અપડેટ / ભાવનગર ડુપ્લીકેટ દારૂકાંડમાં વધુ એકનું મોત, અત્યાર સુધીમાં કુલ 62 શખ્સોને થઇ છે અસર

ભાવનગરમાં સર્જાયેલા ચકચારી નકલી દારૂકાંડમાં વધુ એક વ્યક્તિનું મોત થતાં મૃત્યુઆંક વધીને 14 પર પહોંચી ગયો છે. નકલી દારૂના સેવનથી અસરગ્રસ્ત રિક્ષાચાલકે સારવાર દરમિયાન અંતિમ શ્વાસ લેતા સમગ્ર મામલો વધુ ગંભીર બન્યો છે.

નકલી દારૂકાંડમાં અત્યાર સુધીમાં કુલ 62 લોકો અસરગ્રસ્ત થયા હોવાનું સામે આવ્યું છે. જ્યારે આ સમગ્ર મામલે પોલીસે અત્યાર સુધીમાં 40 આરોપીઓની ધરપકડ કરી છે. ધરપકડ કરાયેલા તમામ આરોપીઓના રિમાન્ડ પૂર્ણ થતાં તેમને જ્યુડિશિયલ કસ્ટડીમાં મોકલી દેવામાં આવ્યા છે.

બીજી તરફ, સમગ્ર કાંડમાં પોલીસ કર્મચારીઓની સંડોવણી સામે આવતા તંત્ર દ્વારા કડક કાર્યવાહી કરવામાં આવી છે. 2 PI સહિત કુલ 5 પોલીસ કર્મચારીઓને સસ્પેન્ડ કરવામાં આવ્યા છે. પોલીસ કર્મચારીની સંડોવણી સામે આવ્યા બાદ એક પોલીસ કર્મચારીની ધરપકડ પણ કરવામાં આવી છે.

નકલી દારૂકાંડની તપાસને આજે 24મો દિવસ છે. સમગ્ર મામલાની તપાસ SMC દ્વારા હાથ ધરવામાં આવી રહી છે. જોકે, છેલ્લા 5 દિવસથી SMC દ્વારા કોઈ નવા આરોપીની ધરપકડ કરવામાં આવી નથી, જેના કારણે તપાસની ગતિને લઈને પણ સવાલો ઉઠી રહ્યા છે.

આ પણ વાંચોઃ સુરતના ભટારમાં માસૂમ સાથે હેવાનિયત, 9 વર્ષની બાળકીની આપવીતીથી ખુલ્યું 45 વર્ષીય ઢગાનું કાળું કૃત્ય

એક તરફ નકલી દારૂના કારણે વધુ એક વ્યક્તિનું મોત થતાં મૃત્યુઆંક 14 પર પહોંચ્યો છે, તો બીજી તરફ તપાસના 24મા દિવસે પણ નવા આરોપીઓ સામે કાર્યવાહી ન થતાં હવે તપાસ ક્યાં સુધી પહોંચે છે તેના પર સૌની નજર છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ