ક્રાઈમ / ભાવનગરના ગારીયાધારમાં ખૂની ખેલ, જૂની અદાવતમાં આધેડની હત્યા

ભાવનગર જિલ્લાના ગારીયાધાર તાલુકાના વીરડી ગામે જૂની અદાવતમાં આધેડની હત્યા થયાની ઘટના સામે આવી છે. ગામના 58 વર્ષીય આનંદભાઈ કંટારિયા પર જીવલેણ હુમલો કરવામાં આવ્યો હોવાનો તેમના પરિવારજનોએ આક્ષેપ કર્યો છે. ગંભીર ઇજાઓને પગલે તેમને સારવાર માટે ભાવનગર ખસેડવામાં આવ્યા હતા, જ્યાં સારવાર દરમિયાન તેમનું મોત નીપજ્યું હતું.

મળતી માહિતી મુજબ, આનંદભાઈ કંટારિયા આજે પોતાના ઘરે હાજર હતા તે દરમિયાન તેમના પર હુમલો કરવામાં આવ્યો હોવાનો પરિવારનો આરોપ છે. આ હુમલામાં એક મહિલા સહિત કુલ સાત લોકો સંડોવાયેલા હોવાનો પણ પરિવારજનોએ આક્ષેપ કર્યો છે. જોકે, આ મામલે પોલીસ તપાસ બાદ જ સમગ્ર હકીકત સ્પષ્ટ થશે.

પ્રાથમિક માહિતી અનુસાર, જૂના જમીન વિવાદને લઈને અગાઉ પણ બંને પક્ષો વચ્ચે તકરાર થઈ હતી. આશરે એક વર્ષ પહેલાં પણ આ મુદ્દે બબાલ થઈ હોવાનું જાણવા મળ્યું છે. જૂની અદાવતના કારણે જ આ હુમલો થયો હોવાની આશંકા વ્યક્ત કરવામાં આવી રહી છે.

હુમલામાં ગંભીર રીતે ઇજાગ્રસ્ત થયેલા આનંદભાઈને તાત્કાલિક સારવાર માટે ભાવનગર લઈ જવામાં આવ્યા હતા. જોકે, સારવાર દરમિયાન તેમનું મોત થતાં પરિવાર પર આભ તૂટી પડ્યું હતું.

આ પણ વાંચોઃ જૂનાગઢના કેશોદમાં યુવકનું મો*ત, પ્રેમપ્રકરણની આશંકા વચ્ચે રેલવે પોલીસની તપાસ શરૂ

આ ઘટનાને પગલે ગારીયાધાર પોલીસે હત્યાનો ગુનો નોંધવા સહિતની કાયદેસરની કાર્યવાહી હાથ ધરી છે. હુમલામાં કોણ-કોણ સંડોવાયેલું છે અને ઘટનાનું ચોક્કસ કારણ શું છે તે સહિતના મુદ્દાઓ પર પોલીસ તપાસ હાથ ધરશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ