હવામાન / હળવદમાં મગફળીને પાણી પીવડાવતી વખતે ખેતરમાં ત્રાટકી વીજળી, માતા અને 4 વર્ષીય પુત્રનું મોત

ગુજરાતમાં વરસાદનો નવો રાઉન્ડ શરુ થયો છે. આ સાથે આકાશી વીજળી આફત બનીને ત્રાટકી છે. હળવદના માથક ગામની સીમમાં વિજળી પડવાથી માતા પુત્રના મોત હતા. ખેત શ્રમિક મનકુબેન નાયકા (28) શ્યામ રાકેશ નાયકા મગફળીમાં પિયત કરતા હતા અને આ દરમિયાન વીજળી ત્રાટકી હતી જેમાં બન્નેના મોત થયા હતા. બંનેના મૃતદેહને ચરાડવા હોસ્પિટલમાં પીએમ અર્થે ખસેડવામાં આવ્યા હતા તથા ઘટના અંગે હળવદ પોલીસને જાણ કરવામાં આવી હતી.

લાંબા વિરામ બાદ ફરી વરસાદ

કચ્છના રાપર અને ભચાઉ તાલુકાના ગ્રામ્ય વિસ્તારોમાં લાંબા વિરામ બાદ ફરી વરસાદી માહોલ જોવા મળ્યો છે. ભચાઉના વાંઢીયામાં વરસાદી ઝાપટું પડતાં સ્થાનિકોને રાહત મળી હતી, જ્યારે રાપરના ચિત્રોડ અને ગેડી વિસ્તારમાં પણ ઝરમર વરસાદ વરસ્યો હતો. રાપર તાલુકાના ખેંગારપર, સુવઈ સહિતના આસપાસના વિસ્તારોમાં પણ વરસાદ નોંધાયો હતો. વરસાદ બાદ કેટલાક માર્ગો પર પાણી વહી નીકળતા રસ્તાઓ ભીના બન્યા હતા. બીજી તરફ નખત્રાણા તાલુકાના કોટડા (જડોદર) ગામમાં પણ વરસાદ વરસતા ગ્રામ્ય પંથકમાં ઠંડક પ્રસરી હતી.

રાજ્યમાં 4 વરસાદી સિસ્ટમ સક્રિય, અમદાવાદમાં યલો તો ભરૂચ-નવસારી-દમણ-વલસાડમાં રેડ એલર્ટ

હળવદ પંથકમાં મેઘરાજાની તોફાની બેટિંગ

હળવદ પંથકમાં દોઢ મહિના જેટલા લાંબા વિરામ બાદ આજે ફરી મેઘરાજાએ પધરામણી કરી છે. દિવસભર વાદળછાયું અને વરસાદી વાતાવરણ વચ્ચે બપોરના સમયે ધીમીધારે વરસાદ શરૂ થતાં શહેર સહિત આસપાસના વિસ્તારોમાં ઠંડક પ્રસરી હતી. હળવદ શહેર ઉપરાંત ઘનશ્યામપુર, સાપકડા, ભલગામડા, માનસર સહિતના ગ્રામ્ય વિસ્તારોમાં પણ વરસાદી ઝાપટાં પડતાં લોકોમાં ખુશીની લાગણી જોવા મળી હતી. લાંબા વિરામ બાદ વરસેલા વરસાદથી ખેડૂતોમાં પણ રાહતની લાગણી પ્રસરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ