ગુજરાત બજેટ 2026 / સરકારી પરીક્ષાની તૈયારી કરનારા માટે ખુશખબર, 4500 નવી જગ્યાઓ ઉભી કરાશે, બજેટમાં એલાન

Gujarat Budget 2026: ગુજરાત વિધાનસભાના સત્રમાં આજે 18 ફેબ્રુઆરીએ નાણામંત્રી કનુ દેસાઈએ વર્ષ 2026-27નું રાજ્ય બજેટ રજૂ કર્યું હતું. સતત પાંચમી વખત બજેટ રજૂ કરીને તેમણે નવો રેકોર્ડ સ્થાપ્યો છે. આ વર્ષે ગુજરાતના બજેટનું કુલ કદ 4,08,053 કરોડ રાખવામાં આવ્યું છે. સાથે જ 974 કરોડની પુરાંતવાળું અંદાજપત્ર રજૂ કરવામાં આવ્યું છે, જેમાં શિક્ષણ વિભાગ માટે કુલ 63,184 કરોડની જોગવાઈ જાહેર કરવામાં આવી છે. જે અંતર્ગત સરકારી પરીક્ષાની તૈયારી કરી રહેલા લોકો માટે એક અગત્યના સમાચાર છે. બજેટમાં જાહેરાત કરવામાં આવી છે કે સરકારી નોકરીઓમાં 4500 નવી જગ્યાઓ ઊભી કરવામાં આવશે. અને જેના લીધે સરકારી પરીક્ષા આપી રહેલા તમામ લોકો માટે સરકારી નોકરીની તકો વધશે.

યુવાનો માટે રોજગારીની તકોનું નિર્માણ

ગુજરાત વિધાનસભામાં નાણાકીય વર્ષ 2026-27 માટે કુલ 4,08,053 કરોડનું રાજ્ય બજેટ રજૂ કરવામાં આવ્યું છે. આ બજેટમાં યુવાનો માટે રોજગારીના નવા અવસર ઉભા કરવા ખાસ નિર્ણયો લેવાયા છે. ગૃહ વિભાગ માટે 1,265 કરોડની જોગવાઈ સાથે તેમજ મહેસૂલી કચેરીઓ ખાતે 1546 નવી જગ્યાઓ ઊભી કરવામાં આવશે. સરકારી નોકરીમાં કુલ નવી 4500 જગ્યાઓ ઊભી કરાશે તેવી જાહેરાત કરવામાં આવી છે અને આ જાહેરાત પછી હવે આગામી સમયમાં સરકારી નોકરી ઇચહુક લોકો માટે ભરતી આવશે તેવી શક્યતાઓ છે.

નમો સેન્ટ્રલ લાયબ્રેરી

ગાંધીનગરમાં દેશની સૌથી મોટી અને આધુનિક “નમો સેન્ટ્રલ લાઇબ્રેરી” સ્થાપવા 100 કરોડની જોગવાઈ કરવામાં આવી છે. જ્યાં ડિજિટલ અભ્યાસ અને વાંચનની સુવિધાઓ ઉપલબ્ધ રહેશે. આદિજાતિ વિસ્તારોમાં ભગવાન બિરસા મુંડા લાઇબ્રેરી યોજના હેઠળ આ વર્ષે 15 તાલુકાઓમાં નવી લાઇબ્રેરી શરૂ થશે.

ગુજરાત બજેટ 2026 ની સંપૂર્ણ માહિતી માટે નીચે આપેલી લિન્ક પર ક્લિક કરો:

મહિલાઓ માટે વિવિધ શૈક્ષણિક યોજનાઓ

શૈક્ષણિક અને મહિલા સશક્તિકરણ ક્ષેત્રે પણ મહત્વપૂર્ણ યોજનાઓ જાહેર કરવામાં આવી છે. “નમો સરસ્વતી વિજ્ઞાન સાધના યોજના” માટે 250 કરોડ ફાળવી વિદ્યાર્થીઓમાં વિજ્ઞાન પ્રવાહ પ્રત્યે રસ વધારવાનો પ્રયાસ કરાયો છે. જેના પરિણામે છેલ્લા બે વર્ષમાં પ્રવેશમાં 19 ટકા વધારો નોંધાયો છે. “નમો લક્ષ્મી યોજના” માટે 1250 કરોડની જોગવાઈ સાથે ધોરણ 9 થી 12માં અભ્યાસ કરતી વિદ્યાર્થીનીઓના પ્રવેશમાં વધારો થયો છે. સાથે જ ITIમાં અભ્યાસ કરતી દિકરીઓને પ્રોત્સાહિત કરવા “નમો કૌશલ્ય લક્ષ્મી યોજના” હેઠળ 40 કરોડ ફાળવી મહિલા પ્રતિનિધિત્વ અને કૌશલ્ય વિકાસને નવી દિશા આપવામાં આવી છે.

આ પણ વાંચો: ઈલેક્ટ્રિક વાહનોમાં 5% રિબેટ, બજેટ રજૂ કર્યાં બાદ નાણા મંત્રી કનુ દેસાઈએ કરી પત્રકાર પરિષદ, જાણો શું કહ્યું

શિક્ષણ વિભાગ માટે 13 મોટી જાહેરાતો

• મિશન સ્કૂલ્સ ઓફ એક્સલન્સ અંતર્ગત પ્રાથમિક અને માધ્યમિક શાળાઓના માળખાગત સુધારણા માટે 3055 કરોડની જોગવાઇ
• નમો લક્ષ્મી યોજના માટે 1250 કરોડની જોગવાઈ
• RTEના વિદ્યાર્થીઓ માટે 827 કરોડની જોગવાઈ
• પૌષ્ટિક અલ્પાહાર યોજના માટે 598 કરોડની જોગવાઇ
• નમો સરસ્વતી વિજ્ઞાન સાધના યોજના અંતર્ગત અંદાજે 2 લાખ 50 હજાર વિદ્યાર્થીઓને સહાય 250 કરોડ રૂપિયાની જોગવાઈ
• જ્ઞાનશક્તિ રેસિડેન્‍શીયલ સ્કૂલ્સ ઓફ એકસલન્સ માટે 223 કરોડની જોગવાઈ
• એસ.ટી. નિગમની બસોમાં મુસાફરી કરતા આશરે 13 લાખ વિદ્યાર્થીઓને બસ પાસ ફી કન્સેશન યોજના માટે 223 કરોડની જોગવાઈ
• 31 હજાર 790 શાળાઓને સ્વચ્છતા સહાયમાં બમણો વધારો 135 કરોડની જોગવાઈ
• ઉચ્ચતર પ્રાથમિક શાળાઓમાં એક જ કેમ્પસમાં બાલવાટિકાથી ધોરણ 10 સુધીનું શિક્ષણ પૂરું પાડવા સંકલિત શાળાઓના નવા બાંધકામ માટે 120 કરોડની જોગવાઈ
• પ્રાથમિક શાળાના અંદાજે 52 લાખથી વધુ વિદ્યાર્થીઓને વિનામૂલ્યે પાઠ્યપુસ્તક આપવા માટે 119 કરોડની જોગવાઈ
• મુખ્યમંત્રી યુવા સ્વાવલંબન યોજના અંતર્ગત 18 લાખ વિદ્યાર્થીઓને વિનામૂલ્યે પાઠ્યપુસ્તક આપવા માટે 112 કરોડની જોગવાઈ
• મુખ્યમંત્રી જ્ઞાન સાધના મેરિટ સ્કોલરશિપ યોજના હેઠળ અંદાજે 1 લાખ વિદ્યાર્થીઓને સહાય આપવા 100 કરોડની જોગવાઈ
• ધોરણ-6થી12 માં અભ્યાસ કરતી 9.72 લાખ વિદ્યાર્થિનીઓને સેનેટરી નેપકિન માટે 47 કરોડની જોગવાઈ

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ