મેઘતાંડવ / અમદાવાદ સહિત ગુજરાતમાં મેઘરાજાની ધમાકેદાર એન્ટ્રી, જળબંબાકારથી જનજીવન અસ્તવ્યસ્ત, જુઓ Videos

સુરેન્દ્રનગર જિલ્લાના ચુડા તાલુકામાં ભારે વરસાદ બાદ સોંથા-કંથારિયા ગામ વચ્ચેનો નાળો પાણીથી છલકાઈ ગયો હતો. આ દરમિયાન પૂર જેવા પાણીના પ્રવાહમાં એક કાર તણાઈ ગઈ હતી. કારમાં સવાર ત્રણ પૈકી એક વ્યક્તિનું પાણીમાં ડૂબી જવાથી મોત થયું છે, જ્યારે અન્ય બે વ્યક્તિઓને સદનસીબે બચાવી લેવામાં આવ્યા હતા. કાર પાણીના પ્રવાહમાં તણાઈ જતાં ફાયર ટીમે તાત્કાલિક શોધખોળ શરૂ કરી હતી અને ભારે જહેમત બાદ એક વ્યક્તિનો મૃતદેહ બહાર કાઢ્યો હતો. પ્રાથમિક તપાસમાં સામે આવ્યું છે કે કાર ગ્લાસણા ગામની હોવાનું જાણવા મળ્યું છે.

સુરેન્દ્રનગરમાં જ ભારે વરસાદને કારણે થાનગઢ નજીક ત્રિનેત્રેશ્વર મહાદેવ મંદિરના પરિસરમાં યોજાનારા વિશ્વપ્રસિદ્ધ તર્ણેતર લોકમેળાની તૈયારીઓ પણ મુશ્કેલીમાં મુકાઈ છે. તર્ણેતરનો મેળો શરૂ થાય તે પહેલાં જ એક દિવસ અગાઉ પડેલા ભારે વરસાદથી મેળાના મેદાનમાં પાણી ભરાઈ ગયું છે.

માત્ર મુખ્ય મેદાન જ નહીં, પરંતુ વેપારીઓ માટે સ્ટોલ અને પંડાલ ઉભા કરવાની જગ્યાઓમાં પણ પાણી ભરાતા વેપારીઓ અને પંડાલ તૈયાર કરનારાઓની મુશ્કેલી વધી છે. મેળો શરૂ થવાની રાહ જોઈ રહેલા પ્રવાસીઓ અને લોકસાહિત્યપ્રેમીઓમાં પણ વરસાદને લઈને ચિંતા જોવા મળી રહી છે.

પંચમહાલના ગોધરામાં પણ ભારે વરસાદને કારણે શહેર અને આસપાસના વિસ્તારોમાં પાણી ભરાઈ ગયા છે. યોગેશ્વર સોસાયટી રોડ સહિતના મુખ્ય રસ્તાઓ અને ખેતરોમાં વરસાદી પાણી ફરી વળ્યું છે. ખાસ કરીને નીચાણવાળા વિસ્તારોમાં પાણી ભરાતા સ્થાનિક લોકોની દૈનિક અવરજવર પર અસર પડી છે. ભારે વરસાદને કારણે રસ્તાઓ પર પાણી ભરાતા લોકોને મુશ્કેલીનો સામનો કરવો પડી રહ્યો છે.

અમદાવાદ શહેરમાં લગભગ 45 દિવસ બાદ ફરી વરસાદી માહોલ જોવા મળ્યો છે. સવારથી જ શહેરમાં સતત વરસાદ પડી રહ્યો છે. સેટેલાઇટ, મેઘાણીનગર, મણિનગર, શાહીબાગ, પાલડી, આંબાવાડી, થલતેજ, ગોતા, ચાંદલોડિયા, ઘાટલોડિયા, પ્રહલાદનગર અને શિવરંજની સહિત અનેક વિસ્તારોમાં વરસાદ નોંધાયો છે.

સતત વરસાદને કારણે શહેરના અનેક રસ્તાઓ પર પાણી વહેવા લાગ્યું છે. ઓગસ્ટ મહિનામાં અમદાવાદમાં નહિવત વરસાદ નોંધાયા બાદ હવે વરસાદનું આગમન થયું છે. શહેર માટે ઓરેન્જ એલર્ટ પણ જાહેર કરવામાં આવ્યું છે.

મહેસાણા જિલ્લામાં પણ રાત્રિ દરમિયાન સાર્વત્રિક વરસાદ નોંધાયો છે. જેમાં સૌથી વધુ 84 MM વરસાદ બહુચરાજીમાં ખાબક્યો છે. ભારે વરસાદને પગલે અનેક રસ્તાઓ પર પાણી ફરી વળ્યાં છે. બહુચરાજી-શંખલપુર અંડરપાસ પણ પાણીમાં ગરકાવ થઈ જતાં વાહનચાલકોને ભારે હાલાકી પડી રહી છે. સ્થાનિકોમાં વર્ષોથી અંડરપાસમાં પાણી ભરાવાની સમસ્યા યથાવત હોવાની ચર્ચા છે. પાણીના નિકાલ માટે પૂરતી ડ્રેનેજ વ્યવસ્થા ન હોવાના કારણે દર વખતે વરસાદમાં આ વિસ્તારમાં મુશ્કેલી સર્જાતી હોવાની વાત સામે આવી રહી છે.

હવામાન વિભાગની આગાહી મુજબ ગુજરાતમાં છેલ્લા બે દિવસથી હળવાથી ભારે વરસાદી માહોલ જોવા મળી રહ્યો છે અને આગામી બે દિવસ પણ વરસાદી વાતાવરણ યથાવત રહેવાની શક્યતા છે. આજે 14 સપ્ટેમ્બરે દેવભૂમિ દ્વારકા, પોરબંદર, જામનગર, જૂનાગઢ, ગીર સોમનાથ, ભરૂચ, સુરત અને નવસારીમાં ભારેથી અતિભારે વરસાદની શક્યતા છે. જ્યારે રાજકોટ, અમરેલી, ભાવનગર, બોટાદ, મોરબી, સુરેન્દ્રનગર, કચ્છ અને અમદાવાદ સહિત 13 જિલ્લાઓમાં ભારે વરસાદની આગાહી કરવામાં આવી છે. રાજ્યના અન્ય જિલ્લાઓમાં હળવાથી મધ્યમ વરસાદની શક્યતા વ્યક્ત કરવામાં આવી છે.

અમદાવાદમાં વરસાદે ફરી એકવાર તંત્રની કામગીરી સામે સવાલો ઉભા કર્યા છે. વરસાદ પડતાં જ શહેરના અનેક વિસ્તારોમાં જળબંબાકાર જેવી સ્થિતિ સર્જાઈ છે. નારોલ-અસલાલી હાઈવે અને ઇસનપુર-નારોલના મુખ્ય રસ્તાઓ પાણીમાં ગરકાવ થઈ ગયા છે. નારોલ ચાર રસ્તા પર પાણી દુકાનોના સટર સુધી પહોંચી જતા વેપારીઓની મુશ્કેલી વધી છે. બીજી તરફ ઓઢવ ફાયર સ્ટેશન ચાર રસ્તા પાસે ઘૂંટણસમા પાણી ભરાઈ ગયા છે. રસ્તાઓ પર પાણી ભરાતા વાહનચાલકોને BRTS ટ્રેક પરથી પસાર થવાની ફરજ પડી રહી છે.

અમદાવાદના પૂર્વ વિસ્તારમાં પણ મેઘરાજાએ જોરદાર બેટિંગ કરી છે. સોનીની ચાલીથી ઓઢવ તરફ જતા રસ્તા પર વરસાદી પાણી ભરાઈ ગયા છે. વસ્ત્રાલ, ઓઢવ, ઠક્કરબાપાનગર અને નિકોલ સહિતના વિસ્તારોમાં ભારે વરસાદને કારણે રસ્તાઓ પાણીમાં ગરકાવ થયા છે. પાણી ભરાવાને કારણે સ્થાનિક રહીશો અને વાહનચાલકોને ભારે હાલાકીનો સામનો કરવો પડી રહ્યો છે. સવારથી સતત વરસાદના કારણે શહેરના પૂર્વ વિસ્તારમાં અનેક સ્થળોએ જનજીવન પ્રભાવિત થયું છે.

પાવાગઢ શક્તિપીઠ પર પણ વહેલી સવારથી વરસાદી માહોલ જોવા મળ્યો હતો. પાવાગઢની યાત્રાધામ ટેકરી પર વરસાદ પડતાં પગથિયાં પરથી જાણે ઝરણાં વહેતા હોય તેવું દૃશ્ય જોવા મળ્યું હતું. પગથિયાં પરથી પાણીનો પ્રવાહ નીચે તરફ વહેતો જોવા મળ્યો હતો. વરસાદી માહોલ વચ્ચે પાવાગઢનો સમગ્ર વિસ્તાર મનમોહક બની ગયો હતો અને યાત્રાળુઓને પણ કુદરતનું સુંદર રૂપ જોવા મળ્યું હતું.

અમદાવાદમાં ભારે વરસાદના કારણે ટ્રાફિકની સમસ્યા પણ વધી ગઈ છે. પકવાન અંડરપાસથી થલતેજ સુધી ટ્રાફિકજામની સ્થિતિ સર્જાઈ છે. કાળા ડિબાંગ વાદળો વચ્ચે ધોધમાર વરસાદ પડતાં વિઝિબિલિટી ઘટીને લગભગ ઝીરો થઈ ગઈ હતી.

ઓછી વિઝિબિલિટીના કારણે વાહનચાલકોને ભારે મુશ્કેલીનો સામનો કરવો પડ્યો હતો અને રસ્તા પર વાહનોની લાંબી કતારો જોવા મળી હતી.

બીજી તરફ સામાન્ય વરસાદમાં જ SG હાઈવે અને થલતેજ સર્વિસ રોડ પર પાણી ભરાઈ જતા ઓફિસ જતા લોકો અને વાહનચાલકો પરેશાન થયા હતા. કેટલાક વાહનો પાણીમાં બંધ પણ પડી ગયા હતા.

સ્થાનિક વાહનચાલકોના જણાવ્યા મુજબ સામાન્ય વરસાદમાં પણ અહીં વારંવાર પાણી ભરાય છે. આનંદનગર હરણ સર્કલ પાસે પણ વરસાદી પાણી ભરાતા વાહનચાલકોની મુશ્કેલી વધી હતી અને પાણીમાંથી પસાર થતી વખતે કેટલાક વાહનો બંધ પડી ગયા હતા.

આ પણ વાંચો : એક બાજુ ઓપરેશન ગંગાજળના વખાણ, બીજી બાજુ મંત્રીજીએ ભ્રષ્ટાચારને લઈ બળાપો કાઢ્યો, જાણો ગાંધીનગરની ગલીઓમાં ચર્ચાતી વાતો

આ સ્થિતિએ ફરી એકવાર સ્માર્ટ સિટી અમદાવાદના રસ્તાઓ અને વરસાદી પાણીના નિકાલની વ્યવસ્થા સામે સવાલો ઉભા કર્યા છે.ગુજરાતમાં છેલ્લા બે દિવસથી હળવોથી ભારે વરસાદ વરસી રહ્યો છે અને હજુ બે દિવસ રાજ્યમાં વરસાદી માહોલ યથાવત્ રહેવાની શક્યતા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ