IND vs AFG / અભિષેકના આક્રમણ સામે અફઘાનિસ્તાન થયું 'ચારો ખાને ચિત', 22 બોલમાં ફિફ્ટી

અફઘાનિસ્તાન સામેની 3 મેચની T20 સિરીઝની શરૂઆત ભારતીય ટીમે જોરદાર અંદાજમાં કરી છે. જેમાં દિલ્હીમાં રમાયેલી પ્રથમ T20માં ભારતે અફઘાનિસ્તાનને 7 વિકેટે હરાવીને સિરીઝમાં 1-0ની લીડ મેળવી લીધી છે. જેમાં 157 રનના ટાર્ગેટનો પીછો કરતાં ટીમ ઈન્ડિયાએ માત્ર 13.4 ઓવરમાં જ મેચ પૂરી કરી દીધી.

ભારત માટે જીતનો રસ્તો અભિષેક શર્મા અને ઈશાન કિશને આસાન બનાવી દીધો હતો. આ બંનેએ શરૂઆતથી જ અફઘાનિસ્તાનના બોલરો પર એવો અટેક કર્યો કે મેચ એકતરફી બની ગઈ હતી. જેમાં અભિષેકે માત્ર 22 બોલમાં પોતાની ફિફ્ટી પૂરી કરી અને 32 બોલમાં 7 ચોગ્ગા તથા 7 છગ્ગાની મદદથી 82 રનની ઇનિંગ રમી હતી.

સંજુ સેમસન સસ્તામાં આઉટ

157 રનના ટાર્ગેટનો પીછો કરવા ઉતરેલી ભારતીય ટીમને શરૂઆતમાં જ ઝટકો લાગ્યો હતો. જેમાં સંજુ સેમસન માત્ર 10 રન બનાવીને પેવેલિયન પરત ફર્યો. જોકે ત્યારબાદ અભિષેક શર્મા અને ઈશાન કિશને મોરચો સંભાળ્યો હતો. આ બંને બેટ્સમેનોએ અફઘાન બોલિંગને સતત પ્રેશરમાં રાખી અને પાવરપ્લેમાં જ રનનો વરસાદ શરૂ કરી દીધો. જેમાં અભિષેકની તોફાની બેટિંગે ભારતીય ફેંસને ખાસ ખુશ કરી દીધા હતા.

આ પહેલાં ટોસ જીતીને ભારતે પ્રથમ બોલિંગ કરવાનો નિર્ણય લીધો હતો. ભારતીય બોલરોએ શરૂઆતથી જ અફઘાન બેટિંગને મુશ્કેલીમાં મૂકી દીધી હતી. જેમાં માત્ર 43 રનમાં અફઘાનિસ્તાનના 5 વિકેટ પડી ગયા હતા.

જોકે ત્યારબાદ અજમતુલ્લાહ ઓમરઝાઈ અને મોહમ્મદ નબીએ ટીમને મુશ્કેલીમાંથી બહાર કાઢી હતી. આ બંનેએ છઠ્ઠી વિકેટ માટે 83 રનની ભાગીદારી કરી હતી. જેમાં નબીએ 33 રન બનાવ્યા, જ્યારે ઓમરઝાઈએ અંત સુધી અણનમ રહીને 44 બોલમાં 64 રનની શાનદાર ઇનિંગ રમી હતી.

વધુ વાંચો :ટીમ ઈન્ડિયાના ખેલાડીઓની મુશ્કેલી વધશે? કોન્ટ્રાક્ટ માટે હવે માત્ર પ્રદર્શન નહીં, ફિટનેસ પણ ચકાસાશે

આ મેચમાં ભારત તરફથી અર્શદીપ સિંહ સૌથી સફળ બોલર રહ્યો. તેને 3 વિકેટ ઝડપી અફઘાનિસ્તાનની બેટિંગને મોટો સ્કોર બનાવવાથી રોકી હતી. જેમાં જસપ્રીત બુમરાહ, અક્ષર પટેલ અને વરુણ ચક્રવર્તીએ પણ એક-એક વિકેટ મેળવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ