દુર્દશા / બોટાદમાં વરસાદ પછી રોડ બિસ્માર, ગઢડાથી નિગાળા જતા રોડમાં પડ્યા મસમોટા ખાડા

બોટાદ જિલ્લાના ગઢડા તાલુકામાં તાજેતરમાં પડેલા ભારે વરસાદના કારણે માર્ગોની સ્થિતિ અત્યંત દયનીય બની ગઈ છે. ખાસ કરીને ગઢડાથી નિગાળા તરફ જતા મુખ્ય રોડ પર મસમોટા ખાડાઓ પડી જતાં વાહનચાલકો અને સ્થાનિક રહીશો ભારે હાલાકીનો સામનો કરી રહ્યા છે.

બોટાદ શહેર અને જિલ્લામાં મોડિ રાતથી વરસાદી માહોલ

બોટાદ જિલ્લામાં લાંબા વિરામ બાદ વરસાદી માહોલ છવાયો છે. મોડીરાતથી બોટાદ શહેર સહિત જિલ્લાના ગઢડા, રાણપુર અને બરવાળા તાલુકામાં વરસાદ શરૂ થતાં ખેડૂતોમાં ખુશીનો માહોલ જોવા મળી રહ્યો છે. ગઢડા શહેર તેમજ તાલુકાના ગ્રામ્ય વિસ્તારોમાં ક્યાંક ઝરમર તો ક્યાંક ધીમીધારે વરસાદ વરસ્યો હતો. લાંબા સમયથી વરસાદની રાહ જોઈ રહેલા ખેડૂતો માટે આ વરસાદ રાહતરૂપ બન્યો છે. ખાસ કરીને કપાસ, મગફળી, જુવાર, તલ અને એરંડા સહિતના પાકને વરસાદથી જીવનદાન મળવાની આશા ખેડૂતોમાં જાગી છે. ખેતીના પાકને પાણીની તાતી જરૂરિયાત હતી ત્યારે વરસાદ વરસતા ખેડૂતોના ચહેરા પર ખુશી જોવા મળી રહી છે. વરસાદનું પ્રમાણ વધે તો જિલ્લામાં ખેતીના પાકને વધુ ફાયદો થવાની શક્યતા છે

ભાવનગરમાં ભારે વરસાદ

લાંબા વિરામ બાદ ભાવનગરમાં મેઘરાજાની ધમાકેદાર એન્ટ્રી થઈ છે. શહેરમાં આજે અચાનક વાતાવરણમાં પલટો આવ્યો હતો અને અનેક વિસ્તારોમાં ધોધમાર વરસાદ વરસ્યો હતો. કણબીવાડ, શિવાજી સર્કલ, નિલમબાગ સહિતના વિસ્તારોમાં વરસાદી માહોલ જામ્યો હતો, જ્યારે આતાભાઈ ચોક અને વાઘાવાડી રોડ પર પણ ભારે વરસાદ નોંધાયો હતો. લાંબા સમય બાદ વરસાદ વરસતા કાળઝાળ ગરમી અને ઉકળાટથી ત્રસ્ત લોકોને મોટી રાહત મળી છે. ખુશીની લહેર જોવા મળી રહી છે. વરસાદ ખેતી માટે લાભદાયી સાબિત થવાની આશાએ ખેડૂતોમાં ઉત્સાહનો માહોલ જોવા મળી રહ્યો છે.