ભેટ / વડોદરાને આજે મળશે અત્યાધુનિક 30 ઈ-બસ, સુવિધાઓ જોઈ ચકિત થઈ જશો

Vadodara PM E-Bus : વડોદરાવાસીઓ માટે જાહેર પરિવહન ક્ષેત્રે એક મહત્વપૂર્ણ અને આનંદદાયક શરૂઆત થવા જઈ રહી છે. શહેરમાં ‘PM ઈ-બસ સેવા યોજના’ અંતર્ગત આધુનિક અને પર્યાવરણમિત્ર ઇલેક્ટ્રિક બસ સેવાનો પ્રારંભ કરવામાં આવી રહ્યો છે. પ્રથમ તબક્કામાં 30 અત્યાધુનિક એસી ઈ-બસો શહેરના વિવિધ માર્ગો પર દોડતી જોવા મળશે.

આજે થશે સત્તાવાર લોકાર્પણ

રાજ્યના મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીના હસ્તે આ નવી ઈ-બસ સેવાનો સત્તાવાર પ્રારંભ કરવામાં આવશે. આ પ્રસંગે વડોદરામાં ખાસ કાર્યક્રમનું આયોજન કરવામાં આવ્યું છે, જ્યાં શહેરના પરિવહન ક્ષેત્ર માટે આ મહત્વપૂર્ણ પહેલને લીલી ઝંડી આપવામાં આવશે.

PM ઈ-બસ યોજના હેઠળ વડોદરાને મળી 250 બસોની મંજૂરી

કેન્દ્ર સરકારની PM ઈ-બસ સેવા યોજના હેઠળ વડોદરા શહેર માટે કુલ 250 ઈલેક્ટ્રિક બસોને મંજૂરી આપવામાં આવી છે. આ સમગ્ર યોજનાને તબક્કાવાર અમલમાં મૂકવામાં આવશે. પ્રથમ તબક્કામાં 30 બસો શહેરમાં આવી પહોંચી છે અને તેમનો ટ્રાયલ સફળતાપૂર્વક પૂર્ણ થયો છે. આ નવી બસો માત્ર આધુનિક સુવિધાઓથી સજ્જ નથી પરંતુ પ્રદૂષણ ઘટાડવામાં પણ મહત્વની ભૂમિકા ભજવશે. શહેરના વધતા ટ્રાફિક અને પર્યાવરણ સંબંધિત પડકારોને ધ્યાનમાં રાખીને આ યોજના મહત્વપૂર્ણ ગણાઈ રહી છે.

શહેરના મુખ્ય વિસ્તારોને મળશે સીધી કનેક્ટિવિટી

પ્રારંભિક તબક્કામાં ઈ-બસોના રૂટ પણ નક્કી કરવામાં આવ્યા છે જેથી વધુમાં વધુ લોકોને સરળ મુસાફરી મળી શકે.

• ઉત્તર–દક્ષિણ રૂટ હેઠળ બસો માણેજા, મકરપુરા, સુશેન સર્કલ, લાલબાગ, લક્ષ્મી વિલાસ પેલેસ, નર્મદા ભવન, કાલાઘોડા અને નિઝામપુરા જેવા વિસ્તારોને જોડશે.
• પૂર્વ–પશ્ચિમ રૂટમાં ગોત્રી સર્કલ, હરિનગર, ચકલી સર્કલ, કાલાઘોડા, સયાજી હોસ્પિટલ, ન્યાયમંદિર, પાણીગેટ અને સયાજીપુરા APMC વિસ્તાર સુધી સેવા આપવામાં આવશે.
• તે ઉપરાંત કનેક્ટિંગ રૂટ હેઠળ અકોટા વીરાંજલિ પ્રતિમા, શ્રેણિક પાર્ક, દિવાળીપુરા, ઈસ્કોન મંદિર, સંત કબીર સર્કલ, ભાયલી, લક્ષ્મીપુરા અને આગળ પાદરા સુધી મુસાફરોને સેવા મળશે.

મુસાફરો માટે ભાડું રહેશે સામાન્ય બજેટમાં

આ ઈ-બસોમાં મુસાફરી દરેક વર્ગના લોકો માટે સરળ અને પરવડે તેવી રહે તે માટે ભાડાનું પ્રસ્તાવિત માળખું પણ તૈયાર કરવામાં આવ્યું છે. પ્રારંભિક દરખાસ્ત મુજબ ન્યૂનતમ ભાડું ₹5 અને મહત્તમ ભાડું ₹30 રાખવાનો પ્રસ્તાવ છે. જોકે આ દરોને મ્યુનિસિપલ કોર્પોરેશનની સામાન્ય સભાની અંતિમ મંજૂરી મળ્યા બાદ સત્તાવાર રીતે અમલમાં મૂકવામાં આવશે.

આ પણ વાંચો : મેઘરાજાને મનાવવા મહિલાઓનો અનોખો પ્રયાસ, ઢૂંઢિયા મહારાજની મૂર્તિ બનાવી, ભજન ગાયાં

ઈ-બસ સેવા શરૂ થવાથી શહેરમાં જાહેર પરિવહન વધુ સુવિધાજનક બનશે અને સાથે ગ્રીન એનર્જીને પ્રોત્સાહન મળશે. પ્રદૂષણ ઘટાડવું, ટ્રાફિકનું ભારણ ઓછું કરવું અને આરામદાયક મુસાફરી પૂરી પાડવી આ યોજનાનો મુખ્ય ઉદ્દેશ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ