કાર્યવાહી / બનાસકાંઠાના હડાદમાં ‘લૂંટેરી દુલ્હન’ ગેંગ ઝડપાઈ, 7 આરોપી ઝડપાયા

બનાસકાંઠા: હડાદમાં લગ્ન કરાવવાની લાલચ આપી યુવક સાથે છેતરપિંડી કરનારી કથિત ઠગ ટોળકીનો પોલીસે પર્દાફાશ કર્યો છે. યુવક પાસેથી રોકડા ₹1.50 લાખ તથા ચાંદીનું મંગળસૂત્ર પડાવી લીધા બાદ તેને માર મારી ધમકાવી ભગાડી મૂક્યાનો આરોપ છે. હડાદ પોલીસે ટેકનિકલ સર્વેલન્સના આધારે તપાસ હાથ ધરી દુલ્હન સહિત કુલ 7 આરોપીઓને ઝડપી પાડ્યા છે.

કન્યા બતાવી ચાંદલા વિધિ કરાવ્યાનો આરોપ

પોલીસના જણાવ્યા મુજબ, ટોળકીએ યુવકને લગ્ન માટે કન્યા બતાવી હતી. ત્યારબાદ લગ્નની વાત આગળ વધારી કથિત રીતે ચાંદલા વિધિ પણ કરાવવામાં આવી હતી. આ પ્રક્રિયા દરમિયાન યુવક પાસેથી ₹1.50 લાખ રોકડા અને ચાંદીનું મંગળસૂત્ર લેવામાં આવ્યું હોવાનો આક્ષેપ છે.

પૈસા લીધા બાદ યુવકને માર મારી ભગાડ્યો

આરોપ છે કે રકમ અને મંગળસૂત્ર પડાવ્યા બાદ યુવક સાથે મારપીટ કરવામાં આવી હતી. તેને ધમકી આપી ત્યાંથી ભગાડી મૂકવામાં આવ્યો હોવાની ફરિયાદના આધારે પોલીસે તપાસ શરૂ કરી હતી.

ટેકનિકલ સર્વેલન્સથી ટોળકી સુધી પહોંચી પોલીસ

હડાદ પોલીસે સમગ્ર મામલે ટેકનિકલ સર્વેલન્સ અને અન્ય તપાસના આધારે કથિત ઠગ ટોળકીની કડી મેળવી હતી. તપાસ બાદ દુલ્હન સહિત કુલ 7 આરોપીઓને ઝડપી લેવામાં આવ્યા છે. જેમાં દુલ્હન ઉપરાંત બે કથિત દલાલની પણ ધરપકડ કરવામાં આવી હોવાનું સામે આવ્યું છે.

આ પણ વાંચોઃ હવામાન વિભાગની આગાહી, આગામી 7 દિવસ અહીં પડશે વરસાદ, સપ્ટેમ્બરમાં આ વિસ્તારમાં મેઘો કરશે તાંડવ

ઠગાઈનો મુદ્દામાલ કબજે

પોલીસે આરોપીઓ પાસેથી ઠગાઈના કેસ સાથે સંકળાયેલો તમામ મુદ્દામાલ કબજે કર્યો છે. હાલ આરોપીઓ સામે કાયદેસરની કાર્યવાહી હાથ ધરવામાં આવી છે અને સમગ્ર મામલે વધુ તપાસ ચાલી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ