હલ્લાબોલ / ડ્રેનેજથી ત્રસ્ત પાટણના લોકોનો હાઈવે પર ચક્કાજામ, MLA સહિત સ્થાનિકો રસ્તા પર ઉતરતાં વાહનોની લાંબી કતારો!

પાટણ નગરપાલિકાના અણઘડ વહીવટ અને લાંબા સમયથી યથાવત ડ્રેનેજની સમસ્યાને લઈને સ્થાનિકોમાં ભારે રોષ જોવા મળ્યો હતો. વોર્ડ નંબર 11ના રહીશોએ ડ્રેનેજની સમસ્યાનું કાયમી નિરાકરણ ન આવતા પાટણ-ચાણસ્મા હાઈવે પર ચક્કાજામ કરી ઉગ્ર વિરોધ નોંધાવ્યો હતો.

સ્થાનિકોના જણાવ્યા મુજબ વિસ્તારમાં ડ્રેનેજની લાઈનો વારંવાર ઉભરાઈ જવાથી ગંદુ પાણી રસ્તાઓ પર ફરી વળે છે, જેના કારણે લોકોને ભારે હાલાકીનો સામનો કરવો પડી રહ્યો છે. અનેક વખત રજૂઆતો કરવા છતાં સમસ્યાનું યોગ્ય નિરાકરણ ન આવતા સ્થાનિકોનો આક્રોશ ચરમસીમાએ પહોંચ્યો હતો.

કોર્પોરેટર્સ અને મોટી સંખ્યામાં મહિલાઓ પણ જોડાઈ

વિરોધ પ્રદર્શનમાં વોર્ડ નંબર 11ના સ્થાનિકો ઉપરાંત કોર્પોરેટર્સ અને મોટી સંખ્યામાં મહિલાઓ પણ જોડાઈ હતી. સ્થાનિકોએ નગરપાલિકા તંત્ર સામે સૂત્રોચ્ચાર કરી ડ્રેનેજની સમસ્યાનો તાત્કાલિક ઉકેલ લાવવાની માંગ કરી હતી.

ડ્રેનેજની સમસ્યાનું કાયમી નિરાકરણ લાવવાની માંગ

આ દરમિયાન પાટણના ધારાસભ્ય કિરીટ પટેલ પણ વિરોધ પ્રદર્શનમાં જોડાયા હતા અને સ્થાનિકોની સમસ્યાને સમર્થન આપ્યું હતું. ધારાસભ્ય સહિતના આગેવાનોએ તંત્ર સમક્ષ ડ્રેનેજની સમસ્યાનું કાયમી નિરાકરણ લાવવાની માંગ કરી હતી.

વાહનવ્યવહારને ભારે અસર પહોંચી

નેશનલ હાઈવે પર સ્થાનિકો દ્વારા ચક્કાજામ કરવામાં આવતા વાહનવ્યવહારને ભારે અસર પહોંચી હતી. હાઈવે પર બંને તરફ વાહનોની લાંબી કતારો લાગી જતાં કલાકો સુધી વાહનચાલકોને મુશ્કેલીનો સામનો કરવો પડ્યો હતો.

આ પણ વાંચોઃ ડ્રગ્સ કેસમાં વોન્ટેડ કર્યાના કલાકો પહેલાં જ આધેડના ઘરે પહોંચી હતી ક્રાઈમ બ્રાંચ? CCTVમાં કાર્યવાહી કેદ થયાનો દાવો!

સ્થાનિકોએ સ્પષ્ટ ચેતવણી આપી હતી કે જો ડ્રેનેજ સહિતની પ્રાથમિક સુવિધાઓના પ્રશ્નોનો તાત્કાલિક ઉકેલ નહીં આવે તો આગામી દિવસોમાં વધુ ઉગ્ર આંદોલન કરવામાં આવશે. હવે નગરપાલિકા તંત્ર આ સમસ્યાના ઉકેલ માટે શું પગલાં ભરે છે તે જોવું રહ્યું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ