બોલિવૂડ ફિલ્મોના ચાહકો માટે સારા સમાચાર છે, ઇમરાન ખાન નવ વર્ષના લાંબા બ્રેક બાદ બોલિવૂડમાં કમબેક કરવા માટે તૈયાર છે. જો અહેવાલોનું માનીએ તો, ઈમરાન તેની ફિલ્મી કારકિર્દીનો બીજો તબક્કો તેના મામા આમિર ખાન સાથે શરૂ કરી રહ્યો છે.
છેલ્લી ફિલ્મ કટ્ટી બટ્ટી હતી
બોલિવૂડનો હેન્ડસમ હંક ઈમરાન ખાન આ દિવસોમાં ચર્ચામાં છે. ઈમરાન ખાન ઘણા સમયથી બોલિવૂડની દુનિયાથી દૂર છે. તેની છેલ્લી ફિલ્મ કટ્ટી બટ્ટી વર્ષ 2015માં રિલીઝ થઈ હતી, એ બાદથી તે કોઈ ફિલ્મમાં જોવા મળ્યા નહતા. હવે ઈમરાન ખાનને લઈને એક નવો રિપોર્ટ સામે આવ્યો છે, જેમાં કહેવામાં આવ્યું છે કે ઈમરાન ફરી એકવાર પોતાની શાનદાર એક્ટિંગથી બધાનું દિલ જીતવા માટે તૈયાર છે.
એક્ટિંગની દુનિયામાં પરત ફરી રહ્યો છે ઈમરાન ખાન
ઈમરાન ખાન લાંબા સમયના બ્રેક બાદ એક્ટિંગની દુનિયામાં પરત ફરી રહ્યો છે અને તે આમિર ખાનના પ્રોડક્શન હાઉસ હેઠળ બની રહેલી ફિલ્મમાં એક્ટિંગ કરતો જોવા મળશે. જાણીતું છે કે આમિર ખાને 1988માં આવેલી ફિલ્મ 'કયામત સે કયામત તક'માં ઈમરાનને બાળ કલાકાર તરીકે અને 2008માં ફિલ્મ 'જાને તુ યા જાને ના'માં લીડ રોલમાં લોન્ચ કર્યો હતો.
ઇમરાને તેના કમબેક પ્રોજેક્ટને લોક કરી દીધો
અહેવાલો અનુસાર, ગયા વર્ષે ફિલ્મોમાં પાછા ફરવાની વાત કરી હતી અને હવે આઠ મહિના પછી, ઇમરાને તેના કમબેક પ્રોજેક્ટને લોક કરી દીધો છે. રિપોર્ટ અનુસાર આમિર ખાન પ્રોડક્શન દ્વારા નિર્મિત કોમેડી ફિલ્મ 'હેપ્પી પટેલ'માં હેપ્પી પટેલની ભૂમિકા ભજવશે.
જો રિપોર્ટ્સનું માનીએ તો આ ફિલ્મનું શૂટિંગ પણ ગોવામાં શરૂ થઈ ગયું છે, જેનું નિર્દેશન વીર દાસ કરી રહ્યા છે. 'હેપ્પી પટેલ' વીર દાસની પહેલી ફિલ્મ હશે જેનું નિર્દેશન તેઓ કરશે. આ પહેલા ઈમરાન અને વીરે 'દિલ્હી બેલી'માં સાથે કામ કર્યું હતું. આ ફિલ્મને પણ આમિર ખાને પ્રોડ્યુસ કરી હતી.
