અપીલ / અમરેલીમાં ઉડી પેટ્રોલ-ડીઝલ ખૂટવાની અફવા, હજારો લોકો પંપ પર દોડ્યાં, જાણો તંત્ર દ્વારા શું ખુલાસો અપાયો

ઈરાન-ઈઝરાયેલ વચ્ચે ચાલી રહેલ યુદ્ધને લઈ પેટ્રોલ અને ડીઝલ ખૂટવાની અફવાઓ ફેલાતા અમરેલી જિલ્લામાં છેલ્લા બે દિવસથી પેટ્રોલપંપ પર વાહનોની લાંબી કતારો જોવા મળી રહી છે. શહેર તેમજ ગ્રામ્ય વિસ્તારોમાંથી મોટી સંખ્યામાં લોકો પોતાના વાહનોમાં પેટ્રોલ-ડીઝલ પૂરાવવા માટે પેટ્રોલપંપ પર પહોંચી રહ્યા છે.

પેટ્રોલ પંપ પર વાહનોની લાંતી કતારો લાગી

અફવાના કારણે ઘણા લોકો આગોતરા જ ઈંધણ ભરી લેવા દોડી આવ્યા હતા. ખાસ કરીને ખેડૂતો ટ્રેક્ટર તેમજ બેરલ લઈને મોટી સંખ્યામાં ડીઝલ મેળવવા પેટ્રોલપંપ પર પહોંચ્યા હતા. જેના કારણે જિલ્લાના અનેક પેટ્રોલપંપ પર ભારે ભીડ અને વાહનોની લાંબી કતારો લાગી ગઈ હતી.

પેટ્રોલ પંપ સંચાલકોએ વેચાણ બંધ કર્યું

એક સાથે મોટી સંખ્યામાં લોકો ઉમટતા કેટલાક પેટ્રોલપંપ પર થોડા સમય માટે પેટ્રોલ અને ડીઝલ ખૂટી પડ્યા હતા. પરિસ્થિતિને ધ્યાનમાં રાખીને સંચાલકોને તાત્કાલિક રીતે વેચાણ બંધ કરવાની ફરજ પડી હતી.

આ પણ વાંચોઃ 7 માર્ચે અમદાવાદમાં સંભળાશે સાયરનનો અવાજ, પણ ડરતાં નહીં, જાણો શું કારણ

પુરવઠા વિભાગે શું કહ્યું

આ વચ્ચે જિલ્લા પુરવઠા વિભાગે પેટ્રોલ-ડીઝલની અછત અંગે ફેલાતી અફવાઓનું ખંડન કર્યું છે. વિભાગના અધિકારી પ્રતીક કુંભાણીએ જણાવ્યું હતું કે જિલ્લામાં ઈંધણનો પૂરતો જથ્થો ઉપલબ્ધ છે અને કોઈ પણ પ્રકારની ઘટ નથી. લોકોએ અફવાઓ પર વિશ્વાસ ન રાખવા અને અનાવશ્યક રીતે પેટ્રોલપંપ પર ભીડ ન કરવા અપીલ કરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ