ગુલાબજાંબુનું નામ પડતાની સાથે જ તમારા મોમાં પાણી આવી ગયું ,બરાબર ને. જો કે ખાલી ખાલી નામ જ નથી લેવાનું. આજે તો તમારે ગુલાબજાંબુ બનાવીને ખાવાના પણ છે. તો નોંધી લો ઝટપટ ગુલાબજાંબુ બનાવવાની રેસિપી…
મોટાભાગે આપણે માવા કે રેડી મિક્સમાંથી જ ગુલાબજાંબુ બનાવતા હોઇએ છીએ. ઘરમાંથી આમાંનું કઈંજ ન હોય અને છતાં ગુલાબજાંબુ ખાવાની ઇચ્છા થાય તો બનાવી શકાય છે ખૂબજ ટેસ્ટી સોજીનાં ગુલાબજાંબુ.
ચાસણી બનાવવા માટે:
એક પેન લઈ તેને ગરમ થવા મુકી દો. પેન ગરમ થઈ જાય એટલે તેમાં પાણી અને ખાંડ ઉમેરો. હવે ખાંડ પાણીમાં જ્યાં સુધી ન ગળે ત્યાં સુધી તેને સતત હલાવતા રહો, જેથી ખાંડ વાસણમાં ચોંટી ન જાય. હવે વાસણને પાંચ મિનિટ માટે ઢાંકી દઈ પાણી ઉકળવા દો. ચાસણી બે ત્રણ તારની થઈ જાય એટલે ગેસ બંધ કરી તેને ઠંડી થવા દો.
બનાવવાની રીત:
એક પેનમાં એક મોટી ચમચી ઘી લઈ તેને ગરમ થવા દો. તેલ ગરમ થઈ જાય એટલે તેમાં દૂધ ઉમેરી એક ઊભરો આવે ત્યાં સુધી ગરમ થવા દો. દૂધ ગરમ થાય એટલે તેમાં સોજી ઉમેરી તેને સતત હલાવતા રહો. જેથી સોજી વાસણમાં ચોંટે નહીં અને તેમાં ગાંઠ ન રહી જાય. સોજી દૂધ શોષી લે અને માવા જેવું મિશ્રણ થઈ જાય ત્યાં સુધી સતત હલાવો.
મિશ્રણ તૈયાર થઈ જાય એટલે તેને એક પ્લેટમાં લઈ લો અને તેમાં એલચી પાઉડર ઉમેરી હાથથી મસળી લો. હવે આ મિશ્રણમાંથી નાના નાના ગોળા વાળી લો. એક પેનમાં તેલ અથવા ઘી ગરમ કરવા મુકી દો. તે ગરમ થઈ જાય એટલે તે હલકા ગોલ્ડન બ્રાઉન કલરના થાય તેવા તળી લો. તે તળાય જાય એટલે તેને ચાસણીમાં ઉમેરી 5 મિનિટ માટે રહેવા દો. ચાસણી તેમાં ચડી જાય એટલે તેને સર્વ કરો.