ગૌરવ / વડાપ્રધાનનો દબદબો તો જુઓ! સાઉદીથી લઇને છેક ફ્રાંન્સ સુધી ગજવ્યું ભારતનું નામ

PM Modi Foreign Honors : પ્રધાનમંત્રી નરેન્દ્ર મોદીના નેતૃત્વ હેઠળ ભારતે છેલ્લા 12 વર્ષમાં માત્ર આંતરિક વિકાસ જ નહીં પરંતુ વૈશ્વિક સ્તરે પણ પોતાની અલગ ઓળખ ઊભી કરી છે. ભારતના રાજકીય ઇતિહાસમાં આજનો એટલે કે, 10 જૂન, 2026નો દિવસ એક નવા રેકોર્ડ માટે યાદ રાખવામાં આવશે. વડા પ્રધાન નરેન્દ્ર મોદીએ સતત ચૂંટાયેલા વડા પ્રધાન તરીકે સેવા આપવાના મામલે દેશના પ્રથમ વડા પ્રધાન જવાહરલાલ નેહરુનો 4,398 દિવસનો રેકોર્ડ પાછળ છોડી 4,399 દિવસનો કાર્યકાળ પૂર્ણ કર્યો છે. વર્ષ 2014માં પ્રથમ વખત વડા પ્રધાન પદની શપથ લીધા બાદ મોદી આજે સતત ત્રીજા કાર્યકાળમાં દેશનું નેતૃત્વ કરી રહ્યા છે.

આ સમયગાળા દરમિયાન વિવિધ દેશો દ્વારા મોદીને અપાયેલા 30 સર્વોચ્ચ રાજ્ય સન્માનો ભારતની વધતી આંતરરાષ્ટ્રીય પ્રતિષ્ઠાનું પ્રતિબિંબ માનવામાં આવે છે. આ સન્માનો વ્યક્તિગત સિદ્ધિ કરતાં વધુ ભારતની વૈશ્વિક સ્વીકાર્યતા અને રાજદ્વારી પ્રભાવના સૂચક તરીકે જોવામાં આવે છે. વિશ્વના વિવિધ ખંડોમાં આવેલા દેશોએ ભારત સાથેના સંબંધોને નવી ઊંચાઈએ પહોંચાડવાના પ્રયાસરૂપે પોતાના સર્વોચ્ચ નાગરિક સન્માનોથી પ્રધાનમંત્રી મોદીને નવાજ્યા છે. મધ્ય પૂર્વથી લઈને યુરોપ, આફ્રિકા, કેરેબિયન અને પ્રશાંત મહાસાગર વિસ્તારના દેશો સુધી ભારત પ્રત્યેનો વિશ્વાસ અને સહયોગ વધ્યો હોવાનું આ સન્માનો દર્શાવે છે.

સાઉદી અરેબિયાનું "ઓર્ડર ઓફ કિંગ અબ્દુલઅઝીઝ", સંયુક્ત આરબ અમીરાતનું "ઓર્ડર ઓફ ઝાયેદ", રશિયાનું "ઓર્ડર ઓફ સેન્ટ એન્ડ્રુ ધ એપોસ્ટલ", ઇજિપ્તનું "ઓર્ડર ઓફ ધ નાઇલ" અને ફ્રાન્સનું પ્રતિષ્ઠિત "ગ્રાન્ડ ક્રોસ ઓફ ધ લીજન ઓફ ઓનર" જેવા પુરસ્કારો આંતરરાષ્ટ્રીય સ્તરે અત્યંત મહત્ત્વના ગણાય છે. આ ઉપરાંત ભૂટાન, ફીજી, પાપુઆ ન્યુ ગિની, મોરેશિયસ, શ્રીલંકા, બાર્બાડોસ, બ્રાઝિલ, ઘાના અને અન્ય અનેક દેશોએ પણ ભારતના નેતૃત્વને સન્માનિત કર્યું છે.

નિષ્ણાતોના મતે આ સફળતા પાછળ ભારતની બદલાયેલી વિદેશ નીતિ મહત્વપૂર્ણ પરિબળ રહી છે. છેલ્લા દાયકામાં ભારતે કોઈ એક શક્તિ કેન્દ્ર સુધી મર્યાદિત રહેવાના બદલે વિવિધ દેશો સાથે સંતુલિત અને બહુમુખી સંબંધો વિકસાવવાની નીતિ અપનાવી છે. અમેરિકા, રશિયા, યુરોપિયન દેશો, ગલ્ફ રાષ્ટ્રો તેમજ આફ્રિકા અને ગ્લોબલ સાઉથના દેશો સાથે એકસાથે સંબંધો મજબૂત કરવામાં આવ્યા છે.

ભારતની રાજદ્વારી પહોંચ અગાઉ કરતાં વધુ વિસ્તરી છે. ઇન્ડો-પેસિફિક ક્ષેત્ર, પશ્ચિમ એશિયા, આફ્રિકા અને લેટિન અમેરિકામાં વધતી સક્રિયતાએ ભારતને નવા વ્યૂહાત્મક ભાગીદાર તરીકે સ્થાપિત કરવામાં મદદ કરી છે. આ વિસ્તારોમાં વેપાર, સુરક્ષા, ટેક્નોલોજી અને ઊર્જા ક્ષેત્રે સહયોગના નવા દ્વાર ખુલ્યા છે. રાજ્ય સન્માનો માત્ર પ્રતીકાત્મક સન્માન નથી, પરંતુ તેઓ દેશો વચ્ચે વિશ્વાસ અને સહકારના મજબૂત સંબંધોને પણ દર્શાવે છે. આવા સન્માનો બાદ અનેક દેશો સાથે સંરક્ષણ કરારો, રોકાણ, વેપાર ભાગીદારી અને ટેક્નોલોજી સહયોગને નવી ગતિ મળી છે. ભારત વૈશ્વિક સપ્લાય ચેઇન અને ઊર્જા સુરક્ષા જેવા મહત્વના ક્ષેત્રોમાં પણ પોતાની હાજરી મજબૂત કરી રહ્યું છે.

આ પણ વાંચો : 4399 દિવસ, અને PM મોદીએ તોડ્યો નેહરુનો રેકોર્ડ, જુઓ તનતોડ મહેનતથી લઇને સફળ કાર્યકાળ વિશે

છેલ્લા કેટલાક વર્ષોમાં ભારતે વૈશ્વિક મુદ્દાઓ પર વધુ સક્રિય ભૂમિકા ભજવવાનો પ્રયાસ કર્યો છે. G-20 અધ્યક્ષપદ દરમિયાન ભારતે વિકાસશીલ દેશોના મુદ્દાઓને આંતરરાષ્ટ્રીય મંચ પર પ્રાથમિકતા આપી હતી. "ગ્લોબલ સાઉથ"ના હિતોને અવાજ આપવાના પ્રયાસોએ પણ અનેક દેશોમાં ભારત પ્રત્યે સકારાત્મક અભિગમ વિકસાવ્યો છે. આર્થિક રીતે ઝડપથી આગળ વધી રહેલા ભારતને આજે માત્ર એક મોટા બજાર તરીકે નહીં પરંતુ વ્યૂહાત્મક અને રાજકીય રીતે મહત્વપૂર્ણ ભાગીદાર તરીકે પણ જોવામાં આવે છે. વૈશ્વિક સંકટોના સમયમાં ભારતે સંતુલિત અને વ્યવહારુ અભિગમ અપનાવ્યો હોવાથી અનેક દેશો સાથેના સંબંધો વધુ ગાઢ બન્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ