અમેરિકા ચૂંટણી / US Elections 2020: જાણો કોના જીતવાથી ગુજરાતીઓને છે ફાયદો

• ડોનાલ્ડ ટ્રમ્પ પોતાના ઇમિગ્રેશનવિરોધી વલણ માટે જાણીતા
• બાઇડન જીતશે તો 5 લાખ ભારતીયો માટે સિટિઝનશિપનો માર્ગ મોકળો
• ટ્રમ્પ અને બાઇડેનનું ભવિષ્ય 8 રાજ્યો પર ટક્યું 

બાઇડન જીતશે તો 5 લાખ ભારતીયો માટે સિટિઝનશિપનો માર્ગ મોકળો

બાઇડન અગાઉ વારંવાર કહી ચૂક્યા છે કે ઇમિગ્રન્ટ્સને કારણે સામાજિક, આર્થિક અને સાંસ્કૃતિક વૈવિધ્યતા આવે છે, સાથે જ બાઈડન વિઝા, ઇમિગ્રેશનને લઈને મોટા સુધારાઓ લાગુ કરવાનું વચન આપી ચૂક્યા છે. એવા ઘણા ગુજરાતી પરિવારો છે જેમના માથે નિષ્કાસનનું સંકટ તોળાયેલું છે ત્યારે બાઇડન એવી જાહેરાત કરી ચૂક્યા છે કે પરિવારો અતૂટ રહે એનો પ્રયાસ કરશે. નિષ્ણાતોના મતે બાઇડન જીતશે તો 5 લાખ ભારતીયો માટે સિટિઝનશિપનો માર્ગ મોકળો બનશે.

 ડોનાલ્ડ ટ્રમ્પ પોતાના ઇમિગ્રેશનવિરોધી વલણ માટે જાણીતા

વિઝા, ઇમિગ્રેશનના કાયદા વધારે કડક બનશે. ડોનાલ્ડ ટ્રમ્પ પોતાના ઇમિગ્રેશનવિરોધી વલણ માટે જાણીતા રહ્યા છે. બોર્ડર પેટ્રોલિંગ, સ્કિલ્ડ વર્કર્સના અમેરિકા પ્રવેશ, ભારતીય પરિવારોના માઇગ્રેશન અને નિષ્કાસનને લઈને ટ્રમ્પની નીતિ આક્રમક રહી છે. ટ્રમ્પ ‘બાય અમેરિકન અને હાયર અમેરિકન’ની હાકલ કરી ચૂક્યા છે. એટલું જ નહીં, એચવન-બી વિઝાના નિયમોને પણ વધુ કડક કર્યા તથા તેના માટેની ફીમાં તોતિંગ વધારો કર્યો હતો.

ટ્રમ્પ અને બાઇડેનનું ભવિષ્ય 8 રાજ્યો પર ટક્યું 

અત્યાર સુધીમાં બાઇડેનને 264 અને ટ્રમ્પને 214 વોટ મળ્યા છે. અમેરિકામાં કુલ 50 રાજ્ય છે. તેમાંથી 22 રાજ્યોમાં ટ્રમ્પે જીત મેળવી છે અને 20 રાજ્યોમાં બાઇડેનની જીત થઈ છે. જ્યારે આઠ રાજ્યોના પરિણામ હજુ જાહેર થયા નથી. જે રાજ્યોના પરિણામ જાહેર થયા નથી ત્યાં કુલ ઇલેક્ટોરલ વોટ્સની સંખ્યા 77 છે. ટ્રમ્પ અને બાઇડેનનું ભવિષ્ય આ રાજ્યો પર ટક્યું છે.