ગુજરાત / સોમનાથની હોટલોમાં SGST ના અચાનક દરોડાથી ફફડાટ: ટેક્સ ચોરી મામલે 7 સંચાલકોને નોટિસ

ગુજરાતના સુપ્રસિદ્ધ યાત્રાધામ સોમનાથમાંથી એક મોટા સમાચાર સામે આવી રહ્યા છે, જ્યાં સ્ટેટ જીએસટી વિભાગ દ્વારા અચાનક જ મોટું સર્ચ ઓપરેશન હાથ ધરવામાં આવ્યું છે. સોમનાથ મંદિરની આજુબાજુ આવેલી પ્રવાસીઓની હોટલો અને ગેસ્ટ હાઉસમાં જીએસટી વિભાગની અલગ-અલગ ટીમોએ એકસાથે ત્રાટકીને સઘન ચેકિંગ પ્રક્રિયા શરૂ કરી દીધી છે, જેને પગલે સમગ્ર પંથકના હોટલ વ્યવસાયીઓમાં ભારે ફફડાટ અને દોડધામ મચી ગઈ છે.

મળતી વિગતો અનુસાર, જીએસટી વિભાગને લાંબા સમયથી સોમનાથની હોટલોમાં ટેક્સ ચોરી અને નાણાકીય ગેરરીતિ થતી હોવાની આશંકાઓ મળી રહી હતી. આ બાતમીના આધારે અધિકારીઓએ પૂર્વ આયોજિત વ્યુહરચના ઘડીને વિસ્તારની અંદાજે 40 જેટલી નાની-મોટી હોટલોમાં એકસાથે દરોડા પાડ્યા હતા. આ વ્યાપક તપાસ દરમિયાન અધિકારીઓએ હોટલોના દૈનિક હિસાબ-કિતાબના રજિસ્ટર, બુકિંગ ડેટા અને કમ્પ્યુટર સિસ્ટમની ઊંડાણપૂર્વક તપાસ કરી છે. આ ઉપરાંત હોટલના સત્તાવાર બેંક સ્ટેટમેન્ટ્સ પણ મંગાવીને તેની ચકાસણી કરવામાં આવી રહી છે જેથી સાચી આવક અને જીએસટીની ચોરી પકડી શકાય.

આ પણ વાંચોઃ ન બોલનાર લૂંટારુ ચોકલેટથી બોલ્યો! રાજવી પરિવાર લૂંટ કેસમાં ચોંકાવનારો ખુલાસો

આ પ્રાથમિક તપાસ અને દરોડાના અંતે સ્ટેટ જીએસટી વિભાગે ગંભીર બેદરકારી અને શંકાસ્પદ હિસાબો બદલ તાત્કાલિક ધોરણે 7 જેટલા હોટલ સંચાલકોને કાયદેસરની નોટિસ ફટકારી છે. જીએસટી વિભાગના ઉચ્ચ અધિકારીઓના જણાવ્યા મુજબ, સોમનાથમાં આવતા લાખો શ્રદ્ધાળુઓ દ્વારા મોટી રકમ ચૂકવવામાં આવતી હોવા છતાં નિયમ મુજબ ટેક્સ ભરવામાં આવતો નહોતો. આ ઓપરેશન અંતર્ગત જે પણ હોટલ સંચાલકો વાર્ષિક ટર્નઓવરના આધારે જીએસટીના નિયત દાયરામાં આવતા હશે, તે તમામ શંકાસ્પદ વેપારીઓને ફરજિયાતપણે જીએસટી નંબર ફાળવવામાં આવશે અને ભવિષ્યમાં નિયમિત ટેક્સ વસૂલવાની કડક પ્રક્રિયા હાથ ધરાશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ