2025-26 માં કંપનીની કુલ આવક 9.1% વધીને ₹1,188.35 કરોડ નોંધાઈ હતી, જ્યારે તેનો ચોખ્ખો નફો 25.5% ના વધારા સાથે ₹41.17 કરોડ પર પહોંચ્યો હતો.

આ પણ વાંચોઃ BRICS સમિટમાં મોદી-જિનપિંગની મુલાકાત બાદ ચીનનું મોટું નિવેદન, કહ્યું- ‘ભારત અને ચીન પ્રતિદ્વંદ્વી નહીં, ભાગીદાર છે’!

Hero MotoCorp અને Hero Motors વચ્ચે શું તફાવત છે?

ઘણા રોકાણકારો 'હીરો' નામને કારણે ગૂંચવણ અનુભવતા હોય છે. પરંતુ આ બંને તદ્દન અલગ કંપનીઓ છે:

Hero MotoCorp: આ કંપની સામાન્ય ગ્રાહકો માટે સ્પ્લેન્ડર, એક્સટ્રીમ જેવા બાઇક અને સ્કૂટરનું ઉત્પાદન કરે છે.

Hero Motors: આ એક B2B (બિઝનેસ ટુ બિઝનેસ) ઓટો કમ્પોનન્ટ કંપની છે. આ કંપની ગ્રાહકોને સીધા વાહનો વેચતી નથી, પરંતુ BMW, Ducati અને વિવિધ ઇ-બાઇક નિર્માતા કંપનીઓને પાવરટ્રેન સિસ્ટમ, ગિયર્સ અને ઈ-બાઈક ડ્રાઈવટ્રેન પૂરા પાડે છે.

(ડિસ્ક્લેમર : શેરબજારમાં રોકાણ બજારના જોખમોને આધીન છે. રોકાણ કરતા પહેલાં નાણાકીય સલાહકારની મદદ અવશ્ય લેવી.)

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ