Tiger Shroff Firing / મુંબઈમાં ટાઇગર શ્રોફ પર 5 રાઉન્ડ ફાયરિંગ! હાથમાં પાટો બાંધેલી હાલતમાં જોવા મળ્યો અભિનેતા

મુંબઈના જુહુ વિસ્તારમાં રવિવારે સાંજે અચાનક ગોળીબારના અવાજથી ચકચાર મચી ગઈ હતી. આ ઘટનામાં બોલિવૂડ અભિનેતા ટાઇગર શ્રોફનું નામ સામે આવતાં તેના ચાહકોમાં ચિંતાનો માહોલ જોવા મળ્યો હતો. ગોળીબાર બાદ અભિનેતા સુરક્ષિત છે કે નહીં અને તેને કેટલી ગંભીર ઈજા થઈ છે તે અંગે અનેક સવાલો ઊભા થયા હતા. આ દરમિયાન ટાઇગર શ્રોફના હાથ, ખભા અને છાતી પર પાટા બાંધેલા ફોટા સામે આવતાં ચિંતા વધી હતી. જોકે, મહારાષ્ટ્રના નાયબ મુખ્યમંત્રી એકનાથ શિંદેએ અભિનેતાની મુલાકાત લીધા બાદ તેની તબિયત અને સમગ્ર ઘટના અંગે માહિતી આપી હતી.

મળતી માહિતી મુજબ, રવિવારે સાંજે ટાઇગર શ્રોફ ફૂટબોલ ક્લબમાંથી બહાર નીકળી રહ્યો હતો ત્યારે મુંબઈના જુહુ વિસ્તારમાં ગોળીબાર થયાના અહેવાલ સામે આવ્યા હતા. આ ઘટનામાં કુલ 5 રાઉન્ડ ફાયરિંગ કરવામાં આવ્યું હોવાનું જણાવવામાં આવ્યું છે. ગોળીબારની ઘટનામાં ટાઇગર શ્રોફને ઈજા પહોંચી હતી, જ્યારે તેના ડ્રાઇવરને પણ ઈજા થઈ હતી. ઘટનાની જાણ થતાં અભિનેતાના પરિવારજનો ચિંતામાં મુકાયા હતા.

ટાઇગર શ્રોફના હાથમાં કેવી રીતે થઈ ઈજા?

ગોળીબારની ઘટના બાદ રવિવારે રાત્રે મહારાષ્ટ્રના નાયબ મુખ્યમંત્રી એકનાથ શિંદે ટાઇગર શ્રોફના ઘરે પહોંચ્યા હતા. અહીં તેમણે અભિનેતાની તબિયત અંગે પૂછપરછ કરી હતી અને પરિવારના સભ્યો સાથે વાતચીત કરી હતી. આ મુલાકાત દરમિયાન ટાઇગર શ્રોફની માતા આયેશા શ્રોફ પણ હાજર હતી. મુલાકાતના ફોટામાં અભિનેતાના હાથ પર પાટો બાંધેલો જોવા મળ્યો હતો. આ ઉપરાંત તેના ખભા અને છાતી પર પણ પાટા જોવા મળ્યા હતા. મુલાકાત બાદ પત્રકારો સાથે વાત કરતાં એકનાથ શિંદેએ જણાવ્યું હતું કે ગોળીબાર દરમિયાન ટાઇગર શ્રોફને ગનપાઉડર અને કાચના ટુકડાને કારણે ડાબા હાથમાં ઈજા થઈ છે. જોકે, રાહતની વાત એ છે કે અભિનેતા સુરક્ષિત છે. તેમણે એ પણ જણાવ્યું હતું કે આ ઘટનામાં ટાઇગરના ડ્રાઇવરને પણ ઈજા પહોંચી છે.

એકનાથ શિંદેએ પરિવારને આપી સુરક્ષાની ખાતરી

આ ઘટના અંગે એકનાથ શિંદેએ જણાવ્યું હતું કે આ ખૂબ જ ગંભીર અને નિંદનીય ઘટના છે. ઘટનામાં 5 રાઉન્ડ ફાયરિંગ થયું હતું, પરંતુ સારી વાત એ છે કે ટાઇગર શ્રોફ સુરક્ષિત છે. ગનપાઉડર અને કાચના ટુકડાને કારણે તેના ડાબા હાથમાં ઈજા થઈ છે. આ ઘટના બાદ ટાઇગર અને તેની માતા આયેશા શ્રોફ બંને ખૂબ ડરી ગયા છે. શિંદેએ વધુમાં જણાવ્યું હતું કે તેમણે અભિનેતા અને તેના પરિવારને ખાતરી આપી છે કે મહારાષ્ટ્ર સરકાર તેમની સાથે ઊભી છે. કોઈપણ વ્યક્તિને ડરાવવા કે ધમકાવવાના પ્રયાસો સહન કરવામાં આવશે નહીં. આવી ઘટનાઓ સામે રાજ્ય સરકાર જરૂરી તમામ પગલાં લેશે અને જવાબદાર લોકો સામે કાર્યવાહી કરવામાં આવશે.

દિશા પટણી પણ ટાઇગરના ઘરે પહોંચી

ગોળીબારની ઘટના બાદ ટાઇગર શ્રોફની તબિયત અંગે જાણકારી મેળવવા માટે અભિનેત્રી દિશા પટણી પણ તેના ઘરે પહોંચી હતી. બીજી તરફ, નાયબ મુખ્યમંત્રી એકનાથ શિંદેએ પરિવાર સાથે મુલાકાત કરીને તેમને હિંમત આપી હતી. તેમણે સ્પષ્ટ કર્યું હતું કે રાજ્ય સરકાર જાહેર જીવન સાથે જોડાયેલી વ્યક્તિઓને ડરાવવાના પ્રયાસો સામે કડક વલણ અપનાવશે.

આ પણ વાંચો : ફરી બોલીવુડ નિશાના પર, ટાઈગર શ્રોફ પર ફાયરિંગ, બિશ્નોઈ ગેંગે લીધી જવાબદારી, સલમાન ખાનનો કર્યો ઉલ્લેખ

90ના દાયકાના ગેંગ વોરને યાદ કર્યા

ગોળીબારની ઘટનાની નિંદા કરતાં એકનાથ શિંદેએ મુંબઈમાં 1990ના દાયકામાં ચાલતા ગેંગ વોરનો પણ ઉલ્લેખ કર્યો હતો. તેમણે જણાવ્યું હતું કે એક સમયે મુંબઈમાં આવી ઘટનાઓ સામાન્ય બની ગઈ હતી. જોકે, મુંબઈ પોલીસે 1995માં આવી ગુનાહિત પ્રવૃત્તિઓ પર નિયંત્રણ મેળવીને ગેંગ વોરનો અંત લાવ્યો હતો. શિંદેએ કહ્યું હતું કે મુંબઈમાં ફરીથી આવી પરિસ્થિતિ ઊભી થવા દેવામાં આવશે નહીં. લોકોને ડરાવવા, ધમકાવવા અથવા ગુંડાગીરી કરવાના પ્રયાસોને રાજ્ય સરકાર કોઈપણ સંજોગોમાં સહન કરશે નહીં. આવી પ્રવૃત્તિઓને સંપૂર્ણપણે નાબૂદ કરવા માટે જરૂરી કાર્યવાહી કરવામાં આવશે. આ ઘટનાને પગલે ટાઇગર શ્રોફની સુરક્ષા અને તેની તબિયત અંગે ચાહકોમાં ચિંતા જોવા મળી રહી છે. જોકે, નાયબ મુખ્યમંત્રી એકનાથ શિંદેએ અભિનેતા સુરક્ષિત હોવાનું જણાવતાં રાહતના સમાચાર મળ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ