IND vs WI 3rd T20 / ભારત-વેસ્ટ ઈન્ડિઝ વચ્ચે આજે મેચ: સ્ટેડિયમમાં પાવર બેંક, બેગ અને કેમેરા લઈ જવા પર પ્રતિબંધ

ઇન્દોરમાં અત્યાર સુધીમાં ચાર T20 મેચ રમાઇ છે, જેમાં પ્રથમ ઇનિંગ્સનો સરેરાશ સ્કોર 200 રહ્યો છે. ભારતે અહી રમાયેલી ચાર મેચમાંથી ત્રણ જીતી છે. છેલ્લી જીત જાન્યુઆરી 2024 માં અફઘાનિસ્તાન સામે મળી હતી.

ભારત અને વેસ્ટ ઈન્ડિઝ વચ્ચેની મેચમાં અત્યાર સુધી બેટ્સમેનોનું વર્ચસ્વ રહ્યું છે, અને રવિવારે થનારી ત્રીજી ટી20 આંતરરાષ્ટ્રીય મેચમાં પણ આ જ જોવા મળી શકે તેવી ધારણા છે, જેના કારણે બોલરો પર ઘણુ દબાણ રહેશે. રાંચીમાં રમાયેલી બીજી ટી20 આંતરરાષ્ટ્રીય મેચમાં 501 રન બન્યા. વેસ્ટ ઈન્ડિઝે લગભગ એક ઓવર બાકી રહેતા ભારતનો 250 રનનો લક્ષ્યાંક હાંસલ કરી લીધો. ઈન્દોરનું હોલકર સ્ટેડિયમ તેની ટૂંકી બાઉન્ડ્રી અને ફ્લેટ પિચ માટે જાણીતું છે. તેથી જો અહીં ફરીથી રનનો ઢગલો થાય છે તો આશ્ચર્ય ન થવું જોઈએ. મેચ ભારતીય સમય મુજબ સાંજે 7:00 વાગ્યે શરૂ થશે.

હોલકર સ્ટેડિયમ ખાતે કડક સુરક્ષા વ્યવસ્થા

અહેવાલો અનુસાર મધ્યપ્રદેશ ક્રિકેટ એસોસિએશને મેચ માટે કડક સુરક્ષા વ્યવસ્થા કરી છે. પહેલીવાર, હોલકર સ્ટેડિયમ ખાતે એડવાંસ ફેસ રિકગ્નિશન ટેકનોલોજીનો ઉપયોગ કરવામાં આવશે, જેનાથી શંકાસ્પદ અને બ્લેકલિસ્ટેડ વ્યક્તિઓની તાત્કાલિક ઓળખ થઈ શકશે. દર્શકોની સુવિધા માટે કોઈ લોકર અથવા ક્લોકરૂમ સુવિધાઓ ઉપલબ્ધ રહેશે નહીં. આમ, પાવર બેંક, ચાર્જર, ઇયરફોન, લેપટોપ, ડીએસએલઆર અને પ્રોફેશનલ કેમેરા અને સેલ્ફી સ્ટીક સહિત ઘણી વસ્તુઓ સ્ટેડિયમની અંદર જવાની મંજૂરી આપવામાં આવશે નહીં. મોટી બેગ, લેપટોપ બેગ, મહિલાઓની હેન્ડબેગ, છત્રી અને સિક્કા પણ લઈ જવા પર પ્રતિબંધ રહેશે.

ભારતે હોપના ફોર્મ અંગે સતર્ક રહેવું પડશે

આજની મેચમાં ભારતે હોપના શાનદાર ફોર્મ અંગે પણ સાવધ રહેવું પડશે. વેસ્ટ ઈન્ડિઝના કેપ્ટને આ પ્રવાસમાં બે સદી ફટકારી છે અને ફરીથી મોટો સ્કોર કરવા માટે કટિબદ્ધ રહેશે. બોલિંગ ભારત માટે ચિંતાનો વિષય છે, અને તેઓ આ મેચમાં આનો ઉકેલ લાવવાનો પ્રયાસ કરશે. આ મેચમાં ઓસ પણ મહત્વપૂર્ણ ભૂમિકા ભજવે તેવી અપેક્ષા છે.

આ પણ વાંચોઃ સ્પોર્ટ્સ / IPL 2027 પહેલા CSK એ લીધો મોટો નિર્ણય, વધુ એક દિગ્ગજ ખેલાડી ટીમમાંથી બહાર

કેપ્ટન શ્રેયસ ઐયર પર નજર

મયંકે પાછલી મેચમાં ત્રણ વિકેટ લઈને ભારતને સારી શરૂઆત અપાવી હતી, પરંતુ અન્ય બોલરો રન-રેટને કાબૂમાં રાખવામાં નિષ્ફળ રહ્યા હતા, અને વેસ્ટ ઈન્ડિઝે શરૂઆતના પછાડા છતાં રેકોર્ડ લક્ષ્ય હાંસલ કરવા માટે મજબૂત વાપસી કરી હતી. ભારત માટે આ શ્રેણીનું સકારાત્મક પાસું કેપ્ટન શ્રેયસ ઐયરનું ફોર્મમાં વાપસી છે. તેણે પહેલી મેચમાં અણનમ 102 રન બનાવ્યા હતા અને બીજી મેચમાં 18 બોલમાં 40 રનની તોફાની ઇનિંગ રમી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ