ગુજરાત ચૂંટણી 2026 / હર્ષ સંઘવીએ પત્ની સાથે સુરતમાં કર્યું મતદાન, PM મોદીએ પોસ્ટલ બેલેટથી વોટિંગ કર્યું

Harsh Sanghvi : ગુજરાતમાં સ્થાનિક સ્વરાજ્યની ચૂંટણીનો માહોલ આજે ઉત્સાહભર્યો જોવા મળી રહ્યો છે. રાજ્યના વિવિધ વિસ્તારોમાં મતદાતાઓએ મોટી સંખ્યામાં પોતાના મતાધિકારનો ઉપયોગ કર્યો હતો. આ દરમિયાન રાજ્યના નાયબ મુખ્યમંત્રી હર્ષ સંઘવીએ સુરતના પીપલોદ વિસ્તારમાં પોતાના પરિવાર સાથે મતદાન કર્યું હતું. હર્ષ સંઘવીએ મતદાન કર્યા બાદ કહ્યું કે, મેં પણ વિકાસની ગતિને 'ગતિ' આપવા વોટિંગ કર્યું'.

મહત્વનું છે કે, મતદાન દરમિયાન લોકોમાં સારો ઉત્સાહ જોવા મળ્યો હતો, ખાસ કરીને શહેર વિસ્તારોમાં સવારે જ મતદાન કેન્દ્રો પર લાંબી કતારો જોવા મળી હતી. ગરમીના માહોલ છતાં લોકોમાં લોકશાહી પ્રત્યેની જવાબદારી સ્પષ્ટ દેખાઈ રહી હતી. રાજ્યના ગૃહ રાજ્યમંત્રી તરીકે કાર્યરત હર્ષ સંઘવીએ લોકોને અપીલ કરી કે તેઓ પોતાના મતાધિકારનો ઉપયોગ જરૂર કરે, કારણ કે આ માત્ર અધિકાર નહીં પરંતુ ફરજ પણ છે.

આ સાથે દેશના વડાપ્રધાન નરેન્દ્ર મોદીએ પણ પોસ્ટલ બેલેટ દ્વારા પોતાનો મત આપ્યો હતો. તેઓ અન્ય રાજ્યમાં ચૂંટણી કાર્યક્રમો અને ‘મન કી બાત’ જેવા મહત્વપૂર્ણ કાર્યક્રમોને કારણે ગુજરાતમાં હાજર રહી શક્યા નહોતા. બીજી તરફ કેન્દ્રીય ગૃહમંત્રી અમિત શાહના આગમનને ધ્યાનમાં રાખીને સુરક્ષા વ્યવસ્થાઓ કડક બનાવવામાં આવી હતી.

આ પણ વાંચો : PM મોદીએ પોસ્ટલ બેલેટથી કર્યું મતદાન, આ વખતે મતદાન માટે ગુજરાત ન આવ્યાં

આજે યોજાયેલી ચૂંટણીમાં રાજ્યની 15 મહાનગરપાલિકા, 84 નગરપાલિકા, 34 જિલ્લા પંચાયત અને 260 તાલુકા પંચાયત માટે મતદાન યોજાયું હતું. આ ચૂંટણીનું પરિણામ 28 એપ્રિલે જાહેર થવાનું છે. ચૂંટણી પહેલાં કેટલાક વિસ્તારોમાં રાજકીય તણાવ અને વિરોધની ઘટનાઓ પણ નોંધાઈ હતી, તો કેટલાક સ્થળોએ ઉમેદવારો બિનહરીફ જાહેર થયા હતા. નોંધનીય છે કે અનેક બેઠકો પર પહેલાથી જ જીત નિશ્ચિત થઈ ગઈ હતી, જેમાં મોટાભાગની બેઠકો સત્તારૂઢ પક્ષના ખાતામાં ગઈ હતી. કુલ મળીને ગુજરાતમાં લોકશાહીની આ પ્રક્રિયા ઉત્સાહ અને શાંતિપૂર્ણ માહોલમાં પૂર્ણ થતી નજરે પડી રહી છે, જેમાં મતદાતાઓએ પોતાની જવાબદારી નિભાવી અને લોકતંત્રને મજબૂત બનાવ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ