રેલમછેલ / અંબાલાલની ખેડૂતોને સલાહ, આદ્રા નક્ષત્રમાં વાવણી કરજો, જુઓ આજે ગુજરાતમાં ક્યાં થઈ મેઘમહેર

• ગુજરાતમાં વરસાદની પધરામણી
• 24થી 26 જૂનના રોજ દક્ષિણ ગુજરાતમાં વરસાદ પડશે: હવામાન વિભાગ
• આદ્રા નક્ષત્રમાં વાવણી કરવા ખેડૂતોને સલાહ: અંબાલાલ પટેલ

ગીર સોમનાથ જિલ્લાના ગીર ગઢડા અને કોડીનાર તાલુકાના ગ્રામ્ય વિસ્તારમાં વરસાદ થયો છે. આજે બપોર બાદ ગીર ગઢડા તાલુકામાં ધોધમાર વરસાદ થયો છે, જ્યારે ગરમીના ઉકળાટ વચ્ચે સાંજના સમયે કોડીનારના ગ્રામ્ય વિસ્તારમાં વરસાદ થયો છે. જિલ્લાના ગીર દેવળી, સિધાજ, વડનગર, દેવલપુર, છાછર અને ઘાંટવડમાં વરસાદ થયો છે. જેને લઇ ખેડૂતોમાં ખુશી પ્રસરી છે.

• મોરબી: પીપળી,બેલા અને જેતપર રોડ પર ભારે પવન સાથે વરસાદ
• સુરત: ઓલપાડ તાલુકા, કામરેજમાં વરસાદ થતાં ઠેર ઠેર પાણી ભરાયા, ઉમરપાડામાં થયું ચોમાસાના પહેલા વરસાદનું આગમન
• વલસાડ: ધરમપુર અને કપરાડા તાલુકામાં ધોધમાર વરસાદ
• દ્વારકા: ખંભાળિયાના ભાણવરી ગામ અને આસપાસના વિસ્તારોમાં મેઘમહેર
• તાપી: વ્યારાના પાનવાડી, કપુરા, પનીયારી સહિતના વિસ્તારમાં ઝાપટા

વિજયનગરમાં દોઢ ઈંચ વરસાદ
સાબરકાંઠાના વિજયનગરમાં પણ ધોધમાર વરસાદ પડ્યો, વિજયનગરના બાલેટા, કોડિયાવાડા અને ચિઠોડામાં વરસાદ વરસતા ખેતરોમાં પાણી ભરાઇ ગયા છે. રાત્રિ દરમિયાન દોઢ ઈંચ જેટલો વરસાદ વરસ્યો હતો.

હાથમતી નદીમાં નવા નીરના વધામણા
અરવલ્લી જિલ્લાના ભિલોડાની હાથમતી નદીમાં નવા નીરનું આગમન થયુ છે. રાજસ્થાન-વિજયનગરમાં સારા વરસાદથી નદીમાં નવા નીરના વધામણા થયા છે. નદીના નવા નીર ચુનાખણ,ઉબસલ સુધી પહોંચ્યા છે. નવા નીરના આગમન થતા ભિલોડા મામલતદારે તંત્રને સાવચેત રહેવા સૂચના આપી છે. આ ઉપરાંત નાગરિકોને નદી કિનારાથી દૂર રહેવા અપીલ કરવામાં આવી છે.

હવામાન વિભાગની આગાહી
હવામાન વિભાગે ગુજરાતમાં વરસાદને લઇને આગાહી કરતા જણાવ્યું કે, 'રાજ્યમાં બે દિવસ બાદ દક્ષિણ ગુજરાતમાં ભારે વરસાદ વરસશે. તારીખ 24થી 26 જૂનના રોજ વલસાડ, નવસારી, ડાંગ, સુરત, વાપી અને દાદરા-નગર-હવેલીમાં ભારે વરસાદ વરસશે.' બીજી બાજુ હવામાન વિભાગે ઉત્તર ગુજરાત અને કચ્છમાં પણ સામાન્ય વરસાદ વરસશે, 'રાજ્યમાં આગામી બે દિવસ અમદાવાદ અને ગાંધીનગરમાં પણ છૂટોછવાયો વરસાદ વરસશે. જો કે, અમદાવાદમાં હજુ વરસાદની રાહ જોવી પડશે. 24 જૂનના રોજ થંડરસ્ટ્રોમ સાથે વરસાદ વરસે તેવી શક્યતા. તમને જણાવી દઇએ કે, રાજ્યમાં છેલ્લા 24 કલાકમાં 30 જિલ્લા અને તાલુકાઓમાં વરસાદ વરસ્યો છે, જેમાં સૌથી વધુ વરસાદ સાબરકાંઠાના વિજયનગરમાં 42 મિમી અને વિરમગામમાં 23 મિમીથી વધુ વરસાદ વરસ્યો. મહત્વનું છે કે, ગુજરાતમાં સૌરાષ્ટ્ર અને દક્ષિણ ગુજરાતમાં છેલ્લા પાંચેક દિવસથી દૈનિક છૂટાછવાયો વરસાદ પડી રહ્યો છે.

હવામાન નિષ્ણાંત અંબાલાલ પટેલની આગાહી

• 26-27 જૂન બાદ પડશે ભારે વરસાદ
• વડોદરા, આણંદ, ખેડામાં ભારે વરસાદની આગાહી
• જુલાઈથી ઓગસ્ટના પ્રથમ સપ્તાહ સુધી પડશે સારો વરસાદ
• સપ્ટેમ્બરના પાછલા દિવસોમાં વરસાદનું જોર ઘટશે
• નદીઓના જળસ્તરમાં થશે વધારો
• આદ્રા નક્ષત્રમાં વાવણી કરવા ખેડૂતોને સલાહ