Lok Sabha Election : લોકસભા ચૂંટણીને લઈ ભાજપની કેન્દ્રીય ચૂંટણી સમિતિ (CEC)ની બેઠક શનિવારે મોડી રાત સુધી ચાલુ રહી હતી. મહત્વનું છે કે, વડા પ્રધાન નરેન્દ્ર મોદી, કેન્દ્રીય ગૃહ પ્રધાન અમિત શાહ, સંરક્ષણ પ્રધાન રાજનાથ સિંહ અને પક્ષ પ્રમુખ જેપી નડ્ડા સહિત CEC સભ્યોએ બેઠકમાં હાજરી આપી હતી. આ બેઠકમાં ઉત્તર પ્રદેશ, પશ્ચિમ બંગાળ, ઓડિશા અને રાજસ્થાનના ઉમેદવારોના નામો પર પણ ચર્ચા કરવામાં આવી હતી. સૂત્રોએ જણાવ્યું કે, લગભગ 3 કલાક સુધી ચાલેલી આ બેઠકમાં પાર્ટી હાઈકમાન્ડે ઘણા મોટા નામોની ટિકિટો રદ કરીને તેમની જગ્યાએ નવા ચહેરાઓને તક આપવાનો નિર્ણય લીધો છે.
તો શું આ હાઈપ્રોફાઈલ ચહેરાઓની ટિકિટ કપાઈ ?
સૂત્રોના જણાવ્યા પ્રમાણે ભાજપની કેન્દ્રીય ચૂંટણી સમિતિએ જેમની ટિકિટ કાપવાનો નિર્ણય કર્યો છે તેમાં ગાઝિયાબાદના સાંસદ અને ભૂતપૂર્વ આર્મી ચીફ જનરલ વીકે સિંહ, પીલીભીતથી વરુણ ગાંધી અને પ્રયાગરાજ સીટથી રીટા બહુગુણાનો સમાવેશ થાય છે. આ સિવાય બલિયાથી વીરેન્દ્ર સિંહ મસ્ત, હાથરસથી રાજવીર દિલેર, જયપુરથી રામચરણ બોહરા, ગંગાનગર સીટથી નિહાલ ચંદ અને બંધાયુથી સંઘમિત્રા મૌર્યની ટિકિટ કપાઈ શકે છે.
આ લોકોની ટિકિટ કન્ફર્મ
સૂત્રોએ જણાવ્યું કે ભાજપે તેમના સ્થાને ગાઝિયાબાદથી અતુલ ગર્ગ, પીલીભીતથી જિતિન પ્રસાદ, હાથરસથી અનુપ બાલ્મિકીને, સહારનપુરથી રાઘવ લખનપાલ, અલીગઢથી સતીશ ગૌતમ, જયપુર સિટી સીટથી પૂજા કપિલ મિશ્રા, સુલતાનપુરથી મેનકા ગાંધી, મુરાદાબાદથી સર્વેશ કુમારને આપવાનું નક્કી કર્યું. આ સિવાય ધર્મેન્દ્ર પ્રધાનને ઓડિશાની સંબલપુર સીટથી, સંબિત પાત્રાને પુરીથી અને અપરાજિતા સારંગીને ભુવનેશ્વરથી ટિકિટ મળી શકે છે.
વધુ વાંચો : કોંગ્રેસે જાહેર કર્યું 46 ઉમેદવારનું ચોથું લિસ્ટ, વારાણસીમાં PM મોદીની સામે 'અજય' ઉમેદવાર ઉતાર્યો
તમને જણાવી દઈએ કે, BJP સેન્ટ્રલ ઈલેક્શન કમિટીની આ પહેલા પણ બે વખત બેઠક થઈ છે અને અત્યાર સુધીમાં 291 લોકસભા સીટો માટે ઉમેદવારોના નામ જાહેર કર્યા છે. આ બેઠકોમાં ઉત્તર પ્રદેશ, ગુજરાત, પશ્ચિમ બંગાળ, ઝારખંડ, રાજસ્થાન, હરિયાણા, કર્ણાટક, તમિલનાડુ, ઉત્તરાખંડ, કેરળ અને તેલંગાણા સહિત અન્ય રાજ્યોની બેઠકો પર નિર્ણય લેવામાં આવ્યો હતો. આમાંના કેટલાક રાજ્યોમાં ભાજપે હજુ સુધી ઘણી બેઠકો માટે ઉમેદવારોની જાહેરાત કરી નથી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
