નેશનલ / ‘KGF’ ફેમ અનંત નાગને દાદાસાહેબ ફાળકે એવોર્ડ, PM મોદીએ પાઠવી શુભેચ્છા

ભારતીય સિનેમામાં પોતાના શાનદાર, સહજ અને યાદગાર અભિનયથી અપ્રતિમ પ્રદાન આપનારા જ્યેષ્ઠ અભિનેતા અનંત નાગને દાદાસાહેબ ફાળકે એવોર્ડથી નવાજવામાં આવ્યા છે. કન્નડ ફિલ્મ ઈન્ડસ્ટ્રીના આધારસ્તંભ ગણાતા અનંત નાગે હિન્દી, તેલુગુ, તમિલ, મલયાલમ, મરાઠી અને અંગ્રેજી ભાષાની ફિલ્મોમાં પણ પોતાની બહુમુખી પ્રતિભાનો ડંકો વગાડ્યો છે.

કોણ છે અનંત નાગ? જાણો તેમની ગોલ્ડન સિને સફર

4 સપ્ટેમ્બર 1948 ના રોજ જન્મેલા અનંત નાગનું પૂરું નામ અનંત નાગરકટ્ટે છે. તેમણે પોતાની લાંબી ફિલ્મ સફરમાં 300 થી પણ વધુ ફિલ્મોમાં કામ કર્યું છે. કન્નડ સિનેમામાં લીડ એક્ટર તરીકે તેમની શરૂઆત 'સંકલ્પ' ફિલ્મથી થઈ હતી. ત્યારબાદ તેમણે ગંભીર પાત્રોથી લઈને પારિવારિક અને કોમેડી ભૂમિકાઓ ખૂબ જ સહજતાથી ભજવી હતી. નવી પેઢી વચ્ચે તેઓ બ્લોકબસ્ટર ફિલ્મ 'KGF' (KGF Chapter 1) માં પોતાના દમદાર અભિનય અને અવાજને કારણે ખૂબ લોકપ્રિય બન્યા હતા. હિન્દી સિનેમા ક્ષેત્રે તેમણે 'અંકુર', 'ભૂમિકા', 'કાલીચરણ' અને 'જુર્મ' જેવી યાદગાર ફિલ્મોથી પોતાની આગવી ઓળખ ઊભી કરી હતી. આ ઉપરાંત, નાના પડદા પર દૂરદર્શનના સુપ્રસિદ્ધ શો 'માલગુડી ડેઝ' (Malgudi Days) માં તેમના અભિનયને આજે પણ લોકો ભાવવિભોર થઈને યાદ કરે છે.

વડાપ્રધાન મોદીએ પાઠવ્યા અભિનંદન

અનંત નાગને આ સર્વોચ્ચ પુરસ્કાર મળતાં વડાપ્રધાન નરેન્દ્ર મોદીએ સોશિયલ મીડિયા પર તેમને અભિનંદન આપતા લખ્યું કે, "લેજન્ડરી અભિનેતા અનંત નાગજીને દાદાસાહેબ ફાળકે પુરસ્કાર મળવા બદલ ખૂબ ખૂબ અભિનંદન. દાયકાઓથી તેમની સહજ અભિનય શૈલી અને બેનમૂન પ્રતિભાએ ભારતીય સિનેમા, ખાસ કરીને કન્નડ સિનેમા પર એક અમીટ છાપ છોડી છે. તેમણે ભજવેલા દરેક પાત્રમાં અનોખી ઊંડાઈ અને વાસ્તવિકતા જોવા મળે છે."

આ પણ વાંચોઃ ગુજરાત સહિત અનેક રાજ્યોમાં વરસાદનો નવો રાઉન્ડ, આજે સપ્ટેમ્બરે આ રાજ્યોમાં પડશે ધોધમાર વરસાદ

ઉલ્લેખનીય છે કે, ભારતીય કળા અને સિનેમા ક્ષેત્રે અદ્ભુત યોગદાન બદલ અનંત નાગને આ પૂર્વે ભારત સરકાર દ્વારા દેશના ત્રીજા સર્વોચ્ચ નાગરિક સન્માન 'પદ્મ ભૂષણ'થી પણ સન્માનિત કરવામાં આવી ચૂક્યા છે. હવે દાદાસાહેબ ફાળકે પુરસ્કારે તેમની આ ગૌરવવંતી યાત્રામાં વધુ એક સોનેરી પ્રકરણ ઉમેર્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ