ગયા મહિને એક જમાનાના આઇકોનિક ગણાતા ગેજેટે તેની 40 મી વર્ષગાંઠની ઉજવણી કરી. આ વાત છે સોની કંપનીના દુનિયાભરમાં જાણીતા વોકમેનની. સોની વોકમેન અનેક લોકો માટે સ્ટેટસ સિમ્બોલ ગણાતું હતું. સોનીએ 1979 માં પ્રથમ વખત વોકમેન લોન્ચ કર્યું અને તે દુનિયાભરમાં છવાઇ ગયું હતું.
આ લોકપ્રિય ગેજેટને 40 વર્ષ પૂર્ણ થયા તે નિમિત્તે સોનીએ વોકમેનની ખાસ એડિશન રજુ કરી છે. હાલ યુરોપમાં નવુ વોકમેન લોન્ચ કરવામાં આવ્યું છે.જેની કિંમત 440 યુરો (આશરે 34,800 રૂપિયા) છે. જો કે તેમાં તમે જૂની કેસેટ સાંભળવાનો રોમાંચ માણવા મળશે તેમ માનતા હો તો નિરાશ થશો.
વોકમેનના લેટેસ્ટ મોડલ NW-A100TPS માં ઓડિયો પ્લેબેક સાથે મ્યુઝીક સ્ટ્રીમિંગનું ફિચર છે. સારી વાત એ છે કે તે જુના કેસેટ પ્લેયર વોકમેનની ડિઝાઇનવાળું સોફટકેસ આપવામાં આવ્યું છે.જે તેને એક કલાસિક લુક આપે છે. આ કેસની પાછળની બાજુએ 40 મી વર્ષગાંઠનો લોગો પણ બનાવવામાં આવ્યો છે. આ સ્પેશિયલ એડિશન વોકમેન અંગે સોની કહે છે કે એકવાર ચાર્જ કર્યા પછી 26 કલાક સુધી બેટરી ચાલે છે.
વોકમેનમાં 16 જીબી સ્ટોરેજ અને 3.6 ઇંચનું ડિસ્પ્લે છે.તેમાં હેડફોન જેક છે અને બ્લુટુથથી પણ કનેકટ થઇ શકે છે. 1980ના દાયકામાં લાઇફ સ્ટાઇલ ગેજેટસમાં વોકમેનનું નામ ટોચ પર હતું.
લગભગ વીસ વર્ષ સુધી દુનિયાભરમાં વોકમેનનો દબદબો રહ્યો.
વોકમેન એ જમાનામાં એટલું જ પોપ્યુલર હતું જેટલું 2000ના દશકામાં એપલનું આઇપોડ હતું.એવું પણ કહેવાય છે કે જો વોકમેન ન હોત તો આઇપોડ પણ ન હોત.એપલે વોકમેન પરથી પ્રેરણા લઇને જ આઇપોડ બનાવ્યું હતું. વોકમેન પણ સમય જતાં અપગ્રેડ થયું હતું. કેસેટનું સ્થાન સીડીએ લીધુ એટલે સોનીએ ડિસ્કમેન માર્કેટમાં મુકયું હતું.