બિઝનેસ / પેટ્રોલ 5 રૂપિયા સસ્તું, ડીઝલમાં 3 રૂપિયાનો ઘટાડો, આ કંપનીએ આપી રાહત

ભારતમાં પેટ્રોલ-ડીઝલના વધતા ભાવ વચ્ચે ગ્રાહકોને મોટી રાહત મળી છે. ખાનગી ક્ષેત્રની અગ્રણી ફ્યુઅલ કંપની નાયરા એનર્જીએ 1 જુલાઈ 2026થી પેટ્રોલના ભાવમાં ₹5 અને ડીઝલના ભાવમાં ₹3 પ્રતિ લિટરનો ઘટાડો કર્યો છે. બે વર્ષથી વધુ સમય બાદ કોઈ કંપનીએ રિટેલ ફ્યુઅલના ભાવમાં ઘટાડો કર્યો છે. મધ્ય પૂર્વમાં તણાવ ઘટતા અને આંતરરાષ્ટ્રીય કાચા તેલના ભાવ નીચે આવતા આ નિર્ણય લેવામાં આવ્યો છે.

ભારતમાં પેટ્રોલ અને ડીઝલના ભાવમાં ઘટાડો કરવામાં આવ્યો છે. દેશની સૌથી મોટી ખાનગી ફ્યુઅલ રિટેલર તરીકે ઉભરી આવેલી નાયરા એનર્જીએ પેટ્રોલના ભાવમાં ₹5 પ્રતિ લિટર અને ડીઝલના ભાવમાં ₹3 પ્રતિ લિટરનો ઘટાડો કર્યો છે. નવી કિંમતો 1 જુલાઈ 2026થી અમલમાં આવી ગઈ છે. છેલ્લા બે વર્ષથી વધુ સમયગાળા દરમિયાન આ પહેલીવાર છે જ્યારે કોઈ કંપનીએ રિટેલ સ્તરે પેટ્રોલ અને ડીઝલના ભાવ ઘટાડ્યા છે. મધ્ય પૂર્વમાં યુદ્ધ જેવી પરિસ્થિતિમાં રાહત મળતા અને વૈશ્વિક બજારમાં કાચા તેલના ભાવ ઘટતા આ નિર્ણય લેવામાં આવ્યો હોવાનું માનવામાં આવે છે.

7,000થી વધુ પેટ્રોલ પંપ પર સસ્તુ ઈંધણ

રશિયાની રોસનેફ્ટ સમર્થિત નાયરા એનર્જીએ તાજેતરમાં ભારતમાં પોતાના પેટ્રોલ પંપોની સંખ્યા 7,000થી વધુ કરી છે. આ સાથે કંપની દેશની સૌથી મોટી ખાનગી ફ્યુઅલ રિટેલર બની છે. કંપનીએ પોતાના દેશવ્યાપી નેટવર્ક પર પેટ્રોલ અને ડીઝલના ભાવમાં ઘટાડો કરીને ગ્રાહકોને રાહત આપી છે. ઉદ્યોગ ક્ષેત્રના સૂત્રો અનુસાર, નાયરા એનર્જીના 7,000થી વધુ ફ્યુઅલ સ્ટેશનો પર નવી કિંમતો 1 જુલાઈથી લાગુ થઈ ગઈ છે. જોકે, અલગ-અલગ રાજ્યોમાં સ્થાનિક કર (VAT) મુજબ પેટ્રોલ અને ડીઝલના ભાવમાં થોડો ફેરફાર હોઈ શકે છે.

સરકારી તેલ કંપનીઓના ભાવ યથાવત

નાયરા એનર્જીએ ભાવ ઘટાડ્યા હોવા છતાં સરકારી તેલ કંપનીઓએ હાલમાં કોઈ ફેરફાર કર્યો નથી. ઇન્ડિયન ઓઇલ કોર્પોરેશન (IOC), ભારત પેટ્રોલિયમ (BPCL) અને હિંદુસ્તાન પેટ્રોલિયમ (HPCL) દ્વારા સંચાલિત પેટ્રોલ પંપો પર જૂના ભાવ જ ચાલુ છે. રાજધાની દિલ્હીમાં IOCના પેટ્રોલ પંપ પર પેટ્રોલનો ભાવ ₹102.12 પ્રતિ લિટર અને ડીઝલનો ભાવ ₹95.20 પ્રતિ લિટર યથાવત છે.

આ પણ વાંચોઃ 1 જુલાઈથી LPG સિલિન્ડર સસ્તો: કોમર્શિયલ ગેસના ભાવમાં ઘટાડો, જાણો ઘરેલુ ગ્રાહકોને કેટલી રાહત?

જેટલો વધારો કર્યો હતો, એટલો જ ઘટાડો

અમેરિકા-ઈરાન વચ્ચેના તણાવ અને વૈશ્વિક અનિશ્ચિતતાને કારણે અગાઉ આંતરરાષ્ટ્રીય બજારમાં તેલના ભાવમાં ભારે ઉછાળો આવ્યો હતો. તે સમયે નાયરા એનર્જીએ 26 માર્ચે પેટ્રોલના ભાવમાં ₹5 પ્રતિ લિટર અને ડીઝલના ભાવમાં ₹3 પ્રતિ લિટરનો વધારો કર્યો હતો. હવે કંપનીએ એટલી જ રકમનો ઘટાડો કરીને ગ્રાહકોને રાહત આપી છે. બીજી તરફ લગભગ ચાર વર્ષ સુધી ભાવ સ્થિર રાખ્યા બાદ સરકારી તેલ કંપનીઓએ પણ મે મહિનામાં અનેક તબક્કામાં ભાવ વધાર્યા હતા. ઇન્ડિયન ઓઇલ, BPCL અને HPCLએ મળીને પેટ્રોલ અને ડીઝલના ભાવમાં કુલ ₹7.50 પ્રતિ લિટરનો વધારો કર્યો હતો. કંપનીઓએ વધતી ખરીદી કિંમત અને મધ્ય પૂર્વના તણાવને તેનું મુખ્ય કારણ ગણાવ્યું હતું.

યુદ્ધ શાંત પડતા અને કાચું તેલ સસ્તુ થતા અસર

નાયરા એનર્જી ગુજરાતના વડીનારમાં દર વર્ષે 20 મિલિયન ટન ક્ષમતા ધરાવતી રિફાઇનરી ચલાવે છે. પશ્ચિમ એશિયામાં તણાવ ઘટતા અને મહત્વપૂર્ણ દરિયાઈ માર્ગ હોર્મુઝ જળમાર્ગ ફરી ખુલતા વૈશ્વિક બજારમાં કાચા તેલના ભાવમાં ઘટાડો નોંધાયો છે. હોર્મુઝ જળમાર્ગ ખુલવાથી કાચું તેલ અને લિક્વિફાઇડ નેચરલ ગેસ (LNG)ની સપ્લાય ફરી સામાન્ય બની છે. સપ્લાયમાં વિક્ષેપની ચિંતા ઘટતા વૈશ્વિક બજારમાં તેલના ભાવ નીચે આવ્યા છે, જેના કારણે નાયરા એનર્જીએ ગ્રાહકોને રાહત આપતો આ નિર્ણય લીધો છે.

DISCLAIMER બિઝનેસને લગતો આ આર્ટિકલ ન્યૂઝ આધારિત છે જેમાં રિસ્કનું પ્રમાણ વધુ હોય શકે છે, કોઈ પણ જગ્યાએ રોકાણ કે બિઝનેસને લગતો વહીવટ કરતી વખતે એક વખત માર્કેટ નિષ્ણાંતની સલાહ લેવી જરૂરી છે, vtvgujarati.com કોઈ પણ મુશ્કેલી માટે બંધનકર્તા રહેશે નહીં જેની ખાસ નોંધ લેવી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ