દુખદ / 'મેરી એક ટાંગ નકલી હૈ...' ફેમ અભિનેતા મુશ્તાક ખાને 56 વર્ષની ઉંમરે લીધા અંતિમ શ્વાસ, કેન્સર સામે જંગ હાર્યા

હિન્દી સિનેમા અને ટેલિવિઝન જગતમાંથી એક ખૂબ જ દુઃખદ સમાચાર સામે આવ્યા છે. 'વેલકમ', 'ગદર: એક પ્રેમ કથા' અને 'જોડી નંબર 1' જેવી સુપરહિટ ફિલ્મોમાં પોતાની સહ-કલાકાર અને કોમેડિયન તરીકેની યાદગાર ભૂમિકાઓથી દર્શકોને ખડખડાટ હસાવનાર અનુભવી કલાકાર મુશ્તાક ખાનનું 56 વર્ષની જૈફ વયે અવસાન થયું છે.

લાંબા સમયથી ગંભીર બીમારી સામે ઝઝૂમી રહેલા મુશ્તાક ખાનને મુંબઈની પ્રખ્યાત નાનાવટી હોસ્પિટલમાં દાખલ કરવામાં આવ્યા હતા. સૂત્રોના જણાવ્યા અનુસાર, તેમને આશરે 5 વર્ષ પહેલાં કેન્સર નિદાન થયું હતું. સારવાર બાદ તેમની સ્થિતિમાં સુધારો આવ્યો હતો, પરંતુ તાજેતરમાં બીમારી ફરી ઉથલો મારતાં તેમની તબિયત વધુ લથડી હતી. ડૉક્ટરોના અથાક પ્રયાસો છતાં તેઓ જિંદગીની જંગ હારી ગયા હતા. તેમના પાર્થિવ દેહના અંતિમ સંસ્કાર 25 સપ્ટેમ્બરના રોજ મુંબઈ ખાતે કરવામાં આવશે.

ટૂંકી ફિલ્મોથી કરી હતી કારકિર્દીની શરૂઆત

મુશ્તાક ખાને 1980ના દશકમાં ટૂંકી ફિલ્મો (Short Films) દ્વારા પોતાની એક્ટિંગ કરિયરની શરૂઆત કરી હતી. ધીમે ધીમે તેમણે નાના પડદા એટલે કે ટેલિવિઝન તરફ પ્રયાણ કર્યું. તેમણે 'ભારત એક ખોજ', 'નુક્કડ', 'અદાલત' અને 'કુછ રંગ પ્યાર કે એસે ભી' જેવા અનેક લોકપ્રિય ટીવી સીરિયલ્સમાં પોતાની ઉત્કૃષ્ટ અદાકારીનો પરિચય આપ્યો હતો.

આ પણ વાંચોઃ ''હું સરળતાથી કોઈને માફ નથી કરતી'', રૂમર્ડ ગર્લફ્રેન્ડને જોઈ ગોવિંદા પર ભડકી સુનીતા આહુજા

મોટા પડદે જમાવ્યો સિક્કો: 'વેલકમ'નો 'બલ્લૂ' અમર થઈ ગયો

નાના પડદા પર સફળતા મેળવ્યા બાદ તેમણે બોલિવૂડની મોટા બજેટની ફિલ્મોમાં પ્રવેશ કર્યો. તેમણે 'હમ હૈ રાહી પ્યાર કે', 'હેરા ફેરી', 'મુઝસે શાદી કરોગી', 'જોડી નંબર 1' અને 'વેલકમ' જેવી યાદગાર ફિલ્મોમાં કામ કર્યું. વિશેષ કરીને 2007માં આવેલી ફિલ્મ 'વેલકમ'માં તેમના 'બલ્લૂ' નામના પાત્રને અને તેમના કોમિક ટાઇમિંગને દર્શકોએ અનહદ પ્રેમ આપ્યો હતો. તાજેતરમાં તેઓ 'ભાભીજી ઘર પર હૈં!' આધારિત કોમેડી ફિલ્મમાં પણ નજરે પડ્યા હતા, જેમાં તેમના રોલની ખૂબ પ્રશંસા થઈ હતી. તેમના નિધનના સમાચારથી બોલિવૂડ અને ટીવી ઇન્ડસ્ટ્રીમાં શોકની કાળી ડિબંગ છવાઈ ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ