હવામાન અપડેટ / આંધ્રપ્રદેશમાં મુરાસુ વાવાઝોડાનું લેન્ડફોલ, 120 કિમીની ઝડપે પવન સાથે ભારે વરસાદનું એલર્ટ

Cyclone Murasu Landfall : બંગાળની ખાડીમાં સક્રિય થયેલું ગંભીર ચક્રવાતી વાવાઝોડું મુરાસુ આંધ્રપ્રદેશના દરિયાકાંઠે ત્રાટક્યું છે. ભારતીય હવામાન વિભાગ (IMD)ના જણાવ્યા અનુસાર, બુધવારે વહેલી સવારે લગભગ 1 વાગ્યાથી પ્રકાશમ જિલ્લાના ઓંગોલ નજીક વાવાઝોડાની લેન્ડફોલ પ્રક્રિયા શરૂ થઈ હતી. લેન્ડફોલ દરમિયાન વાવાઝોડાની ઝડપ 110થી 120 કિમી પ્રતિ કલાક સુધી પહોંચી હતી. તીવ્ર પવન અને ભારે વરસાદને કારણે દરિયાકાંઠાના વિસ્તારોમાં જનજીવન પ્રભાવિત થવાની આશંકા વ્યક્ત કરવામાં આવી છે.

ઓંગોલ નજીક લેન્ડફોલ, 120 કિમીની ઝડપે પવન

પશ્ચિમ-મધ્ય બંગાળની ખાડીમાં કેન્દ્રિત મુરાસુ વાવાઝોડું દક્ષિણ આંધ્રપ્રદેશના દરિયાકાંઠાની નજીક પહોંચ્યા બાદ જમીન તરફ આગળ વધ્યું હતું. હવામાન વિભાગના જણાવ્યા અનુસાર, લેન્ડફોલ દરમિયાન વાવાઝોડાના આગળના ભાગના વાદળો જમીન પર પહોંચ્યા હતા અને તેની આંખ દરિયાકાંઠાને સ્પર્શી રહી હતી. આ સ્થિતિ ઓંગોલથી લગભગ 40 કિમી દક્ષિણ-પૂર્વ, કાવલીથી 60 કિમી ઉત્તર-પૂર્વ અને બાપટલાથી 70 કિમી દક્ષિણમાં નોંધાઈ હતી. વાવાઝોડા દરમિયાન 110 કિમી પ્રતિ કલાકની ઝડપે પવન ફૂંકાયો હતો, જે કેટલાક સમયે 120 કિમી પ્રતિ કલાક સુધી પહોંચ્યો હતો. દરિયાકાંઠાના વિસ્તારોમાં સવાર સુધી ભારે પવન ચાલુ રહેવાની શક્યતા વ્યક્ત કરવામાં આવી હતી.

ભારે વરસાદ અને 1થી 1.5 મીટર ઊંચાં દરિયાઈ મોજાંનું જોખમ

મુરાસુ વાવાઝોડાના કારણે દક્ષિણ તટીય આંધ્રપ્રદેશમાં આગામી 12 કલાક દરમિયાન ભારે વરસાદની આશંકા વ્યક્ત કરવામાં આવી છે. અનેક વિસ્તારોમાં વરસાદ શરૂ થઈ જતાં સામાન્ય જનજીવન પર અસર થવા લાગી હતી. દરિયાકાંઠાના વિસ્તારોમાં 1થી 1.5 મીટર ઊંચાં તોફાની મોજાં ઉછળવાની શક્યતા છે. ભરતીના સ્તરથી ઉપર ઊઠતાં આ મોજાં બાપટલા, કૃષ્ણા અને પ્રકાશમ જિલ્લાના નીચાણવાળા વિસ્તારોમાં પાણી ભરાવાનું જોખમ ઊભું કરી શકે છે. બુધવારની સવાર સુધી આ સ્થિતિ યથાવત રહેવાની સંભાવના દર્શાવવામાં આવી હતી.

Andhra Pradesh: Severe Cyclonic Storm Murasu is currently positioned over the Westcentral Bay of Bengal, very close to the south Andhra Pradesh coast, about 20 km east-southeast of Ongole. The landfall process continues and is likely to continue for the next two hours between Nellore and Narsapur, close to Ongole, with wind speeds of 100-110 kmph gusting to 120 kmph. Heavy rainfall is likely over South Coastal Andhra Pradesh during the next 12 hours. Storm surge of about 1.0-1.5 metres above astronomical tide is also likely to inundate low-lying areas of the region: IMD

— ANI (@ANI) November 3, 2026

વૃક્ષો ધરાશાયી થવા અને વીજળીના તાર તૂટવાનું જોખમ

વાવાઝોડાની અસરને પગલે દરિયાકાંઠાના વિસ્તારોમાં વૃક્ષો ધરાશાયી થવા, વીજળીના તાર તૂટવા અને રસ્તાઓ પર અવરોધ સર્જાવાની શક્યતા છે. સ્થાનિક તંત્ર દ્વારા લોકોને સુરક્ષિત સ્થળોએ ખસેડવાની સલાહ આપવામાં આવી છે. ખેડૂતો, માછીમારો અને દરિયાકાંઠાના રહેવાસીઓને ખાસ સાવચેતી રાખવા સૂચના આપવામાં આવી છે.

#WATCH | Ongole, Andhra Pradesh: Heavy rainfall accompanied by very strong winds continues to lash the Kothapatnam Beach area in Prakasam district amid the impact of Cyclone Murasu. https://t.co/uP1MpLLRP4

— ANI (@ANI) November 3, 2026

ચેન્નાઈમાં પણ રાહત અને બચાવની તૈયારીઓ તેજ

વાવાઝોડાની અસરને ધ્યાનમાં રાખીને ગ્રેટર ચેન્નાઈ કોર્પોરેશન દ્વારા છેલ્લા બે દિવસથી સાવચેતીના પગલાં લેવામાં આવી રહ્યાં છે. કમિશનર જી.એસ. સમીરને જણાવ્યું હતું કે, મુરાસુ ગંભીર ચક્રવાતી વાવાઝોડું બન્યું હોવાથી તંત્ર દ્વારા તમામ તૈયારીઓ કરવામાં આવી છે. ઓંગોલ નજીક લેન્ડફોલ થયા બાદ ચેન્નાઈ અને તિરુવલ્લુરના કેટલાક વિસ્તારો આંધ્રપ્રદેશની નજીક હોવાથી વાવાઝોડાના બાહ્ય પ્રભાવ હેઠળ આવવાની સંભાવના છે. આથી ચેન્નાઈમાં પણ રાહત અને બચાવ કામગીરી માટે જરૂરી વ્યવસ્થાઓ તૈયાર રાખવામાં આવી રહી છે. હવામાન વિભાગ દ્વારા સતત અપડેટ આપવામાં આવી રહ્યા છે અને આંધ્રપ્રદેશના દરિયાકાંઠાના જિલ્લાઓમાં રાહત કામગીરી શરૂ કરવામાં આવી હોવાનું અહેવાલમાં જણાવાયું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ