કોંગ્રેસ મુખ્યમંત્રી પદનો ચહેરો નહીં કરે જાહેર: સૂત્ર
કોંગ્રેસ CM પદનો ચહેરો જાહેર નહીં કરે: સૂત્ર
ગુજરાતમાં વિધાનસભા ચૂંટણીને આડે હવે ગણતરીના મહિનાઓ રહ્યા છે. આ વખતે ચૂંટણીમાં ત્રી પાંખિયો જંગ ખેલાવાનો છે. હાલમાં ગુજરાત કોંગ્રેસમાં સ્થાનિક મુદ્દાઓ અને વર્તમાન સ્થિતિને લઇ ચિંતન થઈ રહ્યું છે. ત્યારે ગુજરાત વિધાનસભાની ચૂંટણીને લઇ મહત્વના સમાચાર મળી રહ્યા છે કે ગુજરાત વિધાનસભા ચૂંટણીને લઇને કોંગ્રેસ સામૂહિક નેતૃત્વમાં ચૂંટણી લડશે તેમ સૂત્રો દ્વારા માહિતી મળી છે. ગુજરાતમાં કોંગ્રેસ સીએમ પદનો ચહેરો જાહેર નહી કરે તેમ સૂત્રો તરફથી જાણવા મળ્યું છે.
પવન ખેરાને ગુજરાત મીડિયા વિભાગની જવાબદારી: સૂત્ર
તો સૂત્રો તરફથી એ પણ માહિતી સામે આવી છે કે પવન ખેરા ગુજરાત કોંગ્રેસ મીડિયા વિભાગનું કામ સંભાળશે. ચૂંટણી સુધી પવન ખેરાને ગુજરાત મીડિયા વિભાગની જવાબદારી સોંપવામાં આવી છે. મહત્વનું છે કે ગઇકાલે ગુજરાતની ચૂંટણીને લઈ દિલ્હી ખાતે બેઠક મળી હતી. જે બેઠકમાં પ્રિયંકા ગાંધી, કે.સી.વેણુગોપાલ, પી.ચિદમ્બરમ, જયરામ રમેશ, મુકુલ વાસનીક,અજય માકન,સુરજેવાલા પણ હાજર રહ્યા હતા. પ્રદેશ કોંગ્રેસના સિનિયર નેતાઓ સાથે પણ ચર્ચા વિચારણા કરવામા આવી હતી. જેમાં આ નિર્ણય લેવાયો છે કોંગ્રેસ ગુજરાત અને હિમાચલમાં સીએમ પદનો ચહેરો જાહેર કરશે નહીં.
ગુજરાત કોંગ્રેસ CM પદનો ચહેરો જાહેર નહીં કરે-રઘુ શર્મા
ઉલ્લેખનીય છે કે 4 જુલાઇના રોજ કોંગ્રેસ પ્રદેશ પ્રભારી રધુ શર્માએ નિવેદન આપતા કહ્યું હતું કે ગુજરાત કોંગ્રેસ CM પદનો ચહેરો જાહેર નહીં કરે, ચૂંટણી પછી જીત બાદ CM પદનો ચહેરો નક્કી કરાશે તેવી સ્પષ્ટતા તેમણે કરી હતી. મહત્વનું છે કે સીએમ ચહેરો જાહેર કરે તો કોઈ મોટો વર્ગ નારાજ થવાની ભીતિ કોંગ્રેસને અંદરો અંદર સતાવી રહી છે જેને કારણે સૌને પડખે રાખવા કોંગ્રેસે સ્પષ્ટતા કરી દીધી છે કે ચૂંટણીમાં કોંગ્રેસ સીએમ ચહેરા વગર જ નૈયા પાર કરાવશે.