જોધપુરમાં જુલમ / ધર્મના ભાઈ ગુલ મોહમ્મદે અનિતા ચોધરીને 6 ટુકડામાં કાપીને ઘરમાં દફનાવી, ભેદ ખુલતાં ડર ફેલાયો

રાજસ્થાનના જોધપુરમાં એક એવી ભયાનક ઘટના સામે આવી છે જેણે લોકોને ચોંકાવી દીધા છે. અનિતા ચૌધરી નામની 50 વર્ષીય મહિલા બે દિવસ પહેલા ગુમ થઈ હતી. પોલીસને તેની લાશ છ ટુકડાઓમાં મળી આવી હતી. આરોપીના ઘર પાસેના ઊંડા ખાડામાં પ્લાસ્ટિકની થેલીઓમાં દાટી ગયેલા શરીરના અંગો મળી આવ્યા હતા. પોલીસને આશંકા છે કે આ ઘટના પાછળ ગુલ મોહમ્મદ નામના વ્યક્તિનો હાથ હોઈ શકે છે, જેની શોધ ચાલી રહી છે.

પત્નીએ કહ્યું પતિએ અનિતાની હત્યા કરીને લાશ દાટી દીધી

27 ઓક્ટોબરના રોજ અનીતા ચૌધરીના ગુમ થયાની ફરિયાદ તેના પતિ મનમોહન ચૌધરીએ સરદારપુરા પોલીસ સ્ટેશનમાં નોંધાવી હતી. તપાસ દરમિયાન પોલીસને અનીતાના ફોન પરથી ગુલ મોહમ્મદ નામના વ્યક્તિના સંપર્કની માહિતી મળી, ત્યારબાદ પોલીસે ગંગાના ગામમાં આરોપીના ઘરે તપાસ કરી. પૂછપરછ દરમિયાન, ગુલ મોહમ્મદની પત્નીએ શરૂઆતમાં કોઈ માહિતી આપવાનો ઇનકાર કર્યો હતો, પરંતુ કડક પૂછપરછ કરવામાં આવતા તેણે જણાવ્યું હતું કે તેના પતિએ અનિતાની હત્યા કરી હતી અને લાશને ઘરની પાછળ દાટી દીધી હતી.

12 ફૂટ ઊંડા ખાડામાંથી નીકળી અંગો ભરેલી થેલી

એડીસીપી નિશાંત ભારદ્વાજની આગેવાની હેઠળની પોલીસ ટીમે જેસીબીની મદદથી 12 ફૂટ ઊંડો ખાડો ખોદ્યો હતો, જેમાં પ્લાસ્ટિકની થેલીઓમાં શરીરના અંગો મળી આવ્યા હતા. તપાસમાં જાણવા મળ્યું કે લાશને 6 ટુકડામાં કાપવામાં આવી હતી.

પ્લાન બનાવીને કરી હતી હત્યા

અનીતા ચૌધરી સરદારપુરા બી રોડ સ્થિત અગ્રવાલ ટાવરમાં પોતાનું બ્યુટી પાર્લર ચલાવતી હતી, જ્યારે આરોપી ગુલ મોહમ્મદની દુકાન પણ આ જ ટાવરમાં હતી, જેના કારણે બંનેની ઓળખાણ થઈ હતી. 28 ઓક્ટોબરના રોજ અનિતા છેલ્લી વખત તેના બ્યુટી પાર્લરમાંથી બહાર નીકળી હતી, ત્યારબાદ તે ઘરે પરત ફરી ન હતી. આ પછી તેના પતિ મનમોહને ગુમ થયાની ફરિયાદ નોંધાવી હતી. સીસીટીવી ફૂટેજમાં અનિતા એક ઓટોમાં જતી જોવા મળી હતી, જેના ઓટો ચાલકે પોલીસને ગંગાના ગામ પહોંચવાની જાણ કરી હતી.પોલીસે આરોપીની પત્નીને કસ્ટડીમાં લીધી છે અને ગુલ મોહમ્મદની શહેરના ઘણા વિસ્તારોમાં શોધખોળ કરવામાં આવી રહી છે. પોલીસે જણાવ્યું હતું કે હત્યાનું અગાઉથી આયોજન કરવામાં આવ્યું હતું કારણ કે આરોપીએ તેના ઘરની નજીક ખાડો ખોદી નાખ્યો હતો. અનિતાના પુત્રનો આરોપ છે કે ગુલ મોહમ્મદે તેની માતાને છેતરીને તેની હત્યા કરી હતી. પોલીસ હવે આરોપીઓની શોધમાં જોધપુરના વિવિધ વિસ્તારોમાં દરોડા પાડી રહી છે.

કેમ કરી હત્યા

આરોપી ગુલ મોહમ્મદે અનિતાની હત્યા કેમ કરી હતી તેને લઈને રહસ્ય ઘેરાયું છે. શું બન્ને પ્રેમમાં હતા કે પછી બીજી કોઈ વાતે હત્યા થઈ હતી તેને લઈને પોલીસ તપાસ કરી રહી છે.

આરોપી અનિતા ચોધરીને ધર્મની બહેન માનતો

આરોપી ગુલ મોહમ્મદે છેલ્લા 20 વર્ષથી અનિતા ચોધરીને ધર્મની બહેન માનતો હતો હવે મોટું રહસ્ય એ છે કે તેણે પોતાની ધર્મની બહેનની હત્યા શા માટે કરી. અનિતા ચોધરી બ્યૂટી પાર્લરની સાથે પ્રોપર્ટી ડીલર હોવાનું પણ જણાવાઈ રહ્યું છે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ