તોડફોડ / કુતિયાણા નગરપાલિકાના પૂર્વ મહિલા પ્રમુખ ઢેલીબેન ઓડેદરાની દાદાગીરી, પાણી માટે તોડી નર્મદાની પાઈપ લાઈન

કુતિયાણા નગરપાલિકાના પૂર્વ મહિલા પ્રમુખ ઢેલીબેન ઓડેદરાની દાદાગીરીનો એક કિસ્સો સામે આવ્યો છે. જેમાં પાલિકાના પૂર્વ મહિલા પ્રમુખે પાણી માટે નર્મદા લાઇનમાં તોડફોડ કરી હતી.

મારા વિરુદ્ધ અધિકારીઓને જે પગલા લેવા હોય તે લઇ શકે છેઃ ઢેલીબેન

તેમણે કુતિયાણાને પાણી નહી મળતું હોવાથી નર્મદાની પાણીની પાઇપ લાઈનમાં તોડફોડ કરી વિરોધ વ્યક્ત કર્યો.. આ મામલે અધિકારીઓને અનેક વખત રજુઆત કરવા છતા કોઇ ઉકેલ ન આવતા તેમણે પાઇપમાં તોડફોડ કરી હતી. તેમણે કહ્યુ હતું કે આ લાઇન તોડીને હું મારા ગામને પાણી પુરુ પાડીશ , મારા વિરુદ્ધ અધિકારીઓને જે પગલા લેવા હોય તે લઇ શકે છે.

પાઇપલાઇનમાં તોડફોડ માટે જેસીબી બોલાવ્યું

ઢેલીબેન ઓડેદરાએ જેસીબી બોલાવીને ઉપલેટાથી પોરબંદર આવતી પાઇપલાઇનમાં તોડફોડ કરી હતી.. તેમણે કહ્યું હતું કે મારી વાત કોઇ અધિકારીએ કાને ધરી નથી જેથી મારે આ કરવા મજબુર થવું પડ્યું છે..

આ પણ વાંચોઃ ભાવનગરનો સુએજ ટ્રીટમેન્ટ પ્લાન્ટ વિવાદમાં: તૈયાર કર્યાને 7-7 વર્ષ થયા છતાંય વપરાશ ઠેરના ઠેર, હવે ખર્ચાશે 70 કરોડ

મહત્વની વાત તો એ હતી કે પાંચ-પાંચ કલાક સુધી નર્મદાની લાઇનમાં તોડફોડનું કામ ચાલુ હોવા છતા એકપણ અધિકારી ત્યાં ફરક્યા ન હતા.