રેસિપી / એકની એક ગુજરાતી કઢી ખાઈને કંટાળ્યા હોવ તો ટ્રાય કરી લો આ સિંધી કઢી, પડી જશે જલસો

સિંધી કઢી

સામગ્રી

- 1/2 કપ ગુવાર
- 1 કપ બટાકાના ટુકડા
- 1/2 કપ ગાજરના ટુકડા
- 1/2 કપ સમારેલો ભીંડો
- 1 નંગ સરગવાની સીંગના ટુકડા
- 1 ચમચી જીરું
- 1 ચમચી આખી મેથી
- 1/2 ચમચી હિંગ
- 6 ચમચા બેસન
- 4 ચમચી સમારેલા લીલા મરચા
- 2 ચમચી છીણેલુ આદુ
- 6 મીઠા લીમડાના પાન
- 1 ચમચી વરિયાળી
- 1/2 ચમચી હળદર
- 4 ચમચી લાલ મરચું
- 4 ચમચી આમલીનો પલ્પ
- 5 ચમચા તેલ
- 2 કપ છાશ
- મીઠું સ્વાદ મુજબ

રીત

ગુવાર, ગાજર, સરગવો, બટાકાને ધોઈ લો. હવે આ શાકને બે કપ પાણીમાં અધકચરા બાફી લો. એક પેનમાં તેલ ગરમ કરો. તેમાં જીરું, મેથી અને વરિયાળી ઉમેરો. તે તતડે એટલે તેમાં બેસન ઉમેરીને પાંચ મિનિટ મધ્યમ તાપે શેકો. પછી તેમાં ચાર કપ પાણી રેડીને ચઢવા દો. પાણી ઉકળવા માંડે એટલે તેમાં લીલા મરચાં, આદું, મીઠા લીમડાના પાન, હળદર, લાલ મરચું, આમલીનો પલ્પ, મીઠું અને બાફેલા શાકભાજી અને ભીંડા ઉમેરીને થોડી વાર સુધી ઉકળવા દો. આ સમયે તેમાં છાશ ઉમેરો અને ઉકળવા દો. એક સરસ સુગંધ પણ આવશે. ભીંડા ચઢી જાય એટલે તેને ઉતારીને ગરમા ગરમ સર્વ કરો. આ કઢીને તમે પરોઠા, બાજરીનો રોટલો, ભાત અને ખીચડી સાથે પણ સર્વ કરી શકો છો.