ક્રાઈમ / અમદાવાદમાં 3 મહિલાઓએ DySPનો ફ્લેટ પચાવી પાડ્યો, ભાડે આપ્યા બાદ ખાલી જ ન કર્યો

અમદાવાદ શહેરમાં કાયદો અને વ્યવસ્થાની જવાબદારી સંભાળતા એક પોલીસ અધિકારીને જ પોતાની મિલ્કત બચાવવા માટે પોલીસ સ્ટેશનના ચક્કર કાપવાની ફરજ પડી છે. શહેરના ન્યૂ CG રોડ વિસ્તારમાં આવેલા એક ફ્લેટ મામલે DySP અશોકસિંહ ગોહિલે ત્રણ મહિલાઓ સામે લેન્ડ ગ્રેબિંગ હેઠળ ફરિયાદ નોંધાવતા સમગ્ર મામલો ચર્ચાનો વિષય બન્યો છે.

માહિતી અનુસાર, DySP અશોકસિંહ ગોહિલે માર્ચ 2020માં ન્યૂ CG રોડ નજીક આવેલો અંદાજે 95 લાખ રૂપિયાનો ફ્લેટ વેચાણ દસ્તાવેજ દ્વારા ખરીદ્યો હતો. ફ્લેટ ખરીદ્યા બાદ તેમાં રહેતી ત્રણ મહિલાઓએ પોતાની દીકરીઓની પરીક્ષા પૂર્ણ થાય ત્યાં સુધી થોડો સમય રહેવા દેવાની વિનંતી કરી હતી. માનવતાના ધોરણે ગોહિલે તેમને સમય આપ્યો હતો.

પરંતુ ત્યારબાદ કોરોના મહામારી અને લોકડાઉનનો સમય શરૂ થતાં મહિલાઓ ફ્લેટ ખાલી કરવામાં ટાળટૂળ કરતી રહી. DySP ગોહિલે અનેક વખત મૌખિક તેમજ અન્ય રીતે ફ્લેટ ખાલી કરવા રજૂઆતો કરી હોવા છતાં મહિલાઓએ મિલ્કતનો કબજો છોડ્યો ન હતો.

આખરે મામલો ગંભીર બનતા DySP ગોહિલે લેન્ડ ગ્રેબિંગ કાયદા હેઠળ કાર્યવાહી માટે અરજી કરી હતી. કલેક્ટરના આદેશ બાદ ચાંદખેડા પોલીસ સ્ટેશનમાં ત્રણ મહિલાઓ સામે ગુનો દાખલ કરવામાં આવ્યો છે.

પોલીસ સૂત્રોના જણાવ્યા મુજબ, હાલ સમગ્ર મામલાની વધુ તપાસ ACP ડી.વી. રાણાને સોંપવામાં આવી છે. તપાસ દરમિયાન મિલ્કતના દસ્તાવેજો, રહેઠાણની પરિસ્થિતિ તેમજ કબજાને લગતા તમામ પાસાઓની તપાસ કરવામાં આવશે.

આ પણ વાંચોઃ યાત્રાધામ ડાકોર મંદિરમાં મનોરથોના ભાવવધારો 2 મહિના માટે મોકૂફ રખાયો, બેઠક બાદ ટ્રસ્ટીનો નિર્ણય

આ ઘટના શહેરમાં મિલ્કત કબજાના વધતા વિવાદો અને કાયદાકીય પ્રક્રિયાઓ અંગે અનેક પ્રશ્નો ઉભા કરી રહી છે. ખાસ કરીને, એક ઉચ્ચ પોલીસ અધિકારીને જ પોતાની મિલ્કત માટે કાયદાકીય સહારો લેવો પડ્યો હોવાના કારણે મામલો વધુ ચર્ચાસ્પદ બન્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ