તમારા કામનું / 1 જુલાઈથી LPG સિલિન્ડર સસ્તો: કોમર્શિયલ ગેસના ભાવમાં ઘટાડો, જાણો ઘરેલુ ગ્રાહકોને કેટલી રાહત?

LPG Price Cut : 1 જુલાઈથી LPG વપરાશકારો માટે મહત્વપૂર્ણ ભાવ સુધારાની જાહેરાત કરવામાં આવી છે. ઓઇલ માર્કેટિંગ કંપનીઓએ 19 કિલોના કોમર્શિયલ LPG સિલિન્ડરના ભાવમાં પ્રતિ સિલિન્ડર ₹183.50નો ઘટાડો જાહેર કર્યો છે. વર્ષ 2026 દરમિયાન પ્રથમ વખત કોમર્શિયલ ગેસના ભાવમાં આ પ્રકારની નોંધપાત્ર રાહત આપવામાં આવી છે, જે ખાસ કરીને હોટેલ, રેસ્ટોરન્ટ, કેટરિંગ અને વ્યાપારી ઉપયોગ કરનાર વર્ગ માટે રાહતરૂપ માનવામાં આવી રહી છે.

જો કે, ઘરેલુ ગ્રાહકો માટે હાલ કોઈ નવી રાહત જાહેર કરવામાં આવી નથી. 14.2 કિલોના ઘરેલુ LPG સિલિન્ડરના ભાવ યથાવત રાખવામાં આવ્યા છે અને દિલ્હીમાં તેની કિંમત હજુ પણ ₹942 પર સ્થિર છે. એટલે કે સામાન્ય પરિવારોના માસિક બજેટ પર હાલ કોઈ સીધી અસર જોવા મળવાની નથી.

1 જુલાઈ 2026થી વિવિધ શહેરોમાં LPGના નવા દર

1 જુલાઈ 2026થી જાહેર થયેલા નવા LPG દર મુજબ દિલ્હીમાં 14.2 કિલો ઘરેલુ સિલિન્ડરની કિંમત ₹942.00 અને 19 કિલો કોમર્શિયલ સિલિન્ડરની કિંમત ₹2,930.00 થઈ છે, જે અગાઉ ₹3,113.50 હતી. મુંબઈમાં ઘરેલુ સિલિન્ડર ₹941.50 અને કોમર્શિયલ ₹2,884.00 થયો છે (અગાઉ ₹3,067.50), જ્યારે ચેન્નાઈમાં ઘરેલુ ₹957.50 અને કોમર્શિયલ ₹3,099.50 થયો છે (અગાઉ ₹3,283.00). હૈદરાબાદમાં ઘરેલુ LPG ₹979.50 અને કોમર્શિયલ ₹3,052.50 થયો છે (અગાઉ ₹3,236.00), જ્યારે કોલકાતામાં ઘરેલુ સિલિન્ડરની કિંમત ₹968.00 અને કોમર્શિયલ સિલિન્ડરની કિંમત ₹3,072.00 થઈ છે, જે અગાઉ ₹3,255.50 હતી.

કોમર્શિયલ સિલિન્ડરના નવા દરોમાં દરેક શહેરમાં ₹183.50નો ઘટાડો નોંધાયો છે.

વર્ષ 2026 દરમિયાન કોમર્શિયલ LPGના ભાવમાં કેવી રીતે બદલાવ આવ્યો?

વર્ષની શરૂઆતથી કોમર્શિયલ સિલિન્ડરના ભાવ સતત વધતા રહ્યા હતા અને જૂન સુધીમાં તેની કિંમત સર્વોચ્ચ સ્તરે પહોંચી હતી.

• 1 ડિસેમ્બર 2025 : દિલ્હીમાં ભાવ ₹1,580.50
• જાન્યુઆરી 2026 : ભાવ વધીને ₹1,691.50
• ફેબ્રુઆરી 2026 : વધુ વધારા બાદ ₹1,740.50
• માર્ચ 2026 : 1 માર્ચે ₹28 વધીને ₹1,768.50 અને 7 માર્ચે વધુ ₹114.50 વધતાં ₹1,883
• એપ્રિલ 2026 : ભાવ વધીને ₹2,078.50
• મે 2026 : સૌથી મોટો ₹993નો વધારો, ભાવ ₹3,071.50
• જૂન 2026 : વધુ ₹42 વધારા બાદ ભાવ ₹3,113.50 સુધી પહોંચ્યો
• જુલાઈ 2026 : ₹183.50ના ઘટાડા બાદ નવી કિંમત ₹2,930 થઈ

આ પણ વાંચો : પેટ્રોલ-ડીઝલ પરનો વિન્ડફોલ ટેક્સ 5.5 રૂપિયા ઘટ્યો, ડીઝલ અને ATF પર રાહત, પેટ્રોલ નિકાસ પર ડ્યુટીમાં વધારો

ઘરેલુ LPG સિલિન્ડર કેમ ચર્ચામાં રહ્યો?

ઘરેલુ ગ્રાહકો માટે વર્ષ 2026માં બે વખત ભાવ વધારો કરવામાં આવ્યો હતો.

7 માર્ચ 2026: ₹60નો વધારો-ભાવ ₹853થી વધીને ₹913 થયો

7 જૂન 2026: વધુ ₹29નો વધારો

આ રીતે વર્ષ 2026માં અત્યાર સુધી ઘરેલુ LPG સિલિન્ડર કુલ ₹89 મોંઘું થયું છે અને હાલ દિલ્હીમાં તેની કિંમત ₹942 છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ