બિઝનેસ / મિડલ ઈસ્ટ યુદ્ધની અસર: હવાઈ સફર થઈ મોંઘી, એર ઈન્ડિયા અને એર ઈન્ડિયા એક્સપ્રેસે ફ્યુઅલ ચાર્જ વધાર્યો

મિડલ ઈસ્ટમાં ચાલી રહેલા સંઘર્ષ અને જિયોપોલિટિકલ તણાવની સીધી અસર હવે વૈશ્વિક ઉર્જા બજાર તેમજ એવિએશન સેક્ટર પર જોવા મળી રહી છે. વિમાનના ઈંધણ એટલે કે એવિએશન ટર્બાઈન ફ્યુઅલ (ATF) ની કિંમતોમાં થયેલા ભારે ઉછાળાને પગલે એર ઈન્ડિયા (Air India) અને એર ઈન્ડિયા એક્સપ્રેસ (Air India Express) દ્વારા ફ્યુઅલ સરચાર્જમાં વધારો કરવાની સત્તાવાર જાહેરાત કરવામાં આવી છે. અગાઉ ઈન્ડિગો દ્વારા પણ સરચાર્જ વધારવામાં આવ્યો હતો. આ નિર્ણયથી દેશી અને વિદેશી રૂટ્સ પર મુસાફરી કરતા ફ્લાયર્સના ખિસ્સા પર સીધો બોજ પડશે.

કેવી રીતે વધશે હવાઈ ભાડું?

નવા ફેરફાર મુજબ, ઈન્ડિયાના ડોમેસ્ટિક તેમજ નોર્થ અમેરિકા, ઓસ્ટ્રેલિયા, યુરોપ, યુકે, વેસ્ટ એશિયા અને મિડલ ઈસ્ટના રૂટ્સ પર ફ્યુઅલ સરચાર્જ વસૂલવામાં આવશે:

ડોમેસ્ટિક ફ્લાઈટ્સ (સ્થાનિક રૂટ્સ)

1001 km થી 1500 km સુધીના પ્રવાસ પર: 850 રૂપિયા સરચાર્જ

1501 km થી વધુ અંતરના પ્રવાસ પર: ફિક્સ્ડ 1200 રૂપિયા સરચાર્જ

ઈન્ટરનેશનલ ફ્લાઈટ્સ (આંતરરાષ્ટ્રીય રૂટ્સ):

નોર્થ અમેરિકા: 215 ડોલર

ઓસ્ટ્રેલિયા: 210 ડોલર

યુરોપ અને યુકે: 135 ડોલર

ક્યારથી લાગુ થશે આ નવા દર?

કંપનીના જણાવ્યા અનુસાર, સુધારેલો ફ્યુઅલ સરચાર્જ નવી બુકિંગ્સ પર લાગુ થશે. એર ઈન્ડિયા એક્સપ્રેસ માટે આ દરો 9 October ના રોજ 00:00 વાગ્યાથી (IST) અને એર ઈન્ડિયા માટે 9 October ના રોજ 11:00 વાગ્યાથી (IST) અમલમાં આવી જશે.

શા માટે લેવાયો આ નિર્ણય?

એરલાઈન્સ કંપનીઓના જણાવ્યા અનુસાર, કોઈપણ ફ્લાઈટના કુલ ઓપરેશનલ ખર્ચ (ઓપરેટિંગ કોસ્ટ) માં આશરે 40% હિસ્સો એકલા ઈંધણનો હોય છે. મિડલ ઈસ્ટમાં યુદ્ધના કારણે ઈંધણના પુરવઠાને અસર થઈ છે, જેનાથી ગ્લોબલ માર્કેટમાં ક્રૂડ ઓઈલ અને ATF ના ભાવ સતત વધી રહ્યા છે. સાથે જ મજબૂત થતા ડોલરના કારણે પણ એરલાઈન્સનો ખર્ચ વધ્યો છે. જો આ વધારાનો બોજ સરચાર્જ રૂપે ન વસૂલાય તો કંપનીઓને મોટું આર્થિક નુકસાન વેઠવાનો વારો આવે તેમ હતો.

આ પણ વાંચોઃ બિઝનેસ / ચીનમાં મંદી અને EV ખર્ચે વધારી મુશ્કેલી, આ કંપનીમાં 1 લાખ કર્મચારીઓની નોકરીઓમાં મુકાશે કાપ

એર ઈન્ડિયાનું નિવેદન

એર ઈન્ડિયાએ સ્પષ્ટતા કરતા જણાવ્યું છે કે, તાજેતરના મહિનાઓમાં ATF ની કિંમતોમાં ભારે ઉતાર-ચઢાવ જોવા મળ્યો છે. ઈંધણના વધેલા ભાવોને કારણે એરલાઈન્સના દૈનિક સંચાલન ખર્ચમાં નોંધપાત્ર વધારો થયો છે. વધેલી પડતર કિંમતોનો બોજ ઘટાડવા અને ગ્રાહકોને અવિરત તથા ગુણવત્તાસભર સેવાઓ પૂરી પાડવાનું ચાલુ રાખવા માટે જ ફ્યુઅલ સરચાર્જમાં આ વ્યવહારુ ફેરફાર કરવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ