મનોરંજન / 34 વર્ષની વયે આ એક્ટરની દુનિયામાંથી અલવિદા, આઘાતમાં સરી પડ્યાં ચાહકો

લોકો હજુ નાના પાટેકરના નિધનના સમાચારમાંથી માંડ બહાર આવ્યા હતા ત્યાં જ હોલીવુડમાંથી દુઃખદ સમાચાર સામે આવ્યા છે. પ્રખ્યાત ટીવી સિરીઝ 'બ્રેકિંગ બેડ' માં વોલ્ટર વ્હાઇટ જુનિયરની ભૂમિકા ભજવીને દુનિયાભરમાં ઓળખ મેળવનાર અભિનેતા આરજે મિટ્ટે (RJ Mitte)નું નિધન થયું છે. આરજે મિટ્ટે માત્ર 34 વર્ષના હતા. તેમના નિધનના સમાચારથી મનોરંજન જગત અને તેમના ચાહકોમાં શોકની લહેર ફરી વળી છે. સોમવારે ટેક્સાસના બ્રાઉન્સવિલેમાં તેમનું અવસાન થયું. તેમના ભારતીય ચાહકો આઘાતમાં છે અને વિચારી રહ્યા છે કે આટલા યુવાન અભિનેતાના અચાનક મૃત્યુનું કારણ શું હોઈ શકે.

આર.જે. મિટ્ટે માત્ર તેમની અભિનય ક્ષમતા માટે જ નહીં, પરંતુ દિવ્યાંગ વ્યક્તિઓના અધિકારોના સમર્થન માટે પણ જાણીતા હતા. તેઓ ઈચ્છતા હતા કે ફિલ્મ અને ટેલિવિઝનની દુનિયામાં દિવ્યાંગ વ્યક્તિઓને સમાન તકો મળે. તેમના નિધનની જાહેરાત કરતી વખતે, તેમની નજીકના લોકોએ તેમને એક પ્રેમાળ વ્યક્તિ, સામાજિક કાર્યકર અને દિવ્યાંગોના અધિકારો માટે અવાજ ઉઠાવનાર તરીકે વર્ણવ્યા હતા.

કેવી રીતે થયુ આરજે મિટ્ટેનું નિધન

એસોસિએટેડ પ્રેસ (AP) ના અહેવાલ મુજબ, કેમેરોન કાઉન્ટીના જસ્ટિસ ઓફ ધ પીસ સિન્ડી હિનોજોસાએ જણાવ્યું હતું કે સોમવારે સ્થાનિક સમય અનુસાર બપોરે લગભગ 1:30 વાગ્યે આર.જે. મિટ્ટે (RJ Mitte) ને મૃત જાહેર કરવામાં આવ્યા હતા. અધિકારીઓએ તે સ્થળની ઓળખ તેમના સંભવિત ઘર તરીકે કરી હતી જ્યાં તેઓ મળી આવ્યા હતા. તેમણે ઉમેર્યું હતું કે મૃત્યુનું કારણ જાણવા માટે પોસ્ટમોર્ટમ કરવામાં આવશે. તેમના પ્રતિનિધિઓએ દુઃખ વ્યક્ત કરતું નિવેદન બહાર પાડ્યું હતું.

આ નિવેદનમાં તેમને એક લોકપ્રિય અભિનેતા, પરોપકારી વ્યક્તિ અને દિવ્યાંગોના અધિકારો માટે સમર્પિત વ્યક્તિત્વ તરીકે વર્ણવવામાં આવ્યા છે. જોકે, તેમના પ્રતિનિધિઓએ મૃત્યુનું ઓફિશિયલ કારણ જાહેર કર્યું નથી. કાઉન્ટીના એક અધિકારીને ટાંકીને, અમેરિકન વેબસાઇટ TMZએ આત્મહત્યાની શક્યતા વ્યક્ત કરી છે. અહેવાલો અનુસાર, આ મામલે તપાસ ચાલી રહી છે અને મૃત્યુના કારણ અંગે ઓફિશિયલ નિવેદનની રાહ જોવાઈ રહી છે.

બ્રેકિંગ બેડમાં નિભાવ્યો હતો વોલ્ટર વ્હાઇટના દિકરાનો રોલ

RJ Mitte ને અમેરિકન ક્રાઈમ ડ્રામા સીરિઝ 'Breaking Bad' થી ખૂબ જ લોકપ્રિયતા મળી. તેમણે 2008 થી 2013 દરમિયાન પ્રસારિત થયેલી આ સીરિઝની તમામ પાંચ સીઝનમાં વોલ્ટર 'ફ્લિન' વ્હાઇટ જુનિયરની ભૂમિકા ભજવી હતી. તેઓ આ શોના કુલ 56 એપિસોડમાં જોવા મળ્યા હતા. અભિનેતા બ્રાયન ક્રેન્સ્ટને આ સીરિઝમાં તેમના પિતાની ભૂમિકા ભજવી હતી. આ વાર્તામાં, ફ્લિન એક એવું પાત્ર હતું જેણે પોતાના પરિવારની અંદરની ઉથલપાથલ વચ્ચે પણ પોતાની આગવી ઓળખ જાળવી રાખી હતી. આ ભૂમિકા માટે આરજે (RJ) ને પણ ખૂબ પ્રશંસા મળી હતી, કારણ કે વાસ્તવિક જીવનમાં પણ તે સેરેબ્રલ પાલ્સી સાથે જીવી રહ્યો હતો.

ઉંમરમાં ખબર પડી હતી બીમારી

આર.જે. મિટ્ટેનો જન્મ 21 ઓગસ્ટ, 1992ના રોજ થયો હતો. તેમનું પૂરું નામ રોય ફ્રેન્ક મિટ્ટે III હતું. માત્ર ત્રણ વર્ષની ઉંમરે તેમને 'સેરેબ્રલ પાલ્સી' નામની ન્યુરોલોજીકલ બીમારી હોવાનું નિદાન થયું હતું. આમ છતાં, તેમણે અભિનય પ્રત્યેનો તેમનો જુસ્સો ક્યારેય ઘટવા દીધો નહીં. તેઓ 2006 માં હોલીવુડ આવ્યા હતા. આ પહેલાં, 2007માં તેમણે ટીવી શો 'હેના મોન્ટાના' ના એક એપિસોડમાં નાની ભૂમિકા ભજવી હતી. 'બ્રેકિંગ બેડ' એ તેમની કારકિર્દીને એક નવી ઓળખ આપી. ત્યારબાદ, તેઓ 'સ્વિચ્ડ એટ બર્થ', 'ધ ગાર્ડિયન્સ ઓફ જસ્ટિસ' અને 'ટ્રાયમ્ફ' જેવા પ્રોજેક્ટ્સમાં જોવા મળ્યા હતા. 'બ્રેકિંગ બેડ' ઉપરાંત, તેમણે ફ્રીફોર્મ ડ્રામા 'સ્વિચ્ડ એટ બર્થ' (2014) માં વ્હીલચેરનો ઉપયોગ કરતા મેડિકલ વિદ્યાર્થી કેમ્પબેલ બિંગમેનની ભૂમિકા ભજવી હતી. આ ઉપરાંત, તેઓ નેટફ્લિક્સની એનિમેટેડ સીરિઝ ધ ગાર્ડિયન્સ ઓફ જસ્ટિસ (2022) અને ધ ઓક રૂમ (2020), ટ્રાયમ્ફ (2021) તથા ટોકિંગ ટુ સ્ટ્રેન્જર્સ (2026) જેવી ફિલ્મોનો પણ ભાગ હતા.

આ પણ વાંચોઃ "મારો હિસાબ અલ્લાહ કરશે, તમે કોણ?": લિપલોક સીન પર વિવાદ વધતા એજાઝ ખાને ટ્રોલર્સને આપ્યો જવાબ

સમાજ સેવામાં યોગદાન

અભિનય ઉપરાંત, તેઓ સમાજસેવામાં પણ સક્રિયપણે સંકળાયેલા હતા; તેમણે ‘યુનાઇટેડ સેરેબ્રલ પાલ્સી’ અને ‘શ્રાઇનર્સ ચિલ્ડ્રન્સ’ માટે બ્રાન્ડ એમ્બેસેડર તરીકે તથા ‘મિટ્ટે ફાઉન્ડેશન’ ના પ્રમુખ તરીકે સેવાઓ આપી હતી. તેમણે દિવ્યાંગ વ્યક્તિઓ વિશે જાગૃતિ લાવવા અને મનોરંજન ઉદ્યોગમાં તેમનું પ્રતિનિધિત્વ સુધારવા માટે કાર્ય કર્યું હતું. તેઓ 'યુનાઈટેડ સેરેબ્રલ પાલ્સી' અને 'શ્રાઈનર્સ ચિલ્ડ્રન્સ' સાથે પણ સંકળાયેલા હતા. તાજેતરમાં જ તેઓ ટોકિંગ ટુ સ્ટ્રેન્જર્સ ફિલ્મને કારણે ચર્ચામાં આવ્યા હતા. તેમના નિધનથી એવા કલાકાર ગુમાવ્યા છે જેમણે પોતાની આગવી ઓળખ ઊભી કરવાની સાથે સાથે દિવ્યાંગ સમુદાયના હિતો માટે પણ અવાજ ઉઠાવ્યો હતો. તેમના અચાનક અવસાનથી હોલીવુડ અને તેમના ચાહકોમાં ભારે શોકની લાગણી છવાઈ ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ