ગુજરાત / સોના-ચાંદીના ભાવમાં તેજીની અસર, યુનિવર્સિટીઓમાં ગોલ્ડ મેડલ મોંઘા

સોના-ચાંદીના ભાવમાં સતત વધારાની અસર હવે ગુજરાતની યુનિવર્સિટીઓના પદવીદાન સમારોહમાં અપાતા ગોલ્ડ મેડલ પર પણ જોવા મળી રહી છે. કેટલીક યુનિવર્સિટીઓમાં મેડલનો ખર્ચ બમણાથી વધુ થયો છે, જ્યારે કેટલીક સંસ્થાઓએ વર્ષો પહેલાં દાતાઓના સહયોગથી શરૂ કરાયેલા મેડલ બંધ કર્યા છે અથવા તેને ચાલુ રાખવા માટે વધુ રકમની માગણી કરી છે.

ગુજરાત યુનિવર્સિટી (જીયુ)માં ગોલ્ડ મેડલ શરૂ કરવા માટે જરૂરી દાતાની રકમ વર્ષ ૨૦૧૯માં રૂ. ૫૦,૦૦૦થી વધીને રૂ. એક લાખ અને હવે રૂ. બે લાખ થઈ ગઈ છે. દરેક મેડલમાં ૨૪ કેરેટ સોનાનું પ્લેટિંગ ધરાવતી ૩૦ ગ્રામ ચાંદીનો ઉપયોગ થાય છે. જીયુ દર વર્ષે ૪૦૦થી વધુ મેડલ આપે છે. તેનો ખર્ચ ફિક્સ્ડ ડિપોઝિટમાંથી મળતા વ્યાજ તથા દાતાઓના યોગદાનમાંથી કરવામાં આવે છે. ગુજરાત યુનિવર્સિટીએ દાતાઓની સંમતિ ન મળતાં આશરે ૪૦ મેડલ બંધ કર્યા છે. યુનિવર્સિટીના અધિકારીએ જણાવ્યું હતું કે ચાંદી અને સોનાના ભાવમાં વધારો થતાં આગામી પદવીદાન સમારોહ પહેલાં યોગ્ય પગલાં લેવામાં આવશે.

જીટીયુમાં ૫૦ ગ્રામના સિલ્વર મેડલનો ખર્ચ પણ વધ્યો

ગુજરાત ટેક્નોલોજિકલ યુનિવર્સિટી (જીટીયુ)ના રજિસ્ટ્રાર ડો. કે. એન. ખેરે જણાવ્યું હતું કે ગયા વર્ષે ૫૦ ગ્રામના સિલ્વર મેડલનો ખર્ચ રૂ. ૪,૮૯૯ હતો, જે જાન્યુઆરીમાં વધીને રૂ. ૮,૨૯૯ થયો છે. ગોલ્ડ મેડલની વાત કરીએ તો તેનો ખર્ચ હવે આશરે રૂ. ૧૨,૫૦૦ સુધી પહોંચ્યો છે. જીટીયુ દર વર્ષે આશરે ૧૫૦ મેડલ આપે છે, જેમાંથી ૫૫ મેડલ દાતાઓના સહયોગથી આપવામાં આવે છે. બાકીના મેડલનો ખર્ચ યુનિવર્સિટી ભોગવે છે. ગોલ્ડ મેડલ માટે ઓછામાં ઓછું રૂ. ત્રણ લાખનું દાન જરૂરી છે અને વધતા ખર્ચને ધ્યાનમાં રાખીને યુનિવર્સિટીએ દાતાઓનો સંપર્ક શરૂ કર્યો છે. મહારાજા સયાજીરાવ યુનિવર્સિટી (એમએસયુ)માં ૫૦ ગ્રામના ગોલ્ડ મેડલનો ખર્ચ ગયા વર્ષે આશરે રૂ. ૫,૩૦૦ હતો, જે આ વર્ષે વધીને રૂ. ૧૧,૫૦૦ થયો છે. ૯૯૯ શુદ્ધતાની ચાંદીના મેડલ પર ૧૪ માઇક્રોન સોનાનું કોટિંગ કરવામાં આવે છે. ૨૩ સપ્ટેમ્બરે યોજાનારા યુનિવર્સિટીના ૭૫મા પદવીદાન સમારોહમાં ૨૧૦ વિદ્યાર્થીઓને આવા મેડલ આપવામાં આવશે. આ સમારોહમાં રાષ્ટ્રપતિ દ્રૌપદી મુર્મુ મુખ્ય અતિથિ તરીકે ઉપસ્થિત રહેશે.

સહયોગથી શરૂ કરાયેલા 100થી વધુ મેડલ બંધ

MSUએ આશરે ૨૫ વર્ષ પહેલાં દાતાઓના સહયોગથી શરૂ કરાયેલા 100થી વધુ મેડલ બંધ કર્યા છે, કારણ કે જૂના દાતાઓને હાલના નાણાકીય ધોરણે ફરીથી રકમ આપવાનું કહેવામાં આવ્યું હતું. એમએસયુના મુખ્ય હિસાબ અધિકારી જિગર જોશીના જણાવ્યા મુજબ અગાઉ ગોલ્ડ મેડલ માટે દાતાએ રૂ. ૫૦,૦૦૦ આપવાના હતા, જે તે પછી રૂ. એક લાખ અને હવે ૨૫ વર્ષ માટે રૂ. બે લાખ થઈ ગયા છે. યુનિવર્સિટીએ ૨૫ વર્ષનો સમયગાળો પૂર્ણ કરનારા મેડલના દાતાઓનો પણ સંપર્ક કર્યો છે.

વીર નર્મદ દક્ષિણ ગુજરાત યુનિવર્સિટીમાં પણ ખર્ચ વધ્યો

વીર નર્મદ દક્ષિણ ગુજરાત યુનિવર્સિટીમાં ગોલ્ડ મેડલ શરૂ કરવા માટે જરૂરી દાતાની રકમ રૂ. બે લાખથી વધારીને રૂ. ત્રણ લાખ કરવામાં આવી છે, જ્યારે રોકડ પુરસ્કાર માટેનો ખર્ચ રૂ. ૫૦,૦૦૦થી બમણો થઈને રૂ. એક લાખ થયો છે. યુનિવર્સિટીએ જૂના દાતાઓને નવી રકમ મુજબ યોગદાન આપવા વિનંતી કરી છે. દાતા વધુ રકમ આપવા તૈયાર ન હોય તો બાકીનો તફાવત યુનિવર્સિટી ભોગવશે.

આ પણ વાંચો : અમદાવાદીઓને ફ્લાવર શો મોંઘો પડશે, સુંદર દેખાડવા માટે AMC કરશે અધધધ ખર્ચો

વીર નર્મદ દક્ષિણ ગુજરાત યુનિવર્સિટી પાસે કુલ ૧૬૫ દાતા છે, જેમાંથી ૧૦૭ ગોલ્ડ મેડલ અને ૫૮ રોકડ પુરસ્કારોને પ્રાયોજિત કરે છે. યુનિવર્સિટી વર્ષમાં બે પદવીદાન સમારોહ યોજે છે. ગયા મહિને યોજાયેલા સમારોહમાં ૧૦૬ વિદ્યાર્થીઓને ગોલ્ડ મેડલ આપવામાં આવ્યા હતા અને દરેક મેડલ માટે યુનિવર્સિટીએ વેન્ડરને રૂ. ૭,૦૦૦ ચૂકવ્યા હતા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ