દુઃખદ / સુરતના કડોદમાંથી ડોક્ટરનો મૃતદેહ મળ્યો, પોલીસે અકસ્માત મોતનો ગુનો નોંધી તપાસ શરૂ કરી

સુરત જિલ્લાના બરડોલી તાલુકાના કડોદ વિસ્તારમાં એક ચોંકાવનારી ઘટના સામે આવી છે, જ્યાં ઉમેશ ચૌધરી નામના ડોક્ટરનો મૃતદેહ તેમની જ કારમાંથી મળી આવ્યો છે. પ્રાથમિક માહિતી અનુસાર મૃતદેહ શંકાસ્પદ પરિસ્થિતિમાં અને દાઝેલી હાલતમાં મળ્યો હતો, જેના કારણે ઘટનાએ ગંભીર પ્રશ્નો ઊભા કર્યા છે.

મૃતક ડૉ. ઉમેશ ચૌધરી બરડોલી નજીકના કડોદ કોમ્યુનિટી હેલ્થ સેન્ટર (CHC) ખાતે અધિક્ષક તરીકે ફરજ બજાવતા હતા. તેઓ મૂળ માંડવી તાલુકાના બડતલ ગામના રહેવાસી હોવાનું જાણવા મળ્યું છે. સ્થાનિક લોકોમાં આ ઘટના અંગે આશ્ચર્ય અને શોકની લાગણી ફેલાઈ ગઈ છે.

પ્રાથમિક અનુમાન મુજબ ભારે ગરમીને કારણે કારની અંદર તાપમાન વધી જવાથી આ દુર્ઘટના સર્જાઈ હોવાની શક્યતા વ્યક્ત કરવામાં આવી રહી છે. જોકે, મૃતદેહ દાઝેલી હાલતમાં મળતા ઘટના પાછળના સાચા કારણો અંગે સસ્પેન્સ યથાવત છે.

આ પણ વાંચોઃ બનાસકાંઠામાં ગેનીબેન ઠાકોરનો હુમલો, “સરકારમાં બેઠેલા લોકોએ અન્યાય કર્યો”

પોલીસે હાલમાં અકસ્માત મોતનો ગુનો નોંધી વધુ તપાસ હાથ ધરી છે. ઘટનાના તમામ પાસાઓને ધ્યાનમાં રાખીને તપાસ કરવામાં આવી રહી છે, જેથી મૃત્યુ પાછળનું સાચું કારણ બહાર આવી શકે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ