તમારા કામનું / તહેવારોમાં રાહત! વેપારીઓના વિરોધ બાદ UPI પર MDR લાગુ કરવાની મુદત 1 જાન્યુઆરી સુધી ટળી શકે

યુનિફાઈડ પેમેન્ટ્સ ઈન્ટરફેસ (યુપીઆઈ) મારફતે થતા વ્યવહારો પર મર્ચન્ટ ડિસ્કાઉન્ટ રેટ (એમડીઆર) લાગુ કરવાની તારીખ ૧૫ ઓક્ટોબર, ૨૦૨૬થી વધારીને ૧ જાન્યુઆરી, ૨૦૨૭ કરવાની દરખાસ્ત વિચારણા હેઠળ છે. આ મામલાથી વાકેફ સૂત્રોનાં જણાવ્યા અનુસાર, આગામી થોડા દિવસોમાં અંતિમ નિર્ણય લેવાય તેવી શક્યતા છે.

આ મુદત લંબાવવામાં આવે તો તહેવારોની મોસમ પૂરી થાય ત્યાં સુધી વેપારીઓ માટે યુપીઆઈ પેમેન્ટ નિઃશુલ્ક રહેશે. વેપારીઓનાં સંગઠનોનાં વિરોધ બાદ આ નિર્ણય લેવાઈ શકે છે. સૂત્રોનાં જણાવ્યા અનુસાર, એમડીઆર હવે તહેવારોની મોસમ પૂરી થયા બાદ જ અમલમાં આવે તેવી શક્યતા છે. નેશનલ પેમેન્ટ્સ કોર્પોરેશન ઓફ ઈન્ડિયા (એનપીસીઆઈ)ના વડપણ હેઠળની યુપીઆઈ એન્ડ સર્વિસિસ સ્ટિયરિંગ કમિટીની બુધવારે બેઠક મળી હતી. તેમાં એમડીઆર લાગુ કરવાનો સમય અને અન્ય સ્પષ્ટતાઓ અંગે ચર્ચા કરવામાં આવી હતી. વેપારીઓનાં સંગઠનોએ પ્રસ્તાવિત એમડીઆરના વિરોધમાં ૨ ઓક્ટોબરે ‘નો યુપીઆઈ ડે’નું આયોજન કર્યું હતું, પરંતુ નાણાપ્રધાન નિર્મલા સીતારામન સાથે બેઠક થયા બાદ વિરોધ પાછો ખેંચી લીધો હતો. નિર્મલા સીતારામને ગયા મહિને જણાવ્યું હતું કે યુપીઆઈ સ્ટિયરિંગ કમિટીની બેઠક કેટલીક બાબતો સ્પષ્ટ કરવા માટે મળશે.

રૂ. 40 લાખ સુધીનું ટર્નઓવર ધરાવતા વેપારીઓને એમડીઆરમાંથી મુક્તિ?

ટોચનાં સૂત્રોનો દાવો છે કે ક્રિસમસ બાદ તહેવારોની મોસમ પૂરી થશે ત્યારે યુપીઆઈ પર એમડીઆર લાગુ થવાની શક્યતા છે. એટલે કે તેની શરૂઆત ૧ જાન્યુઆરીથી થશે અને સમગ્ર ક્ષેત્રમાં લાગુ પડતી કેટેગરી મુજબ ફી વસૂલવાની વ્યવસ્થા અમલમાં આવી શકે છે. રૂ. ૨,૦૦૦ સુધીના યુપીઆઈ વ્યવહારો માટેની એમડીઆરમાંથી મુક્તિ અગાઉની જેમ જ ચાલુ રહેવાની શક્યતા છે. આ ઉપરાંત, કમિટી વાર્ષિક રૂ. ૪૦ લાખ સુધીનું ટર્નઓવર ધરાવતા વેપારીઓને એમડીઆરમાંથી મુક્તિ આપવાની પણ વિચારણા કરી રહી છે. આ પગલાંથી હાલની વ્યવસ્થા કરતાં મુક્તિનો વ્યાપ નોંધપાત્ર રીતે વધશે. હાલના માળખા હેઠળ માસિક રૂ. ૧ લાખ સુધીનું ટર્નઓવર ધરાવતા વેપારીઓને આ ફીમાંથી મુક્તિ મળે છે. એમડીઆર એટલે વેપારી દ્વારા ડિજિટલ વ્યવહારની પ્રક્રિયા કરતી બેન્ક અથવા પેમેન્ટ કંપનીને ચૂકવવામાં આવતી ફી.

આ પણ વાંચો : અમદાવાદના 291 જંક્શન થશે સિગ્નલ ફ્રી, કેપ્સૂલ સર્કલ મોડલથી ટ્રાફિક જામમાં રાહત અને 20થી 30 મિનિટ સમય બચાવવાનો પ્રયાસ

સપ્ટેમ્બરમાં યુપીઆઈના વ્યવહારોનો નવો રેકોર્ડ

• સપ્ટેમ્બરમાં યુપીઆઈ પર સરેરાશ દરરોજ ૮૦.૨ કરોડ વ્યવહારો નોંધાયા હતા, જે અત્યાર સુધીનો રેકોર્ડ છે. આ વ્યવહારોનું સરેરાશ દૈનિક મૂલ્ય રૂ. ૯૭,૯૧૩ કરોડ રહ્યું હતું.
• સપ્ટેમ્બરમાં યુપીઆઈ વ્યવહારોની સંખ્યા વાર્ષિક ધોરણે ૨૨.૬ ટકા વધીને ૨૪.૦૭ અબજ થઈ હતી, જે એક વર્ષ અગાઉ ૧૯.૬૩ અબજ હતી.
• આ વ્યવહારોનું કુલ મૂલ્ય ૧૮ ટકા વધીને રૂ. ૨૯.૩૭ લાખ કરોડ થયું હતું, જે એક વર્ષ અગાઉ રૂ. ૨૪.૮૯ લાખ કરોડ હતું.
• માસિક ધોરણે જોકે વ્યવહારોની સંખ્યામાં ૧.૮ ટકાનો ઘટાડો થયો હતો. ઓગસ્ટમાં ૨૪.૫૧ અબજ વ્યવહારોની સરખામણીએ સપ્ટેમ્બરમાં ૨૪.૦૭ અબજ વ્યવહારો નોંધાયા હતા. તેનું એક કારણ સપ્ટેમ્બરમાં ઓગસ્ટ કરતાં એક દિવસ ઓછો હોવું પણ હતું.
• માસિક ધોરણે યુપીઆઈ વ્યવહારોનું કુલ મૂલ્ય પણ ૧.૫ ટકા ઘટીને રૂ. ૨૯.૩૭ લાખ કરોડ થયું હતું, જે ઓગસ્ટમાં રૂ. ૨૯.૮૨ લાખ કરોડ હતું.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ